যোৱা ২০ আগষ্টৰ পৰা অনিৰ্দিষ্টকালীন অনশন প্ৰতিবাদ কাৰ্য্যসূচী চলাই থকা চানমাৰিস্থিত ৰেড ক্ৰছ হস্পিটেলৰ ২০জন নিলম্বিত কৰ্মচাৰীৰ কাষত আজি উপস্থিত হয় কামৰূপ মহানগৰৰ অতিৰিক্ত উপায়ুক্ত প্ৰশান্তপ্ৰতিম কাঠকটীয়া।
অতিৰিক্ত উপায়ুক্তজনে প্ৰতিবাদত বহি থকা ভুক্তভোগী কৰ্মচাৰীসকলক পানীৰ খাবলৈ দি এই অনশন ভংগ কৰোৱায়। প্ৰতিবাদকাৰী কৰ্মচাৰীসকলৰ দ্বাৰা গঠিত ৰেড ক্ৰছ ডিচাৰ্জড এমপ্লয়ী য়ুনিয়নৰ সাধাৰণ সম্পাদক ফটিক দাসে জনোৱা মতে অতিৰিক্ত উপায়ুক্তজনে সমস্যাটো সন্দৰ্ভত উপযুক্ত আৰু তৎকালীন ব্যৱস্থা লোৱাৰ আশ্বাস দিয়ে। অতিৰিক্ত উপায়ুক্তজনে তেওঁলোকক জনোৱামতে, ইতিমধ্যে ইয়াৰ বাবে কামৰূপ মহানগৰ জিলাৰ উপায়ুক্ত বীৰন্দ্ৰ মিট্টালৰ নেতৃত্বত এখন তদন্ত কমিটী গঠন কৰা হৈছে আৰু অহা ২৭ আগষ্টৰ পৰা এই তদন্তৰ কাম আৰম্ভ হ’ব।
আজি অতিৰিক্ত উপায়ুক্তজনৰ হাতত প্ৰতিবাদকাৰীসকলে বিভিন্ন দাবীসম্বলিত এখন স্মাৰকপত্ৰ প্ৰদান কৰে।
আনহাতে ফটিক দাসে জনায় যে যদিহে অতিৰিক্ত উপায়ুক্তজনে দিয়া প্ৰতিশ্ৰুতিমতে তেওঁলোকৰ সমস্যাটো গুৰুত্বসহকাৰে চৰকাৰে নলয়, তেন্তে তেওঁলোকে পুনৰ আন্দোলনত বহিব।
উল্লেখযোগ্য যে গুৱাহাটীৰ চানমাৰিস্থিত ৰেড ক্ৰছ হস্পিটেল মেনেজেমেণ্ট ছ’চাইটিয়ে যোৱা ২০০৮ চনতে হস্পিটেলখনৰ ২০গৰাকী কৰ্মচাৰীক চাকৰিৰ পৰা বৰ্খাস্ত কৰিছিল।
ৰেড ক্ৰছ ডিচাৰ্জড এমপ্লয়ী য়ুনিয়নৰ সাধাৰণ সম্পাদক ফটিক দাসে জনোৱা মতে, ছ’চাইটিৰ তেতিয়াৰ সাধাৰণ সম্পাদিকাৰ স্বৈৰাচাৰিতা আৰু দুৰ্নীতিৰ বিৰুদ্ধে প্ৰতিবাদ কৰা বাবেই এই ২০জন কৰ্মচাৰীক বৰ্খাস্ত কৰা হৈছিল। বৰ্খাস্ত কৰাৰ পিছতো তেতিয়াৰ পৰাই এই কৰ্মচাৰীসকলে তাত কাম কৰি আহিছে, কিন্তু তেওঁলোকে দৰমহা নাপায়। ফটিক দাসে কয় যে এই বৰ্খাস্তকৰণ সম্পূৰ্ণ অবৈধ আছিল।
আনহাতে ৰেড ক্ৰছ ডিচাৰ্জড এমপ্লয়ী য়ুনিয়নে অভিযোগ আনিছে যে ৰেড ক্ৰছ হস্পিটেল মেনেজেমেণ্ট ছ’চাইটিৰ বৰ্তমানৰ সাধাৰণ সম্পাদক দিগন্ত বুজৰবৰুৱাও দুৰ্নীতিত জড়িত।
