অজি শিৱসাগৰ চহৰৰ সমীপৰ ১ নং চাউলকৰা গাঁৱৰ শাস্ত্ৰীজী খেলপথাৰত আজি ঐক্য সেনা অসমৰ যোগদান সমাৰোহ অনুষ্ঠিত হয়। উজনি অসমৰ আটাইকেইখন জিলাৰ প্ৰায় ৮ সহস্ৰাধীক যুৱক-যুৱতীয়ে বিশিষ্ট যুৱনেতা ফৰিদ ইছলাম হাজৰীকাৰ নেতৃত্বত ঐক্য সেনা অসমত যোগদান কৰে।
পুৱা পতাকা উত্তোলন, বৃক্ষ ৰোপণ, বন্তি প্ৰজ্বলন আৰু সাংস্কৃতিক কাৰ্যসূচীৰে আৰম্ভ হোৱা এই যোগদান অনুষ্ঠানত উপস্থিত থাকে গুৱাহাটী উচ্চ ন্যায়ালয়ৰ জেষ্ঠ অধিবক্তা নেকিবুৰ জামান, খোৱাং মহাবিদ্যালয়ৰ অধ্যাপিকা ড০ চাজমিনা আখতাৰ, বিশিষ্ট লেখক জিতেন্দ্ৰ নাথ শৰ্ম্মা, জ্যেষ্ঠ সাংবাদিক গিৰিন্দ্ৰ শইকীয়া, ঐক্য সেনা অসমৰ কেন্দ্ৰীয় সভাপতি সঞ্জীৱ মহন্ত, কাৰ্য্যকৰি সভাপতি দেৱজ্যোতি শৰ্ম্মা, মূখ্য সম্পাদক শ্বহিদুল ইছলাম, কমল কুমাৰকে ধৰি বহুটো গণ্য-মাণ্য ব্যক্তি।
সঞ্জীৱ মহন্তৰ সভাপতিত্বত অনুষ্ঠিত হোৱা যোগদান সমাৰোহত নেকিবুৰ জামানে কয় যে, ঐক্য সেনা অসম নামৰ সংগঠনটো অসমৰ জাতীয় জীৱনৰ লগত আৰু জাতীয় সমস্যাৰ লগত ওতঃপ্ৰোতভাৱে জড়িত থাকিবলৈ প্ৰতিশ্ৰুতিবদ্ধ। অসমৰ বহু সংগঠনৰ দৰে কোনো ৰাজনৈতিক প্ৰভাৱ যাতে এই সংগঠনত নপৰে তাৰ ওপৰত চোকা দৃষ্টি ৰাখিবলৈ অনুৰোধ জনায় নেতৃত্ববৃন্দক। তেওঁ কয় অসমীয়া এটা জাতি ই ধৰ্ম নহয়। অসমৰ সকলো জাতি জনগোষ্ঠীক একত্ৰিত কৰি জাতিটোৰ উন্নতিৰ বাবে আগবাঢ়িব যাবলৈ এই মঞৰ পৰাই তেওঁ সংগঠনটোক আহ্বান জনায়।
অসমৰ সকলো জাতি জনগোষ্ঠীৰ সমবিকাশৰ পৰিবেশ গঠন কৰা, অসমৰ বান আৰু গৰাখহনীয়া সমস্যাক ৰাষ্ট্ৰীয় সমস্যা হিচাপে চৰকাৰে ঘোষনা কৰা, নিবনুৱা সমস্যা সমাধানৰ বাবে চৰকাৰক সৈমান কৰোৱা, উচ্চতৰ মাধ্যমিকলৈ শিক্ষা ব্যৱস্থা বিনামূলীয়া কৰাৰ দাবী জনোৱা, চাহ মজদুৰ সকলৰ মজুৰি বৃদ্ধিৰ দাবী, সংখ্যালঘুৰ উন্নয়নৰ বাবে ৱাৰ্কাফ বৰ্ডৰ সম্পতি বেদখল মুক্ত কৰাৰ দাবীক মূল উদ্দেশ্য হিচাপে লৈ গঠিত হৈছে ঐক্য সেনা অসম নামৰ সংগঠনটোৰ।
অসমত বহু পূৰ্বে এই সংগঠনটোৰ জন্ম হৈছে যদিও শিৱসাগৰত ইয়াৰ প্ৰভাৱ নাছিল। কিন্তু আজি ফৰিদ ইছলাম হাজৰীকাৰ নেতৃত্বত ৮ সহস্ৰাধিক যুৱক যুৱতীয়ে যোগদান কৰাত উজনি অসমত সংগঠনটোৱে এক গতি লাভ কৰিলে আৰু এক শক্তিশালী সংগঠন হিচাপে অসমত অতি সোনকালে প্ৰতিষ্ঠা লাভ কৰিব পাৰিব বুলি মন্তব্য কৰে সভাত উপস্থিত সকলে।
উল্লেখযোগ্য যে কিছুদিন পূৰ্বে ফৰিদ ইছলাম হাজৰীকাৰ নেতৃত্বত সমগ্ৰ শিৱসাগৰ জিলাৰ কেইবা সহস্ৰাধিক নেতা কৰ্মীয়ে আমছুৰ পৰা পদত্যাগ কৰিছিল। শিৱসাগৰত প্ৰথম অৱস্থাত প্ৰভাৱ নথকা আমছুৱে ফৰিদ ইছলাম হাজৰীকাৰ সবল নেতৃত্বত কম সময়তে এক শক্তিশালী সংগঠন হিচাপে প্ৰতিষ্ঠা লাভ কৰিবলৈ সক্ষম হৈছিল। কিন্তু কেন্দ্ৰীয় নেতৃত্বৰ পদবীক লৈ আৰম্ভ হোৱা খোৱা কামোৰা ৰাজনীতিৰ বাবে এইজন নেতাই আমছু ত্যাগ কৰি এতিয়া ঐক্য সেনা অসমত যোগদান কৰিছে। আজিৰ সভাত ফৰিদ ইছলাম হাজৰীকাক ঐক্য সেনা অসম ৰ সাধাৰণ সম্পাদকৰ দায়িত্ব দিয়াৰ লগতে বাবলু বেনেটক শিৱসাগৰ জিলাৰ মুখ্য সম্পাদক হিচাপে নিযুক্তি দিয়া হয়।