কাজিৰঙা ৰাষ্ট্ৰীয় উদ্যানত আজি পুনৰ এজন বনকৰ্মী গঁড়ৰ আক্ৰমণত গুৰুতৰভাৱে আহত হয়।
প্ৰাপ্ত তথ্য মতে আজি পুৱা অগৰাতলিৰ ৰঙামটৰীয়া বন শিবিৰৰ সমীপত নিপেন বৰ্মন নামৰ বনকৰ্মী জনে বন শিবিৰৰ পৰা নিজ বাসগৃহলৈ আহি থকা অৱস্থাতে ঘটনাটো সংঘটিত হয়।
উল্লেখযোগ্য যে গঁড়ৰ আক্ৰমণত বুকু আৰু পিঠিত গুৰুতৰভাৱে আহত বনকৰ্মীজনক সংকটজনক অৱস্থাত যোৰহাট মেডিকেল কলেজত ভৰ্তি কৰোৱা হয়।
গুৰুতৰভাৱে আহত বনকৰ্মীজনক প্ৰথম অৱস্থাত বোকাখাত হস্পিতালত ভৰ্তি কৰোৱা হৈছিল যদিও স্বাস্থ্যৰ অধিক অৱনতি ঘটাত উন্নত চিকিৎসাৰ বাবে যোৰহাটলৈ প্ৰেৰণ কৰা হয়।
পূৰ্বেতেও ৰাষ্ট্ৰীয় উদ্যানখনত এনে ঘটনা কেইবাটাও সংঘটিত হৈছে। পূৰ্বতে ২৮ আগষ্টত বনকৰ্মীৰ এটা দলে টহল দি থকা অৱস্থাত গঁড়ে আক্ৰমণ কৰিছিল। আনকি এজন বনকৰ্মীয়ে আত্মৰক্ষাৰ বাবে গুলী চালনা কৰোতে এটা গঁড়ে মৃ্ত্যুক সাবটি ল’ব লগা হৈছিল।
আনহাতে আন এজন বনকৰ্মী উদ্যানখনৰ কাঠনিবাৰী এলেকাত ১ মে’ত গঁড়ৰ আক্ৰমণত গুৰুতৰভাৱে আহত হৈছিল।
বন্যপ্ৰাণীৰ হকে কাম কৰা সমাজকৰ্মী সকলে বনকৰ্মীসকলে কৰ্তব্য পালনৰ সময়ত এনে ধৰণৰ ঘটনা ঘটিলে অসম চৰকাৰৰ দ্বাৰা ক্ষতিপূৰণ দিয়াৰ ব্যৱস্থা কৰিব লাগে বুলিও দাবী উত্থাপন কৰে।
