কংগ্ৰেছৰ এতিয়া ভাল দিন বুলি ক’ব পৰা অৱস্থা নহয়। তাৰ পিছতো শুকুৰবাৰে কেন্দ্ৰীয় আৰু ৰাজ্য চৰকাৰৰ ৩জনকৈ প্ৰাক্তন বিষয়াকে ধৰি এগৰাকী গায়িকাই দলটোত যোগদান কৰাত প্ৰদেশ কংগ্ৰেছৰ সভাপতি ৰিপুণ বৰাৰ মুখত হাঁহি বিৰিঙেছে।
কেৱল সেয়াই নহয়, প্ৰদেশ কংগ্ৰেছৰ সভাপতি বৰাই আজি আমাৰ সাংবাদিকৰ আগত কয় যে নতুন মুখে প্ৰদেশ কংগ্ৰেছৰ বল বঢ়াইছে।
উল্লেখযোগ্য যে আজি গুৱাহাটীত থকা ৰাজীৱ ভৱনত এই নেতৃস্থানীয় লোককেইজনে দলটোত যোগদান কৰে। দলটোত যোগদান কৰা প্ৰাক্তন বিষয়াকেইজন হ’ল ক্ৰমে যোগেশ পেগু, কামেশ্বৰ গাজলো আৰু নেত্ৰৰঞ্জন।
আনহাতে ডিব্ৰুগড় অনাতাঁৰ কেন্দ্ৰৰ একালৰ নিয়মীয়া শিল্পী ৰুমী অঞ্জনা চৌধুৰীয়েও একেটা অনুষ্ঠানতে দলটোত যোগদান কৰে।
ইয়াৰে যোগেশ পেগু হৈছে ৩২ বছৰতকৈ অধিক কাল সেৱা আগবঢ়োৱা আয়কৰ বিভাগৰ এগৰাকী প্ৰাক্তন ৰাজহ বিষয়া। তেওঁ দিল্লীৰ আয়কৰ বিভাগৰ প্ৰাক্তন মুখ্য আয়ুক্ত হিচাপে অৱসৰ গ্ৰহণ কৰিছিল।
কামেশ্বৰ গাজলো চাহ কৰ্মচাৰী কল্যাণ পৰিষদৰ এগৰাকী প্ৰাক্তন আয়ুক্ত আৰু নেত্ৰৰঞ্জন এগৰাকী ষ্টেইট বেংকৰ প্ৰাক্তন প্ৰবেশ্যনেৰি বিষয়া।
কংগ্ৰেছ দলটোত যোগদান কৰিয়েই যোগেশ পেগুৱে আজি বিজেপি দলৰ সমালোচনাত মুখৰ হৈ পৰে। তেওঁ সংবাদ মাধ্যমৰ আগত কয় “বিজেপি চৰকাৰে অসম তথা ভাৰতৰ জনসাধাৰণক যি পৰিৱৰ্তনৰ সপোন দেখুৱাইছিল, সেই সপোনসমূহৰ এটাও পূৰণ কৰিব নোৱাৰিলে। তথা তাৰ বিপৰীতে জনসাধাৰণৰ ওপৰত মাধমাৰ শোধোৱা কেতবোৰ কাম আৰু সিদ্ধান্তহে গ্ৰহণ কৰিছে মোদী নেতৃত্বাধীন কেন্দ্ৰীয় চৰকাৰে।
তেওঁ লগতে কয় “মোদী চৰকাৰে যিধৰণে দেশ চলোৱা আৰম্ভ কৰিছে, তাৰ পৰিণতিত দেশৰ জনসাধাৰণৰ মাজত থকা সম্প্ৰীতি নাইকিয়া হৈ যাব। বিজেপি চৰকাৰে অৰাজকতা সৃষ্টি কৰাৰ আশংকা আছে।”
আনহাতে, যোগদানকাৰী নেত্ৰৰঞ্জনে সংবাদ মাধ্যমৰ আগত কয় “মোদী চৰকাৰৰ চাৰিবছৰীয়া শাসনত ভাষণ শুনিলো, কিন্তু পৰিৱৰ্তনৰ ফল দেখা নাপালো। কংগ্ৰেছেহে পৰিৱৰ্তন আনিব বুলি মই নিশ্চিত।”
তেওঁ লগতে মোদী চৰকাৰক সমালোচনা কৰি কয়, “সাধাৰণ জনতাই মোদীৰ জুমলা ভাষণ শুনি ভাগৰি পৰিছে, তেওঁলোকক এতিয়া ফলাফল লাগে।”
আনহাতে, গায়িকা ৰুমী অঞ্জনা চৌধুৰীয়েও কংগ্ৰেছ দলত থাকি নিষ্ঠাৰে নিজৰ সেৱা আগ বঢ়াই যোৱাৰ বাবে প্ৰতিশ্ৰুতিবদ্ধ বুলি কয়।
ইফালে, এগৰাকী শিল্পী হিচাপে ৰুমী অঞ্জনা চৌধুৰীৰ পৰা দলে বহুখিনি আশা কৰিছে বুলি নিজৰ বক্তব্যত প্ৰকাশ কৰে প্ৰদেশ কংগ্ৰেছৰ সভাপতি ৰিপুণ বৰাই।
তেওঁ কয়, “অসম প্ৰদেশ কংগ্ৰেছ কমিটিৰ এটা নিজাববীয়া সাংস্কৃতিক বিভাগ আছে। উক্ত বিভাগত ৰুমী অঞ্জনা চৌধুৰীক অন্তৰ্ভুক্ত কৰিম। অনাগত দিনত বিজেপি আৰু আৰ এছ এছক ৰুধিবৰ কাৰণে কৰা সংগ্ৰামৰ অংশ হিচাপে গীত-মাতেৰে মানুহৰ মনত চৌধুৰীয়ে এই ভাব জগাই তুলাৰ অংশীদাৰ হ’ব।”
ইফালে আজি বি টি এডিৰো ২১গৰাকী লোকে কংগ্ৰেছ দলত যোগদান কৰা বুলি জনাইছে দলৰ সূত্ৰই।
