জেহাদীৰ সন্দেহত হোজাই আৰক্ষীয়ে ৩জন লোকক গ্ৰেপ্তাৰ কৰিছে। এওঁলোকক গ্ৰেপ্তাৰৰ লগে লগে হিজবুল মুজাহীদিনৰ সৈতে সম্পৰ্কিত গ্ৰেপ্তাৰৰ সংখ্যা ৭জন হৈছেগৈ।
আৰক্ষীৰ হাতত গ্ৰেপ্তাৰ হোৱা কেইজন হৈছে ৰিয়াজুদ্দিন ভুঞা, জয়নাল আহমেদ আৰু বাহৰুল ইছলাম। ৰিআয়াজুদ্দিনক কছুৱাৰ পৰা আৰু জয়নাল আৰু বাহৰুলক যমুনামুখত গ্ৰেপ্তাৰ কৰা হৈছে।
৩জন জেহাদীৰ গ্ৰেপ্তাৰৰ সৈতে সন্ত্ৰাসবাদী সংগঠন হিজবুল মুজাহীদিনৰ সৈতে সম্পৰ্ক ৰক্ষা কৰাৰ সন্দেহত অসমত এতিয়ালৈকে ৭জন লোকক গ্ৰেপ্তাৰ কৰা হৈছে।
ইয়াৰ পূৰ্বে সন্ত্ৰাসবাদ বিৰোধী গোটে (Anti-Terrorist Squad) হিজবুল মুজাহীদিনৰ সদস্য কামাৰ-উজ-জামানক উত্তৰ প্ৰদেশৰ কানপুৰৰ পৰা গ্ৰেপ্তাৰ কৰিছিল। হোজাইৰ যমুনামুখৰ বাসিন্দা কামাৰ-উজ-জামানক গ্ৰেপ্তাৰৰ পাছত ক্ৰমে তেওঁৰ ৩জন সহযোগী শ্বাহনাৱাজ আলম, ওমৰ ফাৰুক আৰু ছাইদুল আলমক গ্ৰেপ্তাৰ কৰিছিল।
এই সম্পৰ্কে অনুসন্ধান কৰাৰ বাবে উত্তৰ প্ৰদেশৰ পৰা সন্ত্ৰাসবাদ বিৰোধী গোটৰ এটা দল ইতিমধ্যে লংকা আৰক্ষী থানা আহি পাইছে।
লাভ কৰা তথ্য অনুসৰি, হিজবুল মুজাহীদিনৰ নেটৱৰ্ক সম্প্ৰসাৰণ কৰাৰ বাবে পৰিকল্পনা কৰা জামানে যোৱা মাহত অসমলৈ আহোঁতে কছুৱাৰ বান্দুৰা-আঁটীত থকা ৰিয়াজুদ্দিনৰ ঘৰত আছিল।
আৰক্ষীয়ে কামাৰ-উজ-জামানৰ ককায়েক ছাইফুল ইছলামক লংকা আৰক্ষী থানাত জেৰা কৰি আছে বুলি জানিব পৰা গৈছে।
আনহাতে, গুৱাহাটী আৰক্ষীয়ে বৰ্নিহাটৰ পৰা গ্ৰেপ্তাৰ কৰা হিজবুল মুজাহীদিনৰ সন্দেহজনক লিংকমেন ওমৰ ফাৰুকক ডবকা আৰক্ষী থানাত জেৰা কৰি থকা হৈছে।.
তাৰোপৰি, হোজাইৰ লংকাৰ বাসিন্দা ছাইদুল আলমক হোজাই আৰক্ষী থানাত জেৰা কৰি থকা হৈছে।
বালিৰামপথাৰৰ বাসিন্দা শ্বাহনাৱাজ আলমক বৃহস্পতিবাৰে গ্ৰেপ্তাৰ কৰা হৈছিল। জামানক ছেপ্টেম্বৰৰ ১৩ তাৰিখে আৰু হোজাইৰ শোলমাৰাৰ ওমৰ ফাৰুকক ১৫ ছেপেটেম্বৰত সন্ধিয়া ৫-০০বজাত গ্ৰেপ্তাৰ কৰিছিল। ফাৰুকে আনন্দ মেলাত ঘূৰ্ণীয়মান খেলনা গাড়ীৰ কৰ্মী হিচাপে কাম কৰিছিল।
