১৯৫১ চনৰ এন আৰ চি খন উন্নীতকৰণৰ নামত খিলঞ্জীয়া লোকক সংখ্যালঘুত পৰিণত কৰি বিদেশীক অসমৰ স্থায়ী নাগৰিকৰ মৰ্যাদা দিবলৈকেহে ভাৰত চৰকাৰে এক ষড়যন্ত্ৰ ৰচনা কৰিছিল। এই অভিযোগ দেউৰী, তাই খামতি আৰু ঠেঙাল কছাৰী জনগোষ্ঠীৰ নেতৃত্বৰ।
এক যুটীয়া বিবৃতিত দেউৰী সংগ্ৰাম সমিতিৰ সভাপতি জি আৰ প্ৰদীপ দেউৰী, তাই খামতি জাতীয় সন্মিলনৰ সভাপতি ৰজত নামচু’ম গোহাঁই, ঠেঙাল কছাৰী জাতীয় সংগঠনৰ উপদেষ্টা দীননাথ বৰাই এইদৰে গুৰুতৰ অভিযোগ উত্থাপন কৰে।
তেওঁলোকে বিবৃতিটোত কয় যে ভাৰতৰ সংবিধানত ‘শৰণাৰ্থী’ক নাগৰিকত্ব দিয়াৰ কোনো ব্যৱস্থা নাই। অথচ ভাৰত চৰকাৰে ১৯৫১ চনৰপৰা ১৯৭১ চনৰ ভিতৰত হিন্দু বিদেশী লোকক দিয়া ‘শৰণাৰ্থীৰ প্ৰমাণ-পত্ৰ’কো নাগৰিকপঞ্জীত নাম অন্তৰ্ভুক্ত কৰাৰ নথিৰূপে লোৱাৰ ব্যৱস্থা কৰি ‘শৰণাৰ্থী’ৰ নাম সুকলমে এন আৰ চিত সুমুৱাইছে।
জনগোষ্ঠীয় সংগঠনকেইটাই দেশৰ ধৰ্মনিৰপেক্ষ সংবিধানৰ মূল কাঠামোত আঘাত কৰি চৰকাৰে সাম্প্ৰদায়িক দৃষ্টিৰে পক্ষপাতমূলকভাৱে হিন্দু বিদেশীৰ নাম নাগৰিকপঞ্জীত ভৰোৱা কাৰ্যৰ তীব্ৰ বিৰোধিতা কৰে। তদুপৰি ভাৰত চৰকাৰৰ এই সাম্প্ৰদায়িক কাৰ্যত আছুৱে কৰা সহযোগিতাকো তেওঁলোকে জাতিদ্ৰোহী আখ্যা দিয়ে।
অসমত খিলঞ্জীয়া মুছলমান আৰু জনগোষ্ঠীসমূহৰ মাজত কোনো বিভেদ নাই বুলি বিবৃতিটোত স্পষ্ট কৰি দি ভাৰত চৰকাৰ, আছু আদিৰ সাম্প্ৰদায়িক কাৰ্যকলাপৰ বাবেই মুছলমান বিশ্বত অসমৰ বিৰুদ্ধে সাম্প্ৰদায়িকতাৰ অভিযোগ আনি বদনাম দিবলৈ বিদেশী বাঙালী মুছলমানে দুঃসাহস কৰিছে বুলি দেউৰী, গোহাঁই, বড়াই লগতে কয়।
আনহাতে, ছুপ্ৰিম ক’ৰ্টৰ পাঁচজনীয়া সংবিধানিক বিচাৰপীঠে মহাসংঘৰ মতিউৰ ৰহমানৰ ৫৬২/২০১২ নং গোচৰৰ ক্ষেত্ৰত ভিত্তি বছৰ চূড়ান্ত নকৰাকৈ দুজনীয়া বিচাৰপীঠৰ দ্বাৰা ১৯৭১ৰ ভিত্তিত নাগৰিকপঞ্জী উন্নীত কৰি অবৈধ বিদেশীক স্বদেশী কৰা কাৰ্য ভাৰতীয় ন্যায় ব্যৱস্থাৰ চূড়ান্ত প্ৰহসন বুলি অভিহিত কৰিছে সংগঠন তিনিটাৰ নেতৃত্বই।
বিবৃতিটোত লগতে তেওঁলোকে মহাসংঘই যোৱা ৯ আগষ্টত ৰাষ্ট্ৰসংঘৰ সচিবপ্ৰধান এণ্টনিঅ’ গুটেৰেচক ভাৰত চৰকাৰৰ সাম্প্ৰদায়িক নীতি সম্পৰ্কে তথা খিলঞ্জীয়াৰ বিৰুদ্ধে ভাৰত চৰকাৰে লোৱা ব্যৱস্থা সম্পৰ্কে জনোৱাটো উচিত পদক্ষেপ হৈছে বুলি মন্তব্য কৰে।
