কেৰালাৰ বানত আৱদ্ধ হৈ পৰা প্ৰায় ১,৬০০ গৰাকী যাত্ৰী ত্ৰিবান্দ্ৰমৰ পৰা এখন বিশেষ ৰে’ল যোগে বৃহস্পতিবাৰে আহি গুৱাহাটী ৰে’ল ষ্টেশ্যনত উপস্থিত হয়।
এই যাত্ৰীসকলৰ মাজৰে বৰপেটাৰ এগৰাকী বাসিন্দা মজিবুল আলীয়ে অভিযোগ কৰে যে যদিও অসম চৰকাৰে কেৰালাৰ পৰা উভতি আহিবলগীয়া অসমৰ যাত্ৰীসকলক সকলোধৰণৰ সহায় আগবঢ়োৱাৰ কথা ঘোষণা কৰিছিল, তেওঁলোকে কিন্তু (মজিবুল আৰু বন্ধুসকলে) কোনো ধৰণৰ সহায় লাভ কৰা নাই।
‘’ আমি নিজৰ পইচাৰে টিকট কাটি আহিছো আৰু যিসকল যাত্ৰীয়ে বিনা টিকটে ভ্ৰমণ কৰিছে তেওঁলোকৰ পৰা টিটিইয়ে ১২০০ টকাকৈ ভাড়া আদায় কৰিছে,’’-মজিবুলে ব্যক্ত কৰে।
মজিবুলে লগতে প্ৰকাশ কৰে, ‘’ আমি জনা নাছিলো যে আমি ভ্ৰমণ কৰা ৰে’লখন ৰাজ্যখনত আক্ৰান্ত লোকসকল আনিবলৈ অসম চৰকাৰে বিশেষভাৱে প্ৰেৰণ কৰিছিল। আমি মুৰ্খৰ দৰে টিকট কৰিছিলো আৰু আনকি টিটিইয়ে টিকটবিহীন যাত্ৰীৰ পৰা জৰিমনা লৈছিল।‘’
কেৰালাৰ ভয়ংকৰ বানৰ সুঁৱৰি তেওঁ কয়, ‘’ এয়া আছিল এক শ্বাসৰুদ্ধকৰ অবিজ্ঞতা। আমি (মজিবুল আৰু তেওঁৰ বন্ধুসকল) আমাৰ কোঠা পানীৰে ভৰি পৰা দেখিছিলো। আমি সেই ভয়ংকৰ পৰিস্থিতিৰ পৰা কোনোমতে ওলাই আহিবলৈ সক্ষম হৈছিলো। মই নিশ্চিত আছিলো যে আমাৰ জলমগ্ন কোঠালিতে আমি আবদ্ধ হৈ পৰিম। আমি কেতিয়াও কেৰালালৈ উভতি নাযাও।‘’
মজিবুলে কয় যে তেওঁ তেওঁৰ বন্ধুসকলৰ সৈতে যোৱা ১৯ আগষ্টত গুৱাহাটীলৈ যাত্ৰা কৰাৰ আগতে এৰনাকুলম ৰে’ল ষ্টেশ্যনত দুটি নিশা অনাহাৰে কটাইছিলো। ‘’ আমি গোটেই যাত্ৰাকালত কোনো বিনামূলীয়া খাদ্য বা কোনো সাহায্য সামগ্ৰী লাভ কৰা নাই,’’-তেওঁ মন্তৱ্য কৰে।
নলবাৰী জিলাৰ চামতাৰ এগৰাকী বাসিন্দা ইলিয়াছ আলীয়ে কয় যে ‘’ ৰে’ল ষ্টেশ্যনত লোকসকলে কেইদিন ধৰি নোখোৱাকৈয়ে আছিল।‘’
আনহাতে, চেন্টাৰ অফ ট্ৰেড ইউনিয়নছ (চিটু)এ কেৰালাৰ পৰা আহি বৃহস্পতিবাৰে ৪ বজাত গুৱাহাটী ৰে’ল ষ্টেশ্যনত উপস্থিত হোৱা লোকসকলৰ মাজত বিস্কুট, কল আৰু খোৱা পানীৰ বটল বিতৰণ কৰিছিল।
অৱশ্যে, অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই কেৰালাত আবদ্ধ হৈ থকা অসমৰ লোকসকলৰ বাবে- ০৩৬১-২২৩৭২১৯,০৩৬১-২২৩৭৪৬০ আৰু ৯৪০১০৪৪৬১৭ হেল্পলাইন নম্বৰ মুকলি কৰিছে।
