নগাঁও আৰু কাছাৰ কাগজ কল পুনৰুজ্জীৱিত কৰাৰ ক্ষেত্ৰত কেন্দ্ৰ তথা ৰাজ্য চৰকাৰে আজিলৈকে কোনো ধৰণৰ ব্যৱস্থা গ্ৰহণ নকৰাৰ প্ৰতিবাদত কাগজ কল কৰ্মী য়ুনিয়ন আৰু কাগজ কল সুৰক্ষা মঞ্চৰ উদ্যোগত আজি জাগীৰোডত কৰ্মচাৰী সকলে ৪ ঘণ্টীয়া ঘৰ্মঘট কাৰ্যসূচী গ্ৰহণ কৰে।
নগাঁও আৰু কাছাৰ কাগজ কল শীঘ্ৰে কাৰ্যক্ষম কৰা, দুবছৰ ধৰি অনাদায় হৈ থকা কৰ্মচাৰীৰ দৰমহা শীঘ্ৰে আদায় দিয়া আদিৰ দাবীত কাগজ কল দুটাৰ শ-শ কৰ্মচাৰীয়ে আজি জাগীৰোডত ৩৭ নং ৰাষ্ট্ৰীয় ঘাইপথ অৱৰোধ কৰি তীব্ৰ প্ৰতিবাদ সাব্যস্ত কৰে। প্ৰতিবাদস্থলীত প্ৰতিবাদকাৰী আৰু আৰক্ষীৰ মাজত হতাহতি হোৱা বুলিও জানিব পৰা গৈছে।
চৰকাৰে আশ্বাসৰ বিপৰীতে কাগজ কল দুটা কাৰ্যক্ষম কৰাৰ ক্ষেত্ৰত ব্যৱস্থা গ্ৰহণ কৰিবলৈ প্ৰতিবাদকাৰী সকলে দাবী জনায়। ইফালে আজিৰ এই প্ৰতিবাদী কাৰ্যসূচীত কাগজ কল দুটাৰ কৰ্মচাৰীৰ লগতে মৰিগাঁৱৰ বিভিন্ন দল-সংগঠনেও অংশগ্ৰহণ কৰা দেখা যায়।
উল্লেখ্য যে বিগত প্ৰায় দুবছৰ ধৰি বন্ধ হৈ থকা নগাঁও আৰু কাছাৰ কাগজ কল পুনৰ কাৰ্যক্ষম কৰি তোলাৰ বাবে কেন্দ্ৰ তথা ৰাজ্য চৰকাৰৰ লগত কাগজ কল দুটাৰ প্ৰতিনিধিয়ে কেইবাবাৰো আলোচনাত মিলিত হৈছে। কিন্তু আজিলৈ এনে আলোচনাই কোনো সুফল কঢ়িয়াই অনা পৰিলক্ষিত হোৱা নাই।
চৰকাৰৰ ফালৰ পৰা কেৱল আলোচনা আৰু আশ্বাসৰ মাজতে সীমাবদ্ধ হৈ থকা বিষয়টোত কাগজ কল দুটাৰ কৰ্মচাৰী সকল হতাশ হৈ পৰাৰ লগতে আৰ্থিকভাৱেও তীব্ৰ সংকটত ভুগা পৰিলক্ষিত হৈছে। সেয়ে আজি কৰ্মচাৰীসকলে ৰাজপথলৈ ওলাই আহি নিজৰ প্ৰাপ্যৰ বাবে প্ৰতিবাদ কাৰ্যসূচী গ্ৰহণ কৰিছে।
