দেশৰ ৭২সংখ্যক স্বাধীনত দিৱস উদযাপনৰ বাবে সাজু হৈছে অসম চৰকাৰ। কামৰূপ মহানগৰ জিলা প্ৰশাসনৰ উদ্যোগত খানাপাৰাৰ পশু চিকিৎসা বিজ্ঞান মহাবিদ্যালয় খেলপথাৰত অনুষ্ঠিত হ’ব স্বাধীনতা দিৱসৰ কেন্দ্ৰীয় কাৰ্যসূচী। দিৱস উপলক্ষে মুখ্য মন্ত্ৰী সৰ্বানন্দ সোণোৱালে উত্তোলন কৰিব ত্ৰিৰংগ পতাকা।
ৰাষ্ট্ৰীয় পতাকা উত্তোলনৰ পাছতে আৰক্ষী, এন চি চি, স্কাউট এণ্ড গাইড আদিয়ে কদম খোজেৰে (march-past) আভিবাদন জনাব মুখ্যমন্ত্ৰী, ভি আই পি, ভি ভি আই পিৰ লগতে উপস্থিত ৰাইজক। ইয়াৰ উপৰি সেইদিনা খানাপাৰাৰ খেলপথাৰত পৰিৱেশিত হ’ব বিভিন্ন লোক নৃত্য আৰু সাংস্কৃতিক কাৰ্যসূচী।
কিন্তু এইখিনিতে এটা প্ৰশ্ন উত্থাপন হৈছে, -এই কাৰ্যসূচীসমূহৰ বাবে কিমান সুবিধাজনক হৈ আছে খানাপাৰাৰ এসময়ৰ গুৱাহাটীৰ আটাইতকৈ উৎকৃষ্ট খেলপথাৰখন।
১৫ আগষ্টৰ পতাকা উত্তোলনৰ সময়লৈ মাজত মাত্ৰ কেইটামান ঘণ্টাহে বাকী থকা অৱস্থাত বোকা-পানীৰে এক কদৰ্যময় অৱস্থাত আছে খেলপথাৰখন।
মন কৰিব লগীয়া যে এটাৰ পাছত আনটো চৰকাৰী আৰু ৰাজনৈতিক কাৰ্যসূচী অনুষ্ঠিত কৰি খেলপথাৰখন ধ্বংস কৰা বুলি অসম কৃষি বিশ্ববিদ্যালয় কৰ্তৃপক্ষই অভিযোগ কৰি আহিছে। খেলপথাৰখনৰ বৰ্তমানৰ কৰ্দয্য ৰূপটোৱে কথাটোৰ সত্যতা প্ৰতিপন্ন কৰে।
কিন্তু আৰ টি আই আৱেদন কৰি পোৱা তথ্যই কয় যে বিশ্ববিদ্যালয়খনৰ কৰ্তৃপক্ষই খেলপথাৰখন ব্যৱহাৰ কৰিবলৈ দিয়াৰ বিনিময়ত লাভ কৰি আহিছে বৃহৎ অংকৰ ধন। ভাৰাৰ বাবত যোৱা তিনিটা বছৰত লাভ কৰিছে ২০ লাখতকৈ অধিক ধন। কিন্তু সেই টকা খেলপথাৰখন মেৰামতি আৰু খেলা-ধূলাৰ অনুকূল কৰাত ব্যৱহাৰ নকৰি বিশ্ববিদ্যালয় কৰ্তৃপক্ষই ইয়াৰ দায় আনলৈ ঠেলাটোতো ৰহস্যৰ গোন্ধ আছে। বিশ্ববিদ্যালয় কৰ্তৃপক্ষই কি কৰিছে ইমান মোটা অংকৰ ধন?
আনহাতে স্বাধীনতা দিৱসৰ প্ৰাকক্ষণত খেলপথাৰখনৰ এই শোচনীয় অৱস্থা সম্পৰ্কত কামৰূপ মহানগৰ জিলাৰ উপায়ুক্ত বীৰেন্দ্ৰ মিট্টালে কয়, “যোৱা নিশা হোৱা ডাঙৰ বৰষুণৰ বাবে খেলপথাৰখনত এইদৰে বোকা হৈছে। এইটো এটা প্ৰাকৃতিক পৰিঘটনা, ইয়াত কাৰো হাত নাই। আমি গড়কাপ্তানী বিভাগৰ লগত কথা পাতিছো। কাৰ্যসূচীসমূহ যাতে সুচাৰুৰূপে অনুষ্ঠিত কৰিব পাৰি, তাৰ বাবে খেলপথাৰখন সাজু কৰি তুলিবলৈ গড়কাপ্তানী বিভাগে কাম কৰি আছে।”
এই খিনিতে মন কৰিব লগীয়া যে নিজৰ তত্ত্বাৱধানত থকা খেলপথাৰখন ভাৰালৈ দিয়াৰ লগতে ভাৰাত লোৱা পক্ষটোক মেৰামতি আৰু তদাৰকীৰ বাবে এৰি দিয়াটো নিঃসন্দেহে চিন্তনীয়। ভাৰাৰ বাবত পোৱা ধনেৰে খেলপথাৰখনৰ মেৰামতি আৰু ক্ৰীড়াৰ অনুকূল কৰি ৰখাটো আচলতে বিশ্ববিদ্যালয়ৰে দায়িত্ব।
উল্লেখযোগ্য যে যোৱা দুদিনমানৰ বৰষুণৰ বাবেই নহয়, দীৰ্ঘদিন ধৰি এইদৰে কদৰ্যময় অৱস্থাতে আছে খানাপাৰাৰ পশু চিকিৎসা বিজ্ঞান মহাবিদ্যালয় খেলপথাৰখন। খেলপথাৰখনৰ দুৰৱস্থা সন্দৰ্ভত আৰ টি আই আৱেদনৰ উত্তৰ দি মহাবিদ্যালয়খনৰ ছাত্ৰ কল্যাণ সঞ্চালক ড০ ৰঞ্জিত নেওগে বিভিন্ন ৰাজনৈতিক সভা-সমিতি পাতি অহা বিজেপিক জগৰীয়া কৰিছিল।
আৰ টি আই যোগে পোৱা তথ্যৰ ভিত্তিত খেলপথাৰখনৰ অৱস্থাৰ বিষয়ে নৰ্থ ইষ্ট নাও-ত ধাৰাবাহিকভাৱে অনুসন্ধানমূলক বাতৰি প্ৰকাশিত হৈছিল।
