এন আৰ চিৰ খচৰা প্ৰকাশ পোৱাৰ পিছৰ পৰা ইটোৰ পিছত সিটো বাংলাদেশীৰ নাম খচৰাত সোমোৱা বুলি বাতৰি প্ৰচাৰ হৈ থকাৰ সময়তে মৰিগাওঁ জিলাত এইবাৰ আফগানিস্তানৰ নাগৰিকৰো নাম এন আৰ চিত সোমোৱাৰ অভিযোগ পোৱা গ’ল।
আজি মৰিগাওঁ জিলাৰে ভুৰাগাওঁ অঞ্চলৰ এমদাদুল ইচলাম নামৰ এজন লোকে দিচপুৰ প্ৰেছক্লাবত সংবাদমেল দি এই তথ্য দাভি ধৰে।
এমদাদুল ইচলামে জনোৱামতে, ভুৰাগাওঁ ৰাজহচক্ৰৰ অন্তৰ্গত বালিডোংগা গাৱঁত এন আৰ চিৰ উন্নীতকৰণৰ কামত জালিয়াতি হোৱা বুলি আৰু আফগানী নাগৰিক এজনৰ সতি-সন্ততিৰ নাম এন আৰ চিৰ খচৰাত সফলতাৰে অন্তৰ্ভুক্ত হোৱা বুলি দাবী কৰে। তেওঁ লগতে এইবুলিও কয় যে তেওঁ কোনো বিদেশীৰ নাম এন আৰ চিত সোমোৱাটো সহ্য নকৰে আৰু তেওঁ এই জালিয়াতি ফাদিল কৰাৰ বাবে জীৱনৰ ভাবুকিৰ সন্মুখীন হৈছে।
এমদাদুলে দিয়া বিৱৰণমতে, গোলাপ খান নামৰ এজন আফগান নাগৰিক ১৯৮৭ চনত অসমলৈ আহি মৰিগাৱঁৰ উক্ত অঞ্চলত থাকিবলৈ লয় আৰু ধন ঋণলৈ দি জনপ্ৰিয় হোৱাৰ লগতে লাহে লাহে তাতে খুপনি পুতিবলৈ ধৰে। পিছত তেওঁ সেই গাৱঁৰে ইদ্ৰিছ আলীৰ জীয়েক নুৰ নেহাৰক বিয়া কৰায়। বিয়াৰ পিছত কিছু বছৰৰ বাবে আফগানিস্তানলৈ যায় আৰু তাত তেওঁলোকৰ তিনিটা সন্তান জন্ম হোৱাৰ পিছত পৰিয়ালটো পুনৰ অসমলৈ আহে। সন্তানকেইটাক অঞ্চলটোৰে বিভিন্ন বিদ্যালয়ত নাম ভৰ্তি কৰায়।
আনহাতে ২০০৫ চনত গোলাপ খানে কেনেবাকৈ ভোটাৰ তালিকাত নাম সোমোৱায়। কেইবছৰ মানৰ পিছতে নিজৰ জীয়ক জেচমিন চুলতানাকো বিয়া দিয়ে সেইখন গাৱঁৰে এজন যুৱক ৰফিকুল ইচলামলৈ।
জেচমিনৰ বিয়াৰ পিছতে গোলাপ খানৰ ২০০৮-৯ চনত মৃত্যু হয়। কিন্তু ইয়াৰ পিছত জোঁৱায়েক ৰফিকুল ইচলামে পৰিয়ালটোৰ দায়িত্ব লয়। ৰফিকুলে পৰিয়ালটোৰ সকলোৰে নাম কৌশলেৰে ভোটাৰ তালিকাত সোমোৱায়। কেৱল সেয়ে নহয়, চলিত এন আৰ চি উন্নীতকৰণ প্ৰক্ৰিয়াটোতো ৰফিকুলে সকলোৰে নাম সোমোৱাবলৈ সক্ষম হয়। দেউতাক গোলাপ খানৰ পৰিৱৰ্তে মাক নুৰ নেহাৰৰ বংশসূত্ৰ ব্যৱহাৰ কৰি গোলাপৰ সন্তানকেইটাৰ নাম এন আৰ চিত অন্তৰ্ভুক্ত কৰে বুলি এমদাদুলে জানিবলৈ দিয়ে। এমদাদুলে অভিযোগ কৰা মতে, বালিডোংগা গাৱঁৰ এন আৰ চিৰ দায়িত্বত থকা এল আৰ চি আৰজন ৰফিকুল ইচলামৰ ঘৰ ভাৰাত লৈ আছিল।
