‘শিক্ষক অবিহনে ছাত্ৰ-ছাত্ৰীৰ উৎকৰ্ষ সাধন হোৱাতো অসম্ভৱ। শিক্ষকেই ছাত্ৰ-ছাত্ৰীৰ মূল হোতা। একোটা শিক্ষানুষ্ঠানে এটা সভ্যতা গঢ় দিয়াত গুৰুত্বপূৰ্ণ ভূমিকা গ্ৰহণ কৰে।’ নগাঁৱৰ আনন্দৰাম ঢেকিয়াল ফুকন মহাবিদ্যালয়ৰ হীৰক জয়ন্তীৰ আজি তৃতীয় দিনৰ অন্যতম অনুষ্ঠান সদৌ অসম ভিত্তিত শুকদেৱ গোস্বামী সোঁৱৰণী তৰ্ক প্ৰতিযোগিতা উদ্বোধন কৰি প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই এই মন্তব্য কৰে।
‘নাগৰিকপঞ্জীয়েই খিলঞ্জীয়া মানুহৰ অস্তিত্ব ৰক্ষাৰ একমাত্ৰ উপায়’ শীৰ্ষক তৰ্ক প্ৰতিযোগিতাৰ উদ্বোধক হিচাপে উপস্থিত থাকি মহন্তই কয় যো ৰাষ্ট্ৰীয় নাগৰিক পঞ্জী অবিহনে অসমীয়া মানুহৰ অস্তিত্ব বিপন্ন। সেয়ে এইক্ষেত্ৰত সকলো মানুহ সজাগ হোৱাটো নিতান্তই প্ৰয়োজন বুলি তেওঁ কয়। নাগৰিক পঞ্জী প্ৰস্তুতৰ মূল কামত দক্ষ আৰু সাহসী বিষয়া নিয়োগ কৰিব লাগে বুলিও ভাষণ প্ৰসংগত তেওঁ উল্লেখ কৰে।
তদুপৰি ১৯৫১ চনত সমগ্ৰ ভাৰতবৰ্ষতে ৰাষ্ট্ৰীয় নাগৰিক পঞ্জীৰ কাম চলিছিল বুলি উল্লেখ কৰি তেওঁ কয়, ‘সেইখিনি সময়ত অসম নামৰ এটা ছাতিৰ তলত সাতোখন ৰাজ্য আছিল। তেতিয়াও অসমত নাগৰিক পঞ্জীৰ কাম হৈছিল। এই নাগৰিক পঞ্জীৰ প্ৰতিলিপি চৰকাৰ, কংগ্ৰেছ আৰু মুচলিম লীগৰ নেতৃত্বৰ হাতত আছিল।’
কটন মহাবিদ্যালয়ৰ প্ৰাক্তন অধ্যাপক তথা কৃষ্ণকান্ত সন্দিকৈ মুক্ত বিশ্ববিদ্যালয়ৰ পঞ্জীয়ক অৰূপজ্যোতি চৌধুৰীৰ অধ্যক্ষতাত মহাবিদ্যালয়ৰ প্ৰেক্ষাগৃহত অনুষ্ঠিত হোৱা তৰ্ক প্ৰতিযোগিতাখনিত মহাবিদ্যালয় পৰিচালনা সমিতিৰ সভাপতি সহজানন্দ ওজা, মহাবিদ্যালয়ৰ অধ্যক্ষ ড০ সুৰজিৎ কুমাৰ ভাগৱতী, প্ৰাক্তন ছাত্ৰ তথা ৰাজ্য চৰকাৰৰ প্ৰাক্তন মহাধিবক্তা দেৱ কুমাৰ শইকীয়া, প্ৰাক্তন ছাত্ৰ তথা ইতিহাসবিদ ড০ ৰাজেন শইকীয়াকে ধৰি বহু কেইজন বিশিষ্ট ব্যক্তি উপস্থিত থাকে।
এই অনুষ্ঠানৰ সমান্তৰালকৈ মহাবিদ্যালয়খনৰ ইনড’ৰ ষ্টেডিয়ামত অনুষ্ঠিত হোৱা ‘ফটোগ্ৰাফী’ শীৰ্ষক এক অনুষ্ঠানত ছাত্ৰ-ছাত্ৰীৰ মাজত ফটোগ্ৰাফীৰ প্ৰতি আগ্ৰহ জন্মাবলৈ বিশিষ্ট ফটোগ্ৰাফাৰ তথা চিত্ৰ পৰিচালক আৰূপ মান্না, সঞ্জীৱ গোহাঁই বৰুৱা, মুৰুলী সেনাপতি, উৎপল বৰুৱা আৰু প্ৰশান্ত বৰদলৈয়ে বিভিন্ন বিষয়ৰ ওপৰত ভাষণ প্ৰদান কৰে।
