মৰিগাঁৱত এন আৰ চিৰ কামত এগৰাকী বাংলাদেশী নাগৰিক নিয়োজিত হোৱাৰ বাতৰিয়ে সমগ্র ৰাজ্যখনত চাঞ্চল্যৰ সৃষ্টি কৰি অহাৰ পিছত অৱশেষত মৰিগাঁৱ আৰক্ষীয়ে বাংলাদেশী শিক্ষক খাইৰুল ইছলামক গ্রেপ্তাৰ কৰে। বাংলাদেশী শিক্ষক খাইৰুল ইছলামক সংবাদ মাধ্যমৰ লগতে বিভিন্ন দল-সংগঠনে লোৱা সক্ৰিয় ভূমিকাৰ পিছত বুধবাৰে নিশা আৰক্ষীয়ে মৈৰাবাৰীৰ পৰা গ্রেপ্তাৰ কৰে।
গ্রেপ্তাৰ কৰা বাংলাদেশী শিক্ষক খাইৰুলক বৃহস্পতিবাৰে তেজপুৰৰ ডিটেনশ্যন কেম্পলৈ প্রেৰণ কৰা হয়। মৰিগাঁও জিলাৰ মিকিৰভেটা থানাৰ অন্তর্গত ঠেকেশালিবৰি খন্দাপুখুৰী প্রাথমিক বিদ্যালয়ৰ শিক্ষক খাইৰুল ইছলাম এন আৰ চি উন্নীতকৰণৰ কামত মিকিৰগাঁও গাঁও পঞ্চায়তৰ এন আৰ চি সেৱা কেন্দ্ৰত ভি টি এম হিচাপে যোৱা বছৰৰ ছেপ্টেম্বৰ মাহৰ পৰা নিয়োজিত হৈ আছিল।
আনহাতে, ১৯৯৭ চনতেই ৰুজু হোৱা আই এম ডি টি গোচৰৰ ভিত্তিত মৰিগাঁও ৩নং বিদেশী ন্যায়াধিকৰণে বাংলাদেশৰ নোৱাখালিৰ খাইৰুল ইছলাম, মাতৃ মনোৱাৰা বেগম, দুই ভাতৃ আছাদুল আৰু চিৰাজুল আৰু ভগ্নী ফৰিদা বেগমক ২০১৫ চনৰ ২০ ফেব্রুৱাৰীত বিদেশী বুলি ৰায় দিয়ে।
ইপিনে বিদেশী ন্যায়াধিকৰণৰ ৰায়ক প্রত্যাহবান জনাই খাইৰুল ইছলাম, দুই ভাতৃ, ভগ্নীৰ লগতে মাতৃয়ে ৫২৩২২০১৬নং এখন লেখ আৱেদন দাখিল কৰে গুৱাহাটী উচচ ন্যায়ালয়ত। সেই অনুসৰি মাতৃ মনোৱাৰা বেগমে গুৱাহাটী উচচ ন্যায়ালয়ত দাখিল কৰা গোচৰৰ চূড়ান্ত ৰায়দানত গুৱাহাটী উচচ ন্যায়ালয়ে মৰিগাঁৱৰ ৩নং বিদেশী ন্যায়াধিকাৰৰ ৰায়কেই বাহাল ৰাখে।
ৰহস্যজনকভাৱে, যোৱা ১৩ জুনতে প্রদান কৰা এই ৰায়দানৰ পাছত দুমাহ কাল এইজন বিদেশী নাগৰিক এন আৰ চিৰ কামত নিয়োজিত হৈ আছিল।
জানিব পৰা মতে উচচ ন্যায়ালয়ে প্রদান কৰা ৰায়ৰ প্রতিলিপি মৰিগাঁও ৩নং বিদেশী ন্যায়াধিকৰণৰ সদস্য, মৰিগাঁৱৰ উপায়ুক্ত, আৰক্ষী অধীক্ষকলৈ যোৱা ১৯ জুলাইত প্রেৰণ কৰিছিল। কিন্তু এই সমগ্র ঘটনাটো সংবাদ মাধ্যমে পোহৰলৈ অনাৰ পাছতহে ১১ আগষ্টত জিলাৰ উপায়ুক্ত হেমেন দাসে এক বিবৃতিৰ জৰিয়তে বিদেশী খাইৰুলক এন আৰ চিৰ কামৰ পৰা অব্যাহতি দিয়া বুলি অৱগত কৰিছিল।
তাৎপৰ্যপূৰ্ণ কথা যে খাইৰুল ইছলাম যে বিদেশী সেই কথা গম পোৱা নাছিল মৰিগাঁৱৰ আৰক্ষী অধীক্ষক আৰু সীমান্ত শাখাৰ আৰক্ষীয়ে। সংবাদ মাধ্যমৰ লোকে ১৪ আগষ্টত মৰিগাঁৱৰ আৰক্ষী অধীক্ষকৰ পৰা খাইৰুলৰ সন্দর্ভত কি ব্যৱস্থা গ্রহণ কৰিছে সেই সন্দর্ভত মন্তব্য বিচাৰি যাওঁতে খাইৰুলৰ ক্ষেত্রত আৰক্ষী অধীক্ষকৰ হাতত একো তথ্য নাই বুলি অৱগত কৰে।
সাংবাদ মাধ্যমৰ লোকে ন্যায়ালয়ে প্রদান কৰা ৰায়ৰ প্রতিলিপি দেখুওৱাৰ পাছতহে মৰিগাঁৱৰ আৰক্ষী অধীক্ষক স্বপ্ননীল ডেকাই তৎপৰতা প্ৰদৰ্শন কৰে। এন আৰ চিৰ দৰে অতি গুৰুত্বপূর্ণ বিষয়ৰ এটা ঘটনা সন্দর্ভত মৰিগাঁও জিলা প্রশাসন আৰু আৰক্ষী প্রশাসনৰ ভূমিকাক লৈ তীব্র প্রতিবাদ হোৱাৰ পিছত মৰিগাঁও প্রশাসন সষ্টম হৈ পৰে৷
অৱশেষত জিলা প্ৰশাসনৰ তৎপৰতাত বৃহস্পতিবাৰে নিশা মৈৰাবাৰীত আত্মগোপন কৰি থকা খাইৰুলক মৰিগাঁৱৰ আৰক্ষীয়ে গ্রেপ্তাৰ কৰে। ইপিনে ঠেকেশালিবৰি খন্দাপুখুৰী প্রাথমিক বিদ্যালয়ৰ শিক্ষক খাইৰুলক তৎকালীনভাৱে বলৱৎ হোৱাকৈ মৰিগাঁও জিলা প্ৰাথমিক শিক্ষা বিষয়াই চাকৰিৰ পৰা নিলম্বন কৰিছে।
