নাগৰিকৰ জীৱন আৰু সম্পত্তিৰ নিৰাপত্তাৰ দায়িত্বত থকা আৰক্ষীৰ বিৰুদ্ধে দুনীৰ্তি, আইন ভংগ কৰা আদি বিভিন্ন অভিযোগ বিভিন্ন সময়ত উত্থাপন হৈ থকাৰ সময়তে গুৱাহাটী আৰক্ষী আয়ুক্তালয়ৰ অন্তৰ্গত দুখন আৰক্ষী থানাৰ ৮ গৰাকীকৈ আৰক্ষী বিষয়া, কনিষ্টবলে কৰ্তব্যত গাফিলতি আৰু দুৰ্নীতিৰ আশ্ৰয় লৈ চাকৰিৰ পৰা নিলম্বিত হোৱা ঘটনাই আৰক্ষীৰ দায়বদ্ধতাৰ প্ৰতি পুনৰ প্ৰশ্ন উত্থাপন কৰিছে।
উল্লেখযোগ্য যে কিছুদিন পূৰ্বে পল্টনবজাৰ আৰক্ষী থানাৰ এজন আৰক্ষীয়ে ভেটি লোৱাৰ অপৰাধত চাকৰিৰ পৰা নিলম্বিত হোৱাৰ দুদিন পিছতে পানীখাইতী আৰক্ষী থানাৰ পৰা এগৰাকী কয়দীয়ে পলায়ন কৰি হেণ্ডকাপেৰে চিপ লৈ আত্মহত্যা কৰাৰ ঘটনাৰ পিছত থানাখনৰ সাতগৰাকী আৰক্ষীক চাকৰিৰ পৰা নিলম্বন কৰা হৈছিল।
এনে পৰিপ্ৰেক্ষিতত ৰাজ্যিক আৰক্ষী দায়বদ্ধতা আয়োগৰ ভুমিকা লক্ষনীয় হৈ পৰিছে। মানুহৰ নিৰাপত্তাৰ দায়িত্ব থকা আৰক্ষী বিভাগটো স্বচ্ছ আৰু নিকা কৰাৰ বাবে ৰাজ্য চৰকাৰখনে কোনো গুৰুত্ব প্ৰদান কৰা নাই। ৰাজ্য চৰকাৰৰ চৰম গুৰুত্বহীনতাৰ বাবে আয়োগৰ অৱস্থাৰ কোনো উন্নতি হোৱা নাই।
যিসময়ত আয়োগৰ কাম-কাজ চোৱা আৰু পৰিচালনা কৰাৰ বাবে এজন অধ্যক্ষসহ চাৰিজন সদস্য থাকিব লাগে তেনেস্থলত কিন্তু দীৰ্ঘদিন ধৰি আয়োগৰ দুজন সদস্যৰ পদ খালী হৈ পৰি থকাৰ লগতে আয়োগত কৰ্মৰত সচিবৰ পৰা আৰম্ভ কৰি তদন্তকাৰী বিষয়াসহ আন বিষয়া-কৰ্মচাৰীৰ পদসমূহো অস্থায়ী। আনহাতে আয়োগত আৰক্ষীৰ বিৰুদ্ধে উত্থাপিত গোচৰৰ সংখ্যা ক্ৰমাৎ বাঢ়ি আহিছে যদিও তদন্তকাৰী বিষয়া আৰু আন কৰ্মচাৰীৰ সংখ্যা বঢ়া নাই। যাৰ বাবে আয়োগৰ বোজা বাঢ়ি যোৱাৰ লগে লগে আৰক্ষীৰ বিৰুদ্ধে উত্থাপিত গোচৰসমূহ সময়মতে তদন্ত কৰি নিস্পত্তি কৰাত বিলম্ব হয়।
আয়োগৰ পৰা পোৱা তথ্য মতে, আৰক্ষীৰ জিম্মাত মৃত্যু হোৱা, আৰক্ষীয়ে মহিলাৰ শ্লীলতা হানি কৰা, ধৰ্ষণ কৰা, কোনো লোকক অবৈধভাৱে গ্ৰেপ্তাৰ কৰি ৰখা, ভীতিগ্ৰস্ত কৰি ধন আদায় কৰা, এজাহাৰ পঞ্জীয়ন নকৰা আদি আৰক্ষীৰ বিৰুদ্ধে উত্থাপিত গোচৰৰ সংখ্যা ২০১৪ চনত ৭৮ টা, ২০১৫ চনত ৮৪ টা, ২০১৬ চনত ১৮২ টা, ২০১৭ চনত ১৮৩টা আৰু ২০১৮ চনৰ মাৰ্চলৈ ৪৯ টা গোচৰ আয়োগত ৰুজু হৈছে। এই গোচৰবোৰৰ ভিতৰত আৰক্ষীয়ে গোচৰৰ তদন্ত সম্পূৰ্ণ নকৰা, হাৰাশাস্তি কৰা, গোচৰ পঞ্জীয়ন নকৰা, ভীতিগ্ৰস্ত কৰি ধন আদায় কৰা, আইনমতে গ্ৰেপ্তাৰ নকৰা, ভূমি বেদখল সম্পৰ্কীয় গোচৰবোৰে সৰ্বাধিক।
মন কৰিবলগীয়া যে, সততে মেল-মিটিঙে দুনীৰ্তিমুক্ত অসম গঢ়াৰ বচন আওৰাই থকা মুখ্যমন্ত্ৰী সৰ্বানন্দ সোনোৱালৰ দুবছৰীয়া কাৰ্যকালৰ সময়তে আৰক্ষীৰ বিৰুদ্ধে আয়োগত সৰ্বাধিক গোচৰ ৰুজু হৈছে।
আনহাতে, আয়োগৰ সচিব হৰেন্দ্ৰ কুমাৰ দেৱ মহন্তই কয় যে আয়োগক শক্তিশালী কৰা আৰু আয়োগৰ পদবোৰ স্থায়ী কৰাৰ আৱেদন জনাই প্ৰস্তুত কৰা ২০১৫-১৬ চনৰ আয়োগৰ বছৰেকীয়া প্ৰতিবেদন ২০১৬ চনৰ আৰম্ভনিতে তদানীন্তন মুখ্য মন্ত্ৰী তৰুন গগৈক অৰ্পণ কৰা হৈছিল যদিও এই প্ৰতিবেদন বিধানসভাত উত্থাপনে নহ’ল। ইয়াৰ উপৰি ২০১৬-১৭ চনৰ আয়োগৰ বছৰেকীয়া প্ৰতিবেদন ২০১৭ চনত দুৰ্নীতিমুক্ত অসম গঢ়াৰ শ্লোগান আওৰুৱা মুখ্য মন্ত্ৰী সৰ্বানন্দ সোণোৱালক অৰ্পণ কৰা হৈছিল। কিন্তু আক্ষেপৰ কথা যে মুখ্য মন্ত্ৰী সৰ্বানন্দ সোণোৱালেও ইয়াক বিধানসভাত উত্থাপনে নকৰিলে।
আয়োগৰ সচিব মহন্তই লগতে কয়, ‘এইবাৰও আয়োগৰ বছৰেকীয়া প্ৰতিবদেন প্ৰস্তুত কৰা হৈছে। এমাহৰ ভিতৰত ছপা হৈ অহাৰ পিছত পুনৰ এই প্ৰতিবেদন মুখ্য মন্ত্ৰী সৰ্বানন্দ সোণোৱালক অৰ্পণ কৰা হ’ব।’
লক্ষ্যণীয় যে আৰম্ভণীৰ পৰা ভাৰাঘৰত কাম চলাই অহা আয়োগৰ স্থায়ী কাৰ্যালয় স্থাপনৰ বাবে ৰাজ্য চৰকাৰে এতিয়ালৈ ভূমিৰ আবন্টন দিয়া নাই। তদুপৰি যি সময়ত প্ৰধান মন্ত্ৰী নৰেন্দ্ৰ মোদীয়ে ডিজিটেল ইণ্ডিয়াৰ কথা কৈ আছে সেই সময়তে আয়োগৰ এতিয়ালৈ নাই নিজা ৱেবছাইট। এই সৰ্ন্দভত আয়োগৰ সচিব মহন্তক সোধাত তেওঁ কয়, ‘এই সম্পৰ্কত চৰকাৰক সোধক। কি কাম কৰিছে চৰকাৰে ডিজিটেল ইণ্ডিয়া গঢ়াৰ নামত চৰকাৰক সোধক।’ ইয়াৰ দ্বাৰাই স্মাৰ্ট পুলিচিঙৰ কথা কোৱা চৰকাৰখন আৰক্ষী দায়বদ্ধতা আয়োগক শক্তিশালী কৰাৰ ক্ষেত্ৰত যে মুঠেও দায়বদ্ধ নহয় সেই কথা স্পষ্ট ৰূপত ওলাই পৰিছে।
