২০১৭ বৰ্ষৰ ৰাষ্ট্ৰীয় শিক্ষক বঁটাৰ বাবে নিৰ্বাচিত হৈছে দহি উচ্চতৰ মাধ্যমিক বিদ্যালয়ৰ বিজ্ঞান শিক্ষক তথা মঙলদৈৰ পুনীয়া-পাকাবাংগীপাৰা গাঁৱৰ নিবাসী শশাংক হাজৰিকা। ৰাষ্ট্ৰীয় বঁটাৰ বাবে নিৰ্বাচিত হোৱা শশাংকই হৈছে এইবছৰৰ আটাইতকৈ কনিষ্ঠতম শিক্ষক। তেওঁ ২০১৪ চনৰ পৰাই দহি উচ্চতৰ মাধ্যমিক বিদ্যালয়ত শিক্ষকতা কৰি আহিছে।
অসমৰ শশাংক হাজৰিকাৰ লগতে দেশৰ অন্য প্ৰান্তৰ ৪৪ গৰাকী শিক্ষকক ২০১৭ বৰ্ষৰ ৰাষ্ট্ৰীয় শিক্ষক বঁটাৰ বাবে নিৰ্বাচিত কৰা হৈছে। উল্লেখ্য যে কেন্দ্ৰীয় চৰকাৰৰ মানৱ সম্পদ উন্নয়ন মন্ত্ৰনালয়ৰ শিক্ষা আৰু সাক্ষৰতা বিভাগৰ সঞ্চালক জি বিজয়া ভাস্কৰে এক পত্ৰযোগে শশাংক হাজৰিকাই এই বঁটাৰ বাবে নিৰ্বাচিত হোৱা বুলি জানিবলৈ দিয়ে।
শিক্ষক দিৱস উপলক্ষে অহা পাঁচ ছেপ্তেম্বৰত নতুন দিল্লীৰ বিজ্ঞান ভৱনত এক অনুষ্ঠানৰ মাজেৰে ভাৰতৰ উপৰাষ্ট্ৰপতি এম ভেংকায়া নাইডুৱে এই বঁটা প্ৰদান কৰিব। এই বঁটাৰ লগত এখন মানপত্ৰ, এটা ৰূপৰ পদক আৰু নগদ ৫০ হেজাৰ টকা প্ৰদান কৰা হ’ব।
‘এই বঁটাৰ বাবে নিৰ্বাচিত কৰাক লৈ মই যথেষ্ট সুখী আৰু গৌৰৱান্বিত’। এইদৰে নৰ্থ-ইষ্ট নাওৰ আগত মনৰ ভাৱ প্ৰকাশ কৰে ৰাষ্ট্ৰীয় শিক্ষক বঁটাৰ বাবে নিৰ্বাচিত হোৱা দহি উচ্চতৰ মাধ্যমিক বিদ্যালয়ৰ সহকাৰী শিক্ষক শশাংক হাজৰিকাই।
উল্লেখযোগ্য যে শশাংক হাজৰিকাই গুৱাহাটী বিশ্ববিদ্যালয়ৰ অধীনত বিজ্ঞানৰ স্নাতক ডিগ্ৰী লোৱাৰ পাছত তেওঁ ছিকিম মণিপাল য়ুনিভাৰ্ছিটিৰ পৰা স্নাতকোত্তৰ ডিগ্ৰী গ্ৰহণ কৰে। দহি উচ্চতৰ মাধ্যমিক বিদ্যালয়ত স্থায়ীভাৱে নিযুক্তি পোৱাৰ আগতে তেওঁ বিভিন্ন প্ৰতিষ্ঠানত শিক্ষকতা কৰিছিল।
অসমৰ পৰা এই বঁটাৰ বাবে নিৰ্বাচিত হোৱা শশাংক হাজৰিকাক শিক্ষক সন্থা, সদৌ অসম উচ্চতৰ মাধ্যমিক স্নাতক শিক্ষক সন্থাৰ দৰং জিলা সমিতিৰ লগতে বিভিন্ন দল-সংগঠনে শনিবাৰে মঙলদৈৰ য়ুথ ক্লাবত ৰাজহুৱাভাৱে শুভেচ্ছা আৰু সম্বৰ্ধনা জ্ঞাপন কৰে।
