মঙলবাৰে অসম প্ৰদেশ বিজেপিৰ সভাপতি ৰঞ্জিত দাসে এন আৰ চি সন্দৰ্ভত কেন্দ্ৰীয় গৃহ মন্ত্ৰী ৰাজনাথ সিঙক সাক্ষাৎ কৰে। বৈঠকৰ সময়ত দাসে এন আৰ চিৰ পৰা যাতে কোনো বৈধ ভাৰতীয়ৰ নাম বাদ নপৰে সেই সন্দৰ্ভত বিশদভাৱে আলোচনা কৰে।
উল্লেখ্য যে যোৱা ১২ আগষ্টত গুৱাহাটীত অনুষ্ঠিত হৈ যোৱা বিজেপি দলৰ ক’ৰ কমিটীৰ বৈঠকত নাগৰিকপঞ্জী সম্পৰ্কে আলোচনা কৰাৰ পাছত দলৰ সিদ্ধান্ত মৰ্মে মুখপাত্ৰ ডাঃ ৰাজদ্বীপ ৰায়ক লগত লৈ সভাপতি ৰঞ্জিত দাসে কেন্দ্ৰীয় গৃহ মন্ত্ৰীক সাক্ষাৎ কৰে বুলি জানিব পৰা যায়।
নাগৰিকপঞ্জীত যিসকল লোকৰ নাম অন্তৰ্ভুক্ত হোৱা নাই তেওঁলোকৰ বাবে আবেদনৰ সময়সীমা বৃদ্ধি কৰিবলৈ কেন্দ্ৰীয় মন্ত্ৰীগৰাকীক অনুৰোধ জনায়।
তদুপৰি শৰণাৰ্থীৰ প্ৰমাণপত্ৰৰ লগতে প্ৰব্ৰজন আৰু শিবিৰত থকা লোক সকলোৰো প্ৰমাণপত্ৰক নাগৰিকপঞ্জীৰ বৈধ নথি হিচাপে গ্ৰহণ কৰিবলৈ বিজেপিৰ নেতাদ্বয়ে গৃহ মন্ত্ৰীজনক অনুৰোধ জনোৱা হয়।
একেদৰে অসমত থকা হিন্দু, বঙালী, নেপালী আৰু হিন্দীভাষী বহু লোকৰ নামো নাগৰিকপঞ্জীৰ খচৰাত অন্তৰ্ভুক্ত হোৱা নাই। তেওঁলোকৰ নাম অন্তৰ্ভুক্তিৰ বাবেও দলে বিশেষ ব্যৱস্থা গ্ৰহণৰ পোষকতা কৰে।
বিশেষকৈ দেশৰ অন্য ৰাজ্যৰ পৰা আহি অসমত বসতি কৰি থকা হিন্দী ভাষী আৰু বাংলাভাষী সকলো লোকৰ লগতে ‘ডি ভোটাৰ’সকলৰো নাম যাতে নাগৰিকপঞ্জীত অন্তৰ্ভুক্তি হয় সেই বিষয়টো সহানুভূতিৰে বিবেচনা কৰিবলৈ কেন্দ্ৰীয় গৃহ মন্ত্ৰীক অনুৰোধ জনোৱা হয়।
ইফালে অসম বিজেপিৰ মুখপাত্ৰ ডাঃ ৰায়ে নাগৰিকপঞ্জীৰ দাবী আপত্তিৰ বিষয়ত যাতে কোনো লোকে জৰিমনা ভৰিবলগীয়া নহয় তাৰ ব্যৱস্থাও গ্ৰহণ কৰিবলৈ অনুৰোধ জনায়। তেওঁ সমগ্ৰ বিষয় সন্দৰ্ভত কেন্দ্ৰীয় গৃহ মন্ত্ৰালয়ে মহামান্য উচ্চতম ন্যায়ালয়ত ১৩ পৃষ্ঠাৰ শপতনামা দাখিল কৰাৰ কথাও প্ৰকাশ কৰিছে।
