অয়ন গগৈ গোহাঞি নামৰ ৪ বছৰীয়া শিশুটোৱে তোলা এলনি আলোকচিত্ৰৰ প্ৰদৰ্শনীয়ে ৰাইজৰ দৃষ্টি আকৰ্ষণ কৰিবলৈ সক্ষম হৈছে। অয়ন হৈছে উত্তৰ লখিমপুৰ জিলাৰ নাকাৰিৰ জিন্তু গোহাঞি আৰু সংগীতা গগৈৰ সন্তান।
শিশু ফটোগ্ৰাফাৰগৰাকীয়ে তোলা প্ৰায় তিনি শতাধিক আলোকচিত্ৰ উত্তৰ লখিমপুৰ প্ৰেছ ক্লাবত প্ৰদৰ্শন কৰা হৈছে।
এই আলোকচিত্ৰৰ প্ৰদৰ্শনীখন উন্মোচন কৰিছে অয়নৰ ককাক অৱসৰপ্ৰাপ্ত বেংক বিষয়া পূৰ্ণকান্ত গগৈয়ে। এই আলোকচিত্ৰ প্ৰদৰ্শনীখন চাবলৈ শ শ লোকে ভীৰ কৰাটো পৰিলক্ষিত হৈছে। উল্লেখ্য যে হনিক’ম (Honeycomb) দেশৰ ভিতৰতে কম বয়সীয়া লিখক হিচাপে অয়নে ‘ইণ্ডিয়া বুক অব ৰেকৰ্ডছ’ত স্থান লাভ কৰিছে।
অয়নে তেওঁ লিখা কিতাপখনৰ পৰা ৰয়েল্টি হিচাপে লাভ কৰা ধনখিনি গছপুলি ৰোপণত ব্যয় কৰিছে। অয়নক অক্টোবৰত নতুন দিল্লীত অনুষ্ঠিত হ’বলগীয়া টুমোৰো’জ ইণ্ডিয়া গ্ৰবেল ছামিটত (Tomorrow’s India Global Summit) অংশগ্ৰহণ কৰাৰ বাবে নিমন্ত্ৰণ জনোৱা হৈছে।
বৰ্তমান অয়নে তেওঁৰ পিতৃ-মাতৃৰ সৈতে মিজোৰামৰ আইজলত বাস কৰি আছে। আলোকচিত্ৰ প্ৰদৰ্শনীখনত উত্তৰ লখিমপুৰ প্ৰেছ ক্লাবৰ তৰফৰ অয়নক সম্বৰ্ধনা জনোৱা হয়।
