সুধাকণ্ঠ ড০ ভূপেন হাজৰিকাৰ জন্মদিনৰ লগত সংগতি ৰাখি শিৱসাগৰৰ দিখৌপৰীয়া সন্মিলিত যুৱ সংঘই আয়োজন কৰা সদৌ অসম প্ৰাইজমানি ভূপেন্দ্ৰ সঙ্গীত প্ৰতিযোগিতাৰ সফল সমাপ্তি ঘটে।
প্ৰতিযোগিতাখনৰ একক শাখাত ৭৫গৰাকীয়ে আৰু দ্বৈত শাখাত ১৩টা দলে অংশ লয়।
প্ৰতিযোগিতাখনৰ বিচাৰক আছিল ভুপেন হাজৰিকাৰ সৈতে গীতাৰ আৰু বাঁহী বজোৱা ক্ৰমে কমল কটকী আৰু পৰমেশ্বৰ বসুমতাৰী আৰু গায়ক বিপুল কাথাৰে।
একক শাখাত অনিশা শইকীয়াই ১ম, আস্থা গোস্বামীয়ে ২য় আৰু ৰাজকুমাৰী ফাল্গুনীয়ে ৩য় পুৰস্কাৰ লাভ কৰে। বিচাৰকৰ বিশেষ পুৰস্কাৰ লাভ কৰে শিখামণি গগৈ, আদিলা কৌশৰ জাহান, সুদৰ্শন দেউৰী, সান্নিধ্য ভূঞা, শ্ৰদ্ধা বৰগোহাঁই, প্ৰিয়ংকা দিহিঙ্গীয়া আৰু প্ৰত্যাশী কলিতাই।
দ্বৈত শাখাত অনুষ্কা তৰংগিনী বৰুৱা আৰু হৰ্ষিত নাথে ১ম, জোনাক নিবিড় শইকীয়াই আৰু তন্ময়ী নাথে ২য় আৰু তাপশ্ৰী ৰাজকুমাৰী আৰু প্ৰিয়ংকা দিহিঙ্গীয়াই ৩য় পুৰস্কাৰ লাভ কৰে। বিচাৰকৰ বিশেষ পুৰস্কাৰ লাভ কৰে অনুৎপল ভাগৱতী আৰু ৰিতপল বৰকাকতীয়ে।
ভূপেন দাদাৰ জন্মদিন উপলক্ষে আয়োজিত কে’ক কাটন পৰ্বত কে’ক কাটে যোৰহাটৰ জনস্বাস্থ্য কাৰিকৰী বিভাগৰ অধীক্ষক অভিযন্তা বিজয় কুমাৰ স্বৰ্ণকাৰে। কে’ক কৰ্তনৰ পূৰ্বে স্বৰ্ণকাৰে ভূপেন দাদাৰ ওপৰত স্বৰ্ণকাৰ-ৰচিত এটি কবিতা পাঠ কৰাৰ লগতে দাদাৰ এটি গীতৰ দুটামান শাৰী গায়।
অনুষ্ঠানত আজাদ আলম, মণিৰুল ইছলাম বড়া, ভাস্কৰ দত্ত, চামচুল বাৰিক, মুক্তাৱ হুছেইন, অতনু বৰা, সুমেশ ডেকা, ৰাজেন্দ্ৰৰ যোশী, ত্ৰৈলোক্য দত্ত আৰু মীনা শৰ্মা উপস্থিত থাকে।
