হাতী ফান্দী ইউনিয়ন পৰিচালনা কৰা ৰাজ্যিক সভাপতি ৰত্নেশ্বৰ গগৈ আৰু সাধাৰণ সম্পাদক যোগেন দোলাকাষৰীয়াৰ লগতে এগৰাকী ৰাষ্ট্ৰীয় পৰ্য্যায়ৰ নেতাৰ বিৰুদ্ধে ৩.০৫ কোটি টকা কেলেংকাৰিৰ গুৰুতৰ অভিযোগ আনিছে ট্ৰেড ইউনিয়ন কোৰ্ডিনেশ্যন চেন্টাৰৰ সাধাৰণ সম্পাদক জি আৰ শিৱশংকৰে।
উল্লেখ্য যে, মনমোহন সিং প্ৰধান মন্ত্ৰী হৈ থকাৰ সময়তে হাতী ফান্দীসকলৰ কাৰণে এক আঁচনিৰ অধীনত প্ৰত্যেকৰ বাবে ৩ কঠা মাটি আৰু একোটাকৈ গৃহ প্ৰদানৰ কথা ঘোষণা কৰা হৈছিল। তদুপৰি জীৱিকা নিৰ্বাহৰ কাৰণে হাতী ফান্দীসকলক ৩ লাখ টকাকৈ এককালীন সাহায্য প্ৰদান কৰাৰ কথা ঘোষণা কৰা হৈছিল। ইয়াৰ লগতে আঁচনিৰ ধনো ইতিমধ্যে মুকলি কৰা দিয়া হৈছিল। এই সকলোবোৰ কথা জানিবলৈ দিয়ে জি আৰ শিৱশংকৰে।
আনহাতে, ইউনিয়নৰ অসম শাখাৰ সভাপতি মিহিৰ নন্দীয়ে সদৰী কৰে যে মাত্ৰ ১৭০ জন হাতীফান্দীয়ে ২০০৯ চনত এই আঁচনিখনৰ সুবিধা লাভ কৰিছিল আৰু তাৰ পাছতেই এই আঁচনি বন্ধ হৈ গৈছিল।
তদুপৰি যিসকল হাতী ফান্দীয়ে এই আঁচনিৰ কাম পাইছে, তেওঁলোকৰ পৰাও ১০ হাজাৰ টকাকৈ লৈহে আঁচনিৰ অধীনৰ ধন, ঘৰ তথা মাটি পাইছিল। আনহাতে, হাতী ফান্দী ইউনিয়নৰ সভাপতি ৰত্নেশ্বৰ গগৈ আৰু যোগেন দোলাকাষৰীয়াই বহুকেইজন হাতী ফান্দীৰ পৰা ৫০০০ টকাৰ পৰা ১০,০০০ টকা পৰ্য্যন্ত উৎকোচ লৈ বৰ্তমানলৈকে কোনোধৰণৰ কাম আগ নবঢ়োৱাৰ গুৰুতৰ অভিযোগ তোলে ভুক্তভোগী হাতী ফান্দীয়ে।
তাৎপয্যপূৰ্ণভাৱে, উক্ত সময়ছোৱাৰ ট্ৰেড ইউনিয়ন কোৰ্ডিনেশ্যনৰ সাধাৰণ সম্পাদক এছ পি তিৱাৰীয়ে ৰত্নেশ্বৰ গগৈ আৰু যোগেন দোলাকাষৰীয়াক ধন আত্মসাৎ কৰাৰ ক্ষেত্ৰত সহযোগিতা কৰিছিল।
আনহাতে, অসমত এনে হাতী ফান্দী প্ৰায় ৫০২৯ গৰাকী আছে যদিও ১৭০ জন হাতী ফান্দীয়ে আঁচনিৰ অধীনৰ ধন পাইছিল। লগতে উক্ত লোক দুজনে হাতীফান্দীসকলৰ পৰা গুৱাহাটীত এটা স্থায়ী বাসগৃহ নিৰ্মাণৰ নামত গাইপতি ৫ হাজাৰৰ পৰা ১০ হাজাৰ টকা পৰ্য্যন্ত দান- বৰঙণি লৈছিল বুলি ভুক্তভোগী হাতীফান্দীসকলে অভিযোগ কৰে। আনহাতে, বশিষ্ঠত কেৱল হাতীফান্দী ইউনিয়নৰ কাৰ্য্যালয়টো স্থাপন কৰিলে যদিও উক্ত লোক দুজনে গৃহটো হাতীফান্দীসকলক এৰি নিদিয়াৰো এক অভিযোগ উঠিছে।
এই সম্পৰ্কত আমি ধেমাজিৰ লক্ষীপথাৰৰ দুৰ্গা দলে নামৰ এগৰাকী হাতী ফান্দীৰ সৈতে কথা পাতিছিলো । তেওঁ ১৯৬২ চনৰ পৰাই হাতী ধৰা কাম আৰম্ভ কৰিছিল। তেওঁ কয়, ‘’১৯৯৮ চনত হাতী ফান্দী ইউনিয়ন পঞ্জীয়ন হৈছিল যদিও আমি কোনোধৰণৰ সাহায্য কেন্দ্ৰীয় চৰকাৰৰ পৰা পোৱা নাছিলো। সাহায্য আহে যদিও দুই-তিনি তলা বিল্ডিঙ থকা মানুহে ধনসমূহ পায়। ৰত্নেশ্বৰ গগৈ আৰু যোগেন দোলাকাষৰীয়াই প্ৰৱঞ্চনাৰে এই কামটো কৰি আছে।‘’
তদুপৰি তেওঁ কয়, ‘’আমাৰ পৰা ঘৰ আৰু মাটি দিয়াৰ নামত কোটি-কোটি টকা লৈ আজি পাব, কালি পাব বুলি এতিয়ালৈকে ঘৰ-মাটি টকা একোৱেই নিদিলে। মোৰ পৰা ১০ হাজাৰ টকা লৈছিল।‘’
আনহাতে, তেওঁ এই ক্ষেত্ৰত চৰকাৰৰ বন বিভাগক সু-বিচাৰ কৰিবৰ বাবেও আমাৰ জৰিয়তে আহ্বান জনায়।
উল্লেখ্য যে ট্ৰেড ইউনিয়ন কোৰ্ডিনেশ্যন চেন্টাৰৰ অসম শাখাৰ তৰফৰ পৰা বিষয়টোৰ ওপৰত তদন্ত কৰিবৰ বাবে আহ্বান জনাই যোৱা বছৰ চেপ্টেম্বৰ মাহত এখন চিঠি লিখিছিল মুখ্য মন্ত্ৰী সৰ্বানন্দ সোণোৱাললৈ। কিন্তু এই বিষয়টোৰ ওপৰত কোনো ধৰণৰ উচিত তদন্ত নকৰাৰ গুৰুতৰ অভিযোগ তোলে ট্ৰেড ইউনিয়নৰ অসম শাখাৰ সভাপতি মিহিৰ নন্দীয়ে।
তদুপৰি শনিবাৰে টি ইউ চি চিৰ মেঘদূত ভৱনৰ প্ৰেক্ষাগৃহত অনুষ্ঠিত বৈঠকত হাতীফান্দীৰ উক্ত কেলেংকাৰিৰ বিষয়ত তদন্ত কৰিবৰ বাবে ৮ জনীয়া এখন স্ক্ৰিনিং কমিটি গঠন কৰিছে।
