সদৌ অসম জল সম্পদ ঠিকাদাৰ সন্থাই ১৯ ছেপ্টেম্বৰত অভিযোগ কৰিছে যে তেওঁলোকে জল সম্পদ বিভাগৰ পৰা কোনো ই-টেণ্ডাৰিঙৰ জাননী পোৱা নাই।
সদৌ অসম জল সম্পদ ঠিকাদাৰ সন্থা আৰু ডিব্ৰুগড় সদৌ অসম জল সম্পদ ঠিকাদাৰ সন্থাই বৃহত্তৰ ডিব্ৰুগড় প্ৰেছ ক্লাবত এই বিষয়ত এখন সংবাদমেলৰ আয়োজন কৰিছে। সংবাদমেলখনত সদৌ অসম জল সম্পদ ঠিকাদাৰ সন্থাৰ সম্পাদক মুহি বৰগোহাঞিয়ে জনাইছে, ”বিভাগে কোনো ই-টেণ্ডাৰিং দিয়া নাই আৰু ৰাজনৈতিক পৃষ্ঠপোষকতা লাভ কৰা কিছু সংখ্যক বৃহৎ ঠিকাদাৰে ডাঙৰ ডাঙৰ ঠিকা লাভ কৰিছে। বিভাগটোত ই-টেণ্ডাৰিঙৰ প্ৰক্ৰিয়াৰ কোনো লিখিত জাননী নাই। আমি যিহেতু কামখিনি সম্পাদন কৰোঁ সেয়েহে বিভাগে আমাৰ সৈতে বিষয়টো আলোচনা কৰা দৰকাৰ।”
উল্লেখ্য যে ১০ ছেপ্টেম্বৰত ডিব্ৰুগৰ জল সম্পদ ঠিকাদাৰ সন্থাই স্বজন-তোষণ, ৰাজনৈতিক পৃষ্ঠপোষকতাৰ প্ৰতিবাদত অনিৰ্দিষ্টকালীন অনশন ধৰ্মঘট আৰম্ভ কৰিছিল আৰু ১২ ছেপ্টেম্বৰত ধৰ্মঘট উঠাই লৈছিল।
সদৌ অসম জল সম্পদ ঠিকাদাৰ সন্থাই বিষয়টোৰ ওপৰত মুখ্য মন্ত্ৰী সোণোৱালৰ হস্তক্ষেপ বিছাৰিছে।
সন্থাৰ সভাপতিগৰাকীয়ে কৈছে যে ১২ ছেপ্টেম্বৰত তাৰিখে জল সম্পদ বিভাগে তেওঁলোকৰ অধিকাংশ দাবীয়েই মানি লৈছিল ‘বিগ পেকেজ’ সম্পৰ্কীয় দাবী অতি শীঘ্ৰেই পূৰণ কৰাৰ লিখিত আশ্বাস দিছিল যদিও আজি পৰ্যন্ত মূল দাবীটো সমাধান কৰাৰ ওপৰত আলোচনা কৰা হোৱা নাই।
বৰগোহাঞিয়ে কৈছে যে বিগ পেকেজ ব্যৱস্থাই সৰু ঠিকাদাৰসকলক সমস্যাত পেলাব।
এনে এটা প্ৰকল্প হৈছে মুখ্য মন্ত্ৰী সৰ্বানন্দ সোণোৱালৰ গৃহ সমষ্টি চাবুৱাত মুলুকগাঁৱত ব্ৰহ্মপুত্ৰৰ স্পীল চেনেলসমূহৰ পৰা ‘ভূমি পুনৰুদ্ধাৰ’ৰ আঁচনিৰ ৪০ লাখ টকীয়া প্ৰকল্পৰ এটা ঠিকা নিয়ম বহিৰ্ভুতভাৱে এগৰাকী ঠিকাদাৰক প্ৰদান কৰা হৈছিল।
একেদৰে ৪৬.৯৮ লাখ টকীয়া ৪ কি:মি:ৰ বগীবিল আইথান ৰিঙৰ বান্ধ পুনৰুদ্ধাৰৰ আন এটা প্ৰকল্পৰ ঠিকাও টেণ্ডাৰ অবিহনেই ঠিকাদাৰক প্ৰদান কৰা হৈছিল।
আনকি আকস্মিক পুঁজি আঁচনিসমূহো কোনো ই-টেণ্ডাৰিং অবিহনেই কেইজনমান নিৰ্দিষ্ট ঠিকাদাৰক প্ৰদান কৰা হৈছে। ৰাজনৈতিক পৃষ্ঠপোষকতা থকা ব্যক্তিকহে ঠিকাৰ কাম দি অহা হৈছে বুলি সন্থাই অভিযোগ কৰে।
