অসমৰ এটা গাৰো সংগঠন অল আচিক য়ুথ ফেডাৰেশ্যনে ৰাজ্যখনত বসবাস কৰি থকা গাৰোসকলৰ বাবে এখন সুকীয়া পৰিষদ বিচাৰি দাবী উত্থাপন কৰিছে।
মেঘালয়ৰ গাৰো পাহাৰত কেইবাটাও শাখা থকা ফেডাৰেশ্যনে যুক্তি আগবঢ়াইছে যে অঞ্চলটোত বসবাস কৰি থকা আন জনগোষ্ঠীসকলক এনে সুবিধা প্ৰদান কৰা হৈছে।
বৃহস্পতিবাৰে প্ৰকাশ কৰা এটা প্ৰেছ বিজ্ঞপ্তিত ফেডাৰেশ্যনৰ অসম মণ্ডলৰ সভাপতি ক্ৰছবেল মাৰাকে কয়, ‘’ আমি অসমৰ সৰ্বানন্দ সোণোৱাল চৰকাৰক অসমত যুগ যুগ ধৰি বাস কৰি থকা গাৰোসকলক স্বীকৃতি দি গাৰোসকলৰ বাবে এখন স্বায়ত্ত শাসিত পৰিষদ গঠন কৰাৰ আহ্বান জনাব বিচাৰিছো।‘’
ফেডাৰেশ্যনে ৰাজ্যখনৰ মিচিং, তিৱা আৰু সোণোৱাল জনগোষ্ঠীৰ বাবে সুকীয়া পৰিষদ আগবঢ়োৱাৰ কথা উল্লেখ কৰি অসমৰ গাৰোসকলৰ বাবেও সুকীয়া পৰিষদ আগবঢ়োৱাৰ আহ্বান জনায়।
‘’ আমাৰ পূৰ্ব পুৰুষসকলৰ বহুতেই স্বাধীনতা আন্দোলনত জীৱন আহুতি দিছে। আমি প্ৰশ্ন কৰিব বিচাৰিছো অসম চৰকাৰে কিয় গাৰোসকলৰ বৰঙণিৰ কথা পাহৰি যাব বিচাৰিছে। অসমত বড়োসকল আটাইতকৈ বৃহৎ জনসংখ্যাৰ জনজাতি হোৱাৰ বিপৰীতে গাৰোসকলৰ স্থান হ’ল এইক্ষেত্ৰত দ্বিতীয়,’’-প্ৰেছ বিবৃতিত মাৰাকে উল্লেখ কৰে।
ফেডাৰেশ্যনে লগতে স্পষ্ট কৰি দিয়ে যে এখন সুকীয়া পৰিষদৰ দাবীয়ে জনগোষ্ঠীটোৰ সংস্কৃতি, বাষা আৰু পৰম্পৰা সংৰক্ষিত কৰিব।
‘’ আমি ৰাভা হাছং স্বায়ত্ত পৰিষদত প্ৰধান জনগোষ্ঠী যদিও ৰাভা হাছঙৰ পৰা আমাৰ কোনো উন্নয়ন হোৱা নাই,’’ –বিবৃতিটোত লগতে অভিযোগ কৰা হৈছে।
বিবৃতিটোত লগতে দাবী কৰা হৈছে যে গাৰোসকলৰ অসমত এক সুদীৰ্ঘ ইতিহাস আছে আৰু ব্ৰিটিছ শাসনৰ পূৰ্বৰ পৰাই ইয়াত বাস কৰি আছে।
ফেডাৰেশ্যনৰ সভাপতিগৰাকীয়ে লগতে অসম চৰকাৰে গাৰো সম্প্ৰদায়ৰ দাবীৰ সম্পৰ্কত শীঘ্ৰেই ব্যৱস্থা গ্ৰহণ কৰাৰ ওপৰত গুৰুত্ব আৰোপ কৰে।
