কেন্দ্ৰীয় ৰে’ল ৰাজ্যিক মন্ত্ৰী ৰাজেন গোহাঁয়ে ধৰ্ষণ কৰা বুলি নগাওঁ সদৰ থানাত এজাহাৰ দিয়া নগাওঁ দেউৰী গাৱঁৰ মহিলাগৰাকীৰ গিৰীয়েকে আওপকীয়াকৈ ঘটনাটোত আপোচৰ পথ গ্ৰহণ কৰিছে।
এটা ভিডিঅ’ত মহিলাগৰাকীৰ গিৰীয়েকে এই ঘটনাটোৰ সত্যতা অস্বীকাৰ নকৰাকৈয়ে গোচৰ দিয়াটোক ভুল হৈছিল বুলি স্বীকাৰ কৰা দেখা গৈছে। তেওঁ কয় যে যোৱা ২ আগষ্টত তেওঁৰ পত্নীয়ে নগাওঁ সদৰ থানাত কেন্দ্ৰীয় ৰে’ল ৰাজ্যিক মন্ত্ৰী ৰাজেন গোহাঁইৰ বিৰুদ্ধে গোচৰ দিয়াৰ পিছত ৬ তাৰিখে আকৌ সেই গোচৰ প্ৰত্যাহাৰ কৰিবলৈও আৱেদন জনায়।
কিন্তু ইতিমধ্যে যিহেতু গোচৰ পঞ্জীয়ন হৈছিল, গতিকে তেওঁলোকে যোৱা ৮ আগষ্টত জিলা দণ্ডাধীশ অভিজিৎ শইকীয়াৰ ওচৰতো গোচৰটো প্ৰত্যাহাৰ কৰিবলৈ আৱেদন জনায়।
গতিকে এই বিষয়টোক লৈ সংবাদ মাধ্যমে অধিক প্ৰচাৰ নকৰিবলৈও তেওঁ আহ্বান জনাইছে।
উল্লেখযোগ্য যে নগাৱঁৰ দেউৰী গাৱঁৰ মহিলাগৰাকীয়ে কেন্দ্ৰীয় মন্ত্ৰীজনে তেওঁক আৰু তেওঁৰ ভনীয়েকক চাকৰি দিয়াৰ প্ৰলোভন দি দীৰ্ঘদিনৰ পৰা ধৰ্ষণ কৰি আহিছে বুলি এজাহাৰত উল্লেখ কৰিছিল। এই এজাহাৰৰ ভিত্তিত নগাওঁ সদৰ থানাই মন্ত্ৰীজনৰ বিৰুদ্ধে এটা গোচৰ ৰুজু কৰিছিল। কথাটো সংবাদ মাধ্যমৰ জৰিয়তে ৰাজহুৱা হোৱাত দিচপুৰৰ পৰা দিল্লীলৈকে ব্যাপক প্ৰতিক্ৰিয়াৰ সৃষ্টি হৈছিল। মন্ত্ৰীজনৰ পদত্যাগৰ দাবীও উঠিছিল।
আনহাতে ছ’চিয়েল মিডিয়াত এটা অডিঅ’ৰ বহুল প্ৰচাৰ হোৱা দেখা গৈছে, যিটোত ৰাজেন গোহাঁই আৰু ধৰ্ষণৰ অভিযোগ অনা মহিলাগৰাকীৰ স্বামীজনৰ মাজৰ কথোপকথন বুলি ধৰিব পাৰি। অডিঅ’টোত মহিলাগৰাকীৰ স্বামীজন আৰু ৰাজেন গোহাঁই, দুয়োজনেই মহিলাগৰাকীৰ লগত মন্ত্ৰী গোহাঁইৰ শাৰীৰিক সম্পৰ্কৰ স্পষ্টকৈ ক্ৰমে অভিযোগ আৰু স্বীকাৰ কৰিছে।
ইয়াৰ পিছতো কেন্দ্ৰীয় মন্ত্ৰী হ’ল বুলিয়েই নিজৰ পত্নীৰ সৈতে শাৰীৰিক সম্পৰ্কক মানি লোৱাটোত আশ্চৰ্য্য প্ৰকাশ কৰিছে একাংশ লোকে। অৱশ্যে কিছুদিন পূৰ্বে তেওঁলোকৰ জীৱনৰ শংকা আহিছে বুলি সংবাদ মাধ্যমৰ আগত প্ৰকাশ কৰিছিল মহিলাগৰাকীৰ গিৰীয়েকে। আনহাতে ইয়াত বৃহৎ অংকৰ ধনৰ লেনদেনৰ সম্ভাৱনাও প্ৰকাশ কৰিছে আন একাংশই।
(Facebook ত পোৱা এটা লিংক তলত দিয়া হ’ল।)
https://www.facebook.com/129036877262273/videos/1149137731918844/
