অসম চুক্তি সম্পাদিত হোৱাৰ ৩৩ বছৰ উপলক্ষে সদৌ অসম ছাত্ৰ সন্থাই মঙলবাৰে সন্ধিয়া প্ৰতিখন জিলা, মহকুমা আঞ্চলিক ছাত্ৰ সন্থাই নিজ নিজ এলেকাত বন্তি প্ৰজ্বলনেৰে অসম আন্দোলনৰ চহিদক শ্ৰদ্ধাঞ্জলি জনায়।
ঠিক সেইদৰে নগাঁৱতো নগাঁও জিলা ছাত্ৰ সন্থাই সন্ধিয়া জিলা কাৰ্যালয়ৰ প্ৰাংগণত ঐতিহাসিক অসম আন্দোলনৰ ৮৫৫ জন চহিদৰ তেজৰ বিনিময়ত সম্পাদিত হোৱা অসম চুক্তিৰ দিনটোক বন্তি প্ৰজ্বলনেৰে সোঁৱৰে।
উল্লেখ্য যে, ১৯৮৫ চনৰ ১৪ আগষ্ট দিনটো অসমৰ বাবে ঐতিহাসিক দিন হিচাপে পৰিগণিত হৈছিল। দীৰ্ঘদিনীয়া অসম আন্দোলনৰ পাছত তদানীন্তন প্ৰধান মন্ত্ৰী ৰাজীৱ গান্ধীয়ে উক্ত দিনা নিশা সদৌ অসম ছাত্ৰ সন্থা আৰু গণ সংগ্ৰাম পৰিষদৰ নেতৃত্বৰ লগত আলোচনাৰে সম্পাদিত কৰিছিল অসম চুক্তি।
ইয়াৰ পিছতে ১৫ আগষ্টৰ পুৱা প্ৰধান মন্ত্ৰী ৰাজীৱ গান্ধীয়ে লালকিল্লাত ৰাষ্ট্ৰীয় পতাকা উত্তোলন কৰি অসম চুক্তি সম্পাদিত হোৱা বুলি ৰাষ্ট্ৰৰ উদ্দেশ্যে ভাষণ প্ৰদান কৰিছিল।
আনহাতে, সমগ্ৰ দেশবাসীয়ে আজি ৭২ সংখ্যক স্বাধীনতা দিৱস উদযাপন কৰাৰ লগতে অসম চুক্তিয়েও সম্পূৰ্ণ কৰিব ৩৩ বছৰ।
