বিদেশী চিনাক্তকৰণ আৰু বহিষ্কৰণৰ বাবে মহামান্য উচ্চতম ন্যায়ালয়ৰ নিৰ্দেশনা আৰু প্ৰত্যক্ষ তত্বাৱধানত ৰাষ্ট্ৰীয় নাগৰিকপঞ্জী চমুকৈ এন আৰ চি প্রস্তুতকৰণৰ কাম চলি থকাৰ সময়তে ন্যায়ালয়ৰ নিৰ্দেশনাক অমান্য কৰি বিভিন্ন সংখ্যালঘু লোকক ডি ভোটাৰ সজাই অমানৱীয় বাবে হাৰাশাস্তি কৰাৰ অভিযোগ উত্থাপন কৰিছে আমছুৱে।
এক প্ৰেছ বিজ্ঞপ্তিত আমছুৱে স্পষ্ট ৰূপত উল্লেখ কৰি কয় যে ১৯৯৭ চনৰ ভোটাৰ তালিকাত ডি ভোটাৰ হিচাপে চিহ্নিত নোহোৱা লাখ লাখ ধৰ্মীয় আৰু ভাষিক সংখ্যালঘু লোকৰ বিৰুদ্ধে অসম আৰক্ষীৰ সীমান্ত বাহিনীয়ে ডি-ভোটাৰ তথা সন্দেহজনক নাগৰিকৰ নামত মিছা গোচৰ ৰুজু কৰি বিদেশী ন্যায়াধীকৰণে নির্বিচাৰে জাননী প্রেৰণ কৰি সেই সকল ভাৰতীয় লোকৰ নাম এন আৰ চিৰ পৰা বাদ পেলোৱাৰ ষড়যন্ত্ৰত লিপ্ত হৈছে।
তেওঁলোকে আৰু কয় যে ৭/৮ বছৰীয়া ল’ৰা-ছোৱালীকো সীমান্ত বাহিনীয়ে ডি ভোটাৰৰ জাননী প্রেৰণ কৰিছে। এই ক্ষেত্ৰত গৃহবিভাগৰ দায়িত্বত থকা অসমৰ মুখ্য মন্ত্ৰীয়ে গ্ৰহণ কৰা নিৰৱতা অৱলম্বনৰ প্ৰতিবাদত যোৱা ইং ২৩ জুলাই, ২০১৮ ইং তাৰিখে সমগ্ৰ অসমতে জিলা আৰু মহকুমা সদৰ ঠাইত অসম চৰকাৰৰ গৃহ বিভাগৰ দায়িত্বত থকা মুখ্য মন্ত্ৰী সৰ্বানন্দ সোনোৱালৰ প্রতিমূর্তি দাহ কাৰ্যসূচী ৰূপায়ন কৰা হৈছিল।
এই কাৰ্যসূচী আমাৰ বিজনী জিলা সমিতি আমছুৱে বিজনীত গণতান্ত্ৰিক পদ্ধতিত ৰূপায়ন কৰাৰ পিছত বিজনী থানাৰ ভাৰপ্ৰাপ্ত আৰক্ষী বিষয়া শৈলেন দেউৰীয়ে নিজাববীয়াকৈ আমছুৰ জিলা সমিতিৰ সভাপতি আবুল কালাম আজাদ, উপ সভাপতি ৰছুল খান, জিয়াউল ৰহমান সাধাৰণ সম্পাদক জাহেদ আলী, সহঃ সম্পাদক ইনামুল হক, প্ৰচাৰ সম্পাদক আব্দুল জলিলৰ নামত আক্ৰোশমূলকভাৱে গোচৰ তৰে।
আৰক্ষী বিষয়াগৰাকীৰ এনে মইমতালি কাৰ্যক আমছুৱে প্ৰেছ বিক্ষপ্তিখনৰ জৰিয়তে তীব্ৰ ভাষাৰে গৰিহণা দিয়ে। প্ৰশাসনে নিজৰ দুৰ্বলতা ঢাকিবলৈ গৈ আমাৰ সাংবিধানিক অধিকাৰ খৰ্ব কৰি গণতান্ত্ৰিক সংগ্ৰাম স্থবিৰ কৰাৰ যি অপচেষ্টা চলাইছে সেয়া আমছুয়ে কোনো কাৰণতে মানি ল’ব পৰা নাই।
সমগ্ৰ অসমত একে সময়তে উক্ত কাৰ্যসূচী ৰূপায়িত হৈছে কিন্তু এই কাৰ্যসূচীকলৈ কোনো থানাতে গোচৰ নকৰি একমাত্ৰ বিজনী থানাৰ ভাৰপ্ৰাপ্ত আৰক্ষী বিষয়াজনে গোচৰ তৰাত আমছু হতভম্ভ হৈছে বুলিও উল্লেখ কৰে।
আৰক্ষী বিষয়া জনে পূৰ্বতেও সাংবাদিকক ৰাজহুৱা স্থানত দুৰ্ব্যৱহাৰ কৰি ক্ষমতাৰ অপব্যৱহাৰ কৰা উদাহৰণ আছে। ইয়াৰ পৰা প্ৰমাণ হয় যে বিষয়াজনে নিজৰ ইচ্ছা অনুযায়ী আইন-কানুন ব্যৱহাৰ কৰি নিজকে তথাকথিত দক্ষ বিষয়া হিচাপে প্ৰতিষ্ঠিত কৰিব বিচাৰিছে।
সংগঠনটোৱে বিজ্ঞপ্তিৰ জৰিয়তে উক্ত আৰক্ষী বিষয়াৰ মইমতালি অতি শীঘ্ৰে নাকি লগাবলৈ ৰাজ্যৰ ডিজিপিক আহ্বান জনায়। অন্যথা এই কাৰ্যৰ বিৰুদ্ধে গণতান্ত্ৰিক আন্দোলন গঢ়ি তুলিবলৈ আমছু বাধ্য হ’ব।
সংখ্যালঘু ৰাইজৰ অধিকাৰ কোনোবাই খৰ্ব কৰিব আৰু আমছুয়ে হাত সাবটি বহি থাকিব সেইটো কোনোপধ্যেই হ’ব নোৱাৰে। অনাগত দিনত সংখ্যালঘু ৰাইজৰ স্বাৰ্থত গণতান্ত্ৰিক সংগ্ৰাম বিগত দিনতকৈ তিনিগুন বৃদ্ধি পাব বুলিহে এই বিবৃতিৰ জৰিয়তে আমছুৱে ষ্পষ্ট কৰি দিয়ে।
