দুৰ্নীতিৰ লগতে প্ৰৱঞ্চনা, জালিয়াতি, অপহৰণ, হত্যাকে ধৰি বিভিন্ন অপৰাধৰ গোচৰত অভিযুক্ত পাঁচজন এ চি এছ, এ পি এছ আৰু এজন শীৰ্ষ কৰ বিষয়াসহ ১৫জন চৰকাৰী বিষয়াৰ বিৰুদ্ধে আৰক্ষী তথা তদন্তকাৰী সংস্থাই শীঘ্ৰেই অভিযোগনামা দাখিল কৰিব।
জানিব পৰা মতে ১১টা গোচৰত অভিযুক্ত এই বিষয়াসকলৰ বিৰুদ্ধে গৃহ বিভাগে অভিযোগনামা দাখিল তথা মোকৰ্দমা চলাবলৈ তদন্তকাৰী সংস্থাক যাৱতীয় অনুমতি দিয়াৰ প্ৰক্ৰিয়া প্ৰায় সম্পূৰ্ণ কৰিছে।
২০১৩ৰ পৰা ২০১৭ চনৰ ভিতৰত ৰাজ্যৰ বিভিন্ন জিলাত ৰুজু হোৱা এই ১১টা গোচৰৰ অভিযুক্তৰ তালিকাত আছে চাৰিজন অতিৰিক্ত উপাযুক্ত (এ চি এছ), এজন চক্ৰ বিষয়া (এ চি এছ), এজন অতিৰিক্ত আৰক্ষী অধীক্ষক (এ চি এছ), এজন অতিৰিক্ত কৰ আয়ুক্তসহ তিনিজন কৰ বিষয়া, অভিযন্তা, গাণনিক বিষয়া, গ্ৰামসেৱক আদি।
চৰকাৰী কৰ্মচাৰীৰদ্বাৰা ভেটী গ্ৰহণ, প্ৰৱঞ্চনা, জালিয়াতি, ফৌজদাৰী ষড়যন্ত্ৰ, জাল নথি-পত্ৰৰে কাৰোবাৰ বিৰুদ্ধে গোচৰ জপা, বিশ্বাস ভংগ, সম্পত্তিক তথ্য গোপন কৰা, ভূমি বেদখল, অপহৰণ, হত্যা, সাক্ষ্যৰ হৰলুকি আদি বিভিন্ন অভিযোগত এই গোচৰসমূহ ৰুজু কৰা হৈছিল।
ৰাজ্যখনৰ বিভিন্ন থানা আৰু চি আই ডিত ৰুজু হৈ থকা ১১টা গোচৰত অভিযোগনামা দাখিল আৰু মোকৰ্দমাৰ অনুমতি বিচাৰি সংশ্লিষ্ট তদন্তকাৰী বিষয়াই যোৱা জুন আৰু জুলাই মাহত গৃহ বিভাগলৈ পত্ৰ প্ৰেৰণ কৰিছিল বুলি এক সূত্ৰই জানিব দিয়ে।
চি আই ডিৰ গোচৰ ক্ৰমে ২৪/২০১৬,৫৪/ ২০১৫, ১৫/২০০৬ আৰু ৮৩/২০১২ৰ লগতে যোৰহাট থানাৰ ৮৭৫/২০১৫, বাঘবৰ থানাৰ ১১/২০১০, দৈয়াংমুখ থানাৰ ৪/২০০৯, শিৱসাগৰ থানাৰ ৩৩১/২০১৭, পেঙেৰী থানাৰ ৪৮/২০০৩ আৰু হাফলং থানাৰ ৪৬/২০০৯ নং গোচৰত অভিযোগনামা দাখিল কৰা মোকৰ্দমা চলোৱাৰ অনুমতি বিচাৰিছে।
আনহাতে, চাৰিলেনৰ ৰাষ্ট্ৰীয় ঘাইপথ নিৰ্মাণৰ নামত অধিগ্ৰহণ কৰা ভূমিৰ বিপৰীতে দিয়া ক্ষতিপূৰণৰ নামত হোৱা বহুকোটি টকীয়া কেলেংকাৰিৰ চি আই ডিত ৰুজু হোৱা গোচৰো ইয়াত আছে।
