সমগ্ৰ ৰাজ্যৰ লগতে শিৱসাগৰ জিলাৰ ডিমৌতো আজি ডিমৌ হেণ্ডবল ক্লাবৰ উদ্যোগত ডিমৌ ৰাজহুৱা খেলপথাৰত ৩৫ সংখ্যক অভিৰুচি ক্ৰীড়া দিৱস উদযাপন কৰা হয়।
অসম গৌৰৱ তথা প্ৰথমগৰাকী অৰ্জুন বঁটা বিজয়ী অসমীয়া ভোগেশ্বৰ বৰুৱাৰ জন্ম দিৱসৰ লগত সংগতি ৰাখি পালন কৰা ৩৫ সংখ্যক অভিৰুচি ক্ৰীড়া দিৱস উপলক্ষে পুৱা প্ৰায় ৭ বজাত ডিমৌ থানাৰ ভাৰপ্ৰাপ্ত আৰক্ষী বিষয়া সঞ্জীৱ কুমাৰ বৰুৱাই ফ্লেগ অফ কৰাৰ লগে লগে ডিমৌৰ পৰা নিতাইপুখুৰীলৈকে আৰম্ভ হয় সমূহীয়া দৌৰ। সমূহীয়া দৌৰত ডিমৌৰ বিভিন্ন সংগঠনৰ লগতে ডিমৌৰ ক্ৰীড়াপ্ৰেমী ৰাইজে অংশগ্ৰহণ কৰে।
ইয়াৰ পিছতেই ডিমৌৰ বিশিষ্ট ক্ৰীড়া সংগঠক দিলীপ গগৈয়ে অভিৰুচি ক্ৰীড়া দিৱসৰ পতাকা উত্তোলন কৰে। লগতে ডিমৌ হেণ্ডবল ক্লাবৰ হৈ পতাকা উত্তোলন কৰে ক্লাৱৰ সভাপতি অৰূপ কুমাৰ দত্তই।
ইয়াৰ উপৰি এই দিৱসৰ লগত সংগতি ৰাখি ল’ৰা আৰু ছোৱালীৰ মাজত পৃথকে পৃথকে হেণ্ডবল প্ৰতিযোগিতা আৰু এক সম্বৰ্ধনা অনুষ্ঠান অনুষ্ঠিত কৰা হয়।
সভাত বক্তব্য আগবঢ়াই ডিমৌ হেণ্ডবল ক্লাবৰ সম্পাদক মঞ্জুৰ আলীয়ে কয় যে আজিৰ যুৱ-প্ৰজন্ম ক্ৰীড়া ক্ষেত্ৰত আগতকৈ বেছি আগবাঢ়ি যাব লাগিব। তেওঁ লগতে কয় এইক্ষেত্ৰত দৰিদ্ৰতা যে কেতিয়াও হেঙাৰ হ’ব নোৱাৰে সেইয়া অসম গৌৰৱ হিমা দাসে বিশ্ববাসীৰ আগত প্ৰমাণ কৰিলে।
