বিভিন্ন চৰকাৰী আঁচনিৰ বিষয়ে অৱগত হোৱা তসেই সমূহৰ পৰা লাভান্বিত হ’বলৈ এটা গণ সচেতনতাৰ সৃষ্টি কৰাৰ বাবে দেৱৰগাঁও উচ্চতৰ মাধ্যমিক বিদ্যালয়ত এটা এদিনীয়া আইন সেৱা শিবিৰৰ আয়োজন কৰা হৈছে। এই শিবিৰটো ২৬ আগষ্ট দেওবাৰে অনুষ্ঠিত কৰা হ’ব।
কোকৰাঝাৰ জিলা আইন সেৱা প্ৰাধিকৰণৰ সহযোগিতাত অসম ৰাজ্যিক আইন সেৱা প্ৰাধিকৰণে এই শিবিৰটোৰ আয়োজন কৰিছে। আইন সেৱা শিবিৰত উপস্থিত থাকিব অসম ৰাজ্যিক আইন সেৱা প্ৰাধিকৰণৰ কাৰ্যবাহী অধ্যক্ষ একে গোস্বামী, গুৱাহাটী উচ্চ ন্যায়ালয়ৰ ন্যয়াধীশ এ বুজৰবৰুৱা আৰু বিটিচিৰ মুখ্য কাৰ্যবাহী বিষয়া হাগ্ৰামা মহিলাৰীয়ে।
কোকৰাঝাৰ জিলা আইন সেৱা প্ৰাধিকৰণৰ সচিব ৰত্নদীপ ভট্টাচাৰ্যই সাংবাদিকক জনোৱা মতে দুখীয়াসকলক সুবিধা প্ৰদান কৰাৰ বাবে চৰকাৰী বিভাগসমূহক একোটা স্থানত গোট খুওৱাৰ বাবে এই আইন সেৱা শিবিৰৰ আয়োজন কৰা হৈছে। তেওঁ আৰু কয় যে আইন সেৱা সন্দৰ্ভত জ্ঞান নথকা বাবে দুখীয়া লোকসকল আইনী অধিকাৰৰ পৰা বঞ্চিত হৈ আহিছে। এই শিবিৰে জনসাধাৰণক আইনী সেৱা আৰু চৰকাৰী সুবিধা লাভ কৰাত সহায় কৰিব।
অসম ৰাজ্যিক আইন সেৱা প্ৰাধিকৰণৰ উপ সচিব গীতালী ৰাভাই কৈছে যে এই আইন সেৱা শিবিৰটো ৰাজ্যখনৰ এনেধৰণৰ পঞ্চমটো শিবিৰ। পূৰ্বে শিলচৰ, ডিব্ৰুগড়, ধেমাজি আৰু বঙাইগাঁৱত এনে শিবিৰৰ আয়োজন কৰা হৈ গৈছে বুলি তেওঁ জনায়।
তেওঁ আৰু কৈছে যে জিলাখনৰ বিভিন্ন স্থানৰ পৰা অহা লোকসকলৰ বাবে পৰিবহণৰ ব্যৱস্থা কৰা হৈছে। ইয়ে দুখীয়া লোকসকলক উপকৃত কৰিব। ভট্টাচাৰ্য আৰু ৰাভাই জনসাধাৰণক এই আইন সেৱা শিবিৰৰ পূৰ্ণ সুযোগ গ্ৰহণ কৰি উপকৃত হোৱাৰ বাবে আহ্বান জনায়।
