যোৱা ৯ আগষ্টৰ পৰা লখিমপুৰৰ ত্যাগক্ষেত্ৰত বেতন বঞ্চিত কৰ্মৰত শিক্ষক সন্থাই গ্ৰহণ কৰা আমৰণ অনশন কাৰ্যসূচীয়ে আজি ৯০ ঘণ্টা অতিক্ৰম কৰিলে।
অনশন কাৰ্যসূচীৰ পঞ্চম দিনা অনশনস্থলীত ৬ গৰাকী শিক্ষক-শিক্ষয়িত্ৰী অসুস্থ হৈ পৰাৰ পাছত আজি পুনৰ অনুৰূপ ঘটনা সংঘটিত হৈছে অনশনস্থলীত। আজি ৭ গৰাকী প্ৰতিবাদকাৰীক সংকটজনক অৱস্থাত চিকিৎসালয়ত ভৰ্তী কৰোৱা হৈছে।
আমৰণ অনশনে ৫ দিন অতিবাহিত কৰাৰ পিছতো এতিয়ালৈ ৰাজ্য চৰকাৰ তথা লখিমপুৰ জিলা প্রশাসনৰ তৰফৰ পৰা এই ক্ষেত্রত কোনো ধৰণৰ উচিত ব্যৱস্থা গ্রহণ নকৰাত সচেতন মহলৰ মাজত তীব্র প্রতিক্রিয়াৰ সৃষ্টি হৈছে৷
উল্লেখযোগ্য যে ১৯৯১-২০০১ চনৰ ভিতৰত নিযুক্তিপ্রাপ্ত বেতন বঞ্চিত শিক্ষকসকলে যোৱা ২৬ জুলাইত আত্মজাহ যাবলৈ যোৱাৰ সময়ত অসমৰ মুখ্য মন্ত্রীৰ নির্দেশত জিলা প্রশাসনে শিক্ষক সন্থাক লিখিত প্রতিশ্রুতি প্রদান কৰি অসম চৰকাৰে এইসকল বেতন বঞ্চিত শিক্ষকৰ মাজত ২৪ ঘণ্টাৰ ভিতৰত এখন বৈঠক অনুষ্ঠিত কৰাৰ ব্যৱস্থা গ্ৰহণ কৰিব বুলি প্ৰতিশ্ৰুতি দিছিল।
কিন্তু চৰকাৰ তথা প্ৰশাসনৰ আশ্বাস ধোৱাচাঙত উঠা পৰিলক্ষিত হোৱাত তথা বর্তমানলৈকে আলোচনাৰ বাবে কোনো ব্যৱস্থা গ্ৰহণ নকৰাত শিক্ষক সন্থাই যোৱা ৯ আগষ্টৰ পৰা অনির্দিষ্টকালীন অনশন কাৰ্যসূচী আৰম্ভ কৰে৷
সম্প্রতি গুৰুতৰ ৰূপ লোৱা এই প্রতিবাদী কার্যসূচীলৈ বিভিন্ন দল-সংগঠনে সহমর্মিতা প্রদর্শন কৰি সমর্থন জনোৱাত অনাগত সময়ত প্ৰজ্ঞাৰ পোহৰ বিলোৱা এই সকল শিক্ষকৰ সমস্যাক লৈ এক অনাকাংক্ষিত পৰিস্থিতিৰ উদ্ভৱ হ’ব বুলি আশংকা কৰা হৈছে৷
