সমগ্ৰ ৰাজ্যৰ লগতে কলিয়াবৰতো কালি অৰ্থাৎ বুধবাৰে যথেষ্ঠ উৎসাহেৰে শিক্ষক দিৱস পালন কৰা হয়। এই উপলক্ষে কলিয়াবৰ কেন্দ্ৰীয় ছাত্ৰ সন্থাৰ উদ্যোগত পশ্চিম পূবথৰীয়া উচ্চ মাধ্যমিক বিদ্যালয় আৰু কলিয়াবৰ মহাবিদ্যালয়ত দুটা পৃথক অনুষ্ঠান অনুষ্ঠিত কৰা হয়।
পূবথৰীয়া উচ্চ মাধ্যমিক বিদ্যালয়ৰ সহযোগত সদৌ অসম ছাত্ৰ সন্থাই বিদ্যালয়খনত অনুষ্ঠিত কৰা শিক্ষক দিৱস অনুষ্ঠানৰ মুকলি সভা উদ্বোধন কৰে আছুৰ উপ সভাপতি মণি মাধৱ মহন্তই।
সভাত বিদ্যালয়খনৰ ভাৰপ্ৰাপ্ত প্ৰধান শিক্ষক প্ৰমোদ বৰুৱাক এই বৰ্ষৰ শ্ৰেষ্ঠ শিক্ষকৰ বঁটা প্ৰদান কৰাৰ লগতে কলিয়াবৰ মহাবিদ্যালয়ৰ অৱসৰপ্ৰাপ্ত অধ্যক্ষ নৰেন্দ্ৰ নাথ হাজৰিকা, মহাবিদ্যালয়খনৰ অৱসৰপ্ৰাপ্ত অধ্যাপক পহল থাপা, কলিয়াবৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ দেৱেন্দ্ৰ নাথ মহন্ত আৰু অৱসৰপ্ৰাপ্ত প্ৰধান শিক্ষয়িত্ৰী বুধমাই দেৱীক আছুৰ ফালৰ পৰা সম্বৰ্ধনা জনোৱা হয়।
সভাত অঞ্চলটোৰ বিশিষ্ট শিক্ষক হেমকান্ত মুক্তিয়াৰ, কলিয়াবৰ শাখা সাহিত্য সভাৰ সম্পাদক নবীন বৰঠাকুৰ, কলিয়াবৰ প্ৰেছ ক্লাবৰ সভাপতি নৃপেন কেওঁট প্ৰমুখ্যে অঞ্চলটোৰ বহুকেইজন বিশিষ্ট ব্যক্তি আৰু বিভিন্ন শিক্ষানুষ্ঠানৰ শিক্ষাগুৰু উপস্থিত থাকে।
আনহাতে শিক্ষক দিৱসৰ লগত সংগতি ৰাখি অনুষ্ঠিত কৰা আনটো অনুষ্ঠানত কলিয়াবৰ মহাবিদ্যালয়ত মহাবিদ্যালয় কৰ্তৃপক্ষই এক ৰক্তদান শিবিৰ অনুষ্ঠিত কৰে।
কলিয়াবৰ মহাবিদ্যালয়ৰ ছাত্ৰ একতা সভাৰ উদ্যোগত আৰু এন চি চি আৰু এন এছ এছ গোটৰ সহযোগত অনুষ্ঠিত কৰা এই ৰক্তদান শিবিৰত ৩০ গৰাকী ছাত্ৰ-ছাত্ৰীয়ে ৰক্তদান কৰে।
ইয়াৰোপৰি শিক্ষক দিৱসৰ লগত সংগতি ৰাখি অনুষ্ঠিত কৰা এক বক্তৃতা অনুষ্ঠানত বিশিষ্ট শিক্ষাবিদ ড০ মুকুল শৰ্মাই ভাষণ প্ৰদান কৰে। উক্ত বক্তৃতানুষ্ঠানত মহাবিদ্যালয়খনৰ অধ্যক্ষ ড০ হিৰণ্য কুমাৰ চলিহা, শিক্ষক-শিক্ষয়ত্ৰী, কৰ্মচাৰী তথা ছাত্ৰ-ছাত্ৰী উপস্থিত থাকে।
উক্ত অনুষ্ঠানতে শিক্ষাবিদ ড০ মুকুল শৰ্মাক কলিয়াবৰ মহাবিদ্যালয়ৰ তৰফৰ পৰা বিশেষ সম্বৰ্ধনা জ্ঞাপন কৰা হয়।
