কোকৰাঝাৰৰ কঠালগুৰিস্থিত স্প’ৰ্টছ অথ’ৰিটি অব ইণ্ডিয়া চমুকৈ ছাইৰ খেলপথাৰৰ প্ৰাংগণত আজি ৰাতিপুৱা ছাত্ৰ-ছাত্ৰীসকল উপস্থিত হৈ প্ৰতিভাৱান আৰ্চাৰ তথা এছিয়ান গেইমছলৈ নিৰ্বাচিত হোৱা ওদালগুৰিৰ জীয়ৰী প্ৰমীলা দৈমাৰীক প্ৰতিযোগিতাখনৰ বাবে শুভেচ্ছা প্ৰদান কৰে।
উল্লেখযোগ্য যে ইণ্ডোনেছিয়াৰ জাকাৰ্টাত ১৮ আগষ্টৰ পৰা ২ ছেপ্তেম্বৰলৈ অনুষ্ঠিত হ’বলগীয়া বহু প্ৰতিক্ষিত এছিয়ান গেইমছত ভাগ লোৱাৰ উদ্দেশ্যে ১৪ আগষ্ট অৰ্থাৎ মঙলবাৰে জাকাৰ্টালৈ উৰা মাৰিব প্ৰমীলা দৈমাৰী। সেয়ে আৰ্চাৰগৰাকীক ছাইৰ ছাত্ৰ-ছাত্ৰী তথা কৰ্তৃপক্ষই আজি শুভেচ্ছা প্ৰদান কৰে।
আজিৰ এই শুভেচ্ছামূলক অনুষ্ঠানটিত বিটিচিৰ ক্ৰীড়া আৰু যুৱ কল্যাণ বিভাগৰ ইএম দনেশ্বৰ গয়াৰী উপস্থিত থাকি তেওঁক শুভেচ্ছা প্ৰদান কৰে। লগতে আগন্তুক এছিয়ান গেইমছত প্ৰমীলাই ভাৰতৰ হৈ পদক আজুৰি আনি অসমলৈ গৌৰৱ কঢ়িয়াই আনিবলৈ সক্ষম হ’ব বুলিও গয়াৰীয়ে কয়।
ইয়াৰ উপৰি কোকৰাঝাৰৰ সকলো খেলুৱৈকে বিটিচি প্ৰশাসনৰ তৰফৰ পৰা সকলো প্ৰকাৰৰ সহায় সহযোগিতা আগবঢ়াব বুলি গয়াৰীয়ে আজিৰ এই শুভেচ্ছামূলক অনুষ্ঠানতে মন্তব্য কৰে।
কোকৰাঝাৰ ছাইৰ ভাৰপ্ৰাপ্ত অধ্যক্ষ প্ৰদীপ ব্ৰহ্মই আজিৰ এই অনুষ্ঠানতে কয় যে ছয়গৰাকীকৈ অসমীয়া খেলুৱৈয়ে এছিয়ান গেইমছৰ বিভিন্ন খেলত প্ৰতিদ্বণ্ডিতা আগবঢ়োৱাটো অসমবাসীৰ বাবে গৌৰৱৰ বিষয়।
উল্লেখযোগ্য যে অসমৰ ক্ৰীড়া জগতৰ ইতিহাসত নজিৰ সৃষ্টি কৰি প্ৰথম বাৰৰ বাবে এছিয়াডত ৬ গৰাকীকৈ অসমীয়া খেলুৱৈৰ অংশগ্ৰহণৰ খবৰে উৎফুল্লিত কৰি তুলিছে অসমৰ ক্ৰীড়া প্ৰেমীক। খেলুৱৈ কেইগৰাকী হ’ল বিশ্ববিজয়ী দৌৰবিদ হিমা দাস, আৰ্চাৰ প্ৰমীলা দৈমাৰী, শ্বাটলাৰ অস্মিতা চলিহা, বক্সাৰ শিৱ থাপা, ফেন্সাৰ কবিতা দেৱী আৰু টাইকোৱানডোত ৰুদালী বৰুৱা।
