শিৱসাগৰ প্ৰেছ ক্লাৱৰ উদ্যোগত আৰু শিৱসাগৰ বাণিজ্য মহাবিদ্যালয়ৰ সহযোগত আজি শিৱসাগৰ বাণিজ্য মহাবিদ্যালয় প্ৰেক্ষাগৃহত অনুষ্ঠিত হয় ষষ্ঠদশ অঞ্জলি দত্ত সোঁৱৰণী স্মাৰক বক্তৃতা অনুষ্ঠান। অনুষ্ঠানটো সঞ্চালন কৰে শিৱসাগৰ বাণিজ্য মহাবিদ্যালয় অধ্যক্ষ সৌমাৰজ্যোতি মহন্তই।
এই বক্তৃতা অনুষ্ঠানত ‘সাম্প্ৰতিক সমাজৰ গতি ধাৰা আৰু যুৱ প্ৰজন্মৰ ভৱিষ্যত’ শীৰ্ষক আলোচনা চক্ৰত অংশ গ্ৰহণ কৰি বিশিষ্ঠ মনোৰোগ চিকিৎসক তথা অভিনেতা ডা:জয়ন্ত দাসে কয় যে ২০৩০ চনৰ ভিতৰত মানসিক হতাশগ্ৰস্থতা বিশ্বৰ প্ৰধান সমস্যা হিচাপি চিহ্নিত হব।
দাৰ্শনিক ছক্ৰেটিছে খ্ৰীষ্টপূৰ্ব পাঁচশ শতিকাতেই উশৃংখল যুৱ মানসিকতাৰ কথা উল্লেখ কৰিছিল। সেয়হে ছাত্ৰ সমাজক মানৱ সম্পদ ৰূপে গঢ়ি তোলাৰ অৰ্থে শিক্ষক আৰু অভিভাৱকৰ বহু কৰণীয় আছে।ইয়াৰ বাবে ‘স্কুল মেণ্টেল হেলথ প্ৰগ্ৰেম’ৰ যথেষ্ট প্ৰয়োজন আছে। তেওঁ কয় ‘‘আমি সাম্প্ৰতিক সময়ত ইতিবাচক দৃষ্টিভংগীৰে যুৱ প্ৰজন্মক ভাল পথ দেখুৱাই এখন সুন্দৰ আৰু সমৃদ্ধিশালী সমাজ গঠনৰ চেষ্টা চলাব লাগে।’’
‘‘বিজ্ঞান প্ৰযুক্তিৰ দ্ৰুত উন্নয়ন আৰু বিকাশৰ লগে লগে মানুহৰ মানসিক চাপ বৃদ্ধি পাব ধৰিছে। দ্বিতীয় বিশ্বযুদ্ধৰ পাছত বিজ্ঞান প্ৰযুক্তিৰ দ্ৰুত বিকাশে সমাজখনক বহু দিছে যদিও একাংশ মানুহে নি:সঙ্গগতা অনুভৱ কৰিব ধৰিছে। কিশোৰ-কিশোৰীৰ লগতে বৃদ্ধসকলৰ মনতো নি:সঙ্গতাই সমস্যাৰ সৃষ্টি কৰা দেখা গৈছে। নৱ-প্ৰজন্মৰ মাজত আত্মবিশ্বাস যোগোৱাত শিক্ষকসকলে ইন্ধন যোগাব লাগিব। তাৰ বাবে আৱেগিক বুদ্ধিমত্তা আৰু সামাজিক বুদ্ধিমত্তাৰ ওপৰত শিক্ষাৰ পাঠ্যক্রম যুগুত কৰিব লাগিব। ছাত্ৰ ছাত্ৰীৰ মগজুৰ বিন্যাসৰ বাবে আমি এতিয়াই প্ৰস্তুত হব লাগিব। বিজ্ঞান প্ৰযুক্তিৰ যুগত কম্পিউটাৰ, ফেচবুক, হোৱাটএপ আদিয়ে আমাৰ মন-মগজু গ্ৰাস কৰিছে যদিও আমি প্ৰযুক্তিৰ ভাল গুণ বোৰহে গ্ৰহণ কৰিব লাগে’’ বুলি মন্তব্য কৰে মনোৰোগ বিশেষজ্ঞগৰাকীয়ে।
এই বক্তৃতা অনুষ্ঠানত বিশিষ্ট লেখকা মণিকুন্তলা ভট্টাচাৰ্যই কয় যে প্ৰতিজন অসমীয়াই আমাৰ মাতৃভাষাক জীয়াই ৰাখিব লাগিব।দীৰ্ঘদিন ধৰি অসমীয়া ভাষা সংকটত আছে যদিও আমাৰ মাজত মাতৃভাষা মাধ্যমৰ যথেষ্ট পাঠক আজিও আছে। নৱপ্ৰজন্মক অসমীয়া গ্ৰন্থ পঢ়িবলৈ আহ্বান জনায় বিশিষ্ট লেখিকাগৰাকীয়ে। শিৱসাগৰৰ দেৱবালা চহৰীয়াৰ উপন্যাস লিখাৰ পাছত ঐতিহাসিক শিৱসাগৰৰ ভাষা-সাহিত্য- সংস্কৃতি আৰু ঐতিহ্যক লৈ এখন পূৰ্ণাংগ গ্ৰন্থ লিখাৰ প্ৰস্তুতি চলাইছে বুলি মন্তব্য কৰে মণিকুন্তলা ভট্টাচাৰ্যই।
শিৱসাগৰ প্ৰেছ ক্লাৱৰ সম্পাদক ইনামূল হাজৰিকাই আঁত ধৰা অনুষ্ঠাটোত উপস্থিত থাকে শিৱসাগৰৰ নগৰ উন্নয়ন আয়ুক্ত অভিজিৎ বৰুৱা, জিলা বিদ্যালয়ৰ পৰিদৰ্শক আব্দুল জেলিল আৰু অঞ্জন দত্তৰ ভাতৃ অনুপ দত্ত।
অনুষ্ঠানত শিৱসাগৰ জিলাৰ পৰা হাইস্কুল শিক্ষান্ত পৰীক্ষাৰ আৰু উচ্চতৰ মাধ্যমিক পৰীক্ষাত সুখ্যাতিৰে উত্তীৰ্ণ হোৱা বহু কেইগৰাকী ছাত্ৰ-ছাত্ৰীক জলপানি প্ৰদান কৰা হয়।
তাৰোপৰি নিহাৰ গগৈ, পৰমিত কৌৰ, সুকন্যা বৰা আৰু তছলিমা নাচৰিন হাজৰিকাক ক্ৰমে প্ৰয়াত সাংবাদিক আলফৰিদ ছাজাদ, জিতেন চুতীয়া, মতিউৰ ৰহমান হাজৰিকা আৰু আলহাজ আব্দুল লটিফ বঁটা প্ৰদান কৰে। এই অনুষ্ঠানত কঠিন ৰোগত আক্ৰান্ত সোণমণি বৰালৈ বিশিষ্ট নিবন্ধকাৰ তথা শিৱসাগৰ কলেজৰ ৰাজনীতি বিভাগৰ মূৰব্বী অধ্যাপক ড০ সব্যসাচী মহন্তই আৰ্থিক সাহায্য প্ৰদান কৰে।
এই অনুষ্ঠানতে মুচাব্বিৰ ইছলাম, অম্লানজ্যোতি দাস, পাৰভেজ মুস্তাফা আৰু সবনম য়াচমিন আহমেদে মাটি পানী উভয়তে চলা চাইকেল নিৰ্মাণ কৰি শিৱসাগৰলৈ বিৰল কৃতিত্ব কঢ়িয়াই অনাৰ বাবে তেওঁলোকক অভিনন্দন জনোৱা হয়।
