বিজেপি চৰকাৰৰ প্ৰতিশ্ৰুতি ৰক্ষাত বিফলতাৰ বাবেই অসমতো গুজৰাট, মহাৰাষ্ট্ৰৰ সংৰক্ষণ আন্দোলনৰ দৰে ‘পৰিস্থিতি’ৰ সকীয়নিৰে অহা ৫ অক্টোবৰত ‘দিচপুৰ মাৰ্চ’ ঘোষণা কৰিছে কলিতা জনগোষ্ঠী সন্মিলনে।
‘এই প্ৰতিবাদৰ পাছতো যদি চৰকাৰে কলিতা জনগোষ্ঠীৰ দাবীসমূহ মানি নলয়, তেন্তে সংৰক্ষণ বিচাৰি গুজৰাটৰ পাতিদাৰ আৰু মহাৰাষ্ট্ৰত মাৰাঠাসকলৰ আন্দোলনে যি ৰূপ লৈছে, ঠিক তেনে এক পৰিস্থিতি অতি সোনকালে গঢ় লৈ উঠিব,’ গুৱাহাটী প্ৰে’ছ ক্লাবত দেওবাৰে সংবাদমেলত হুংকাৰ সংগঠনটোৰ সভাপতি ড০ সোমেশ্বৰ কলিতাৰ।
প্ৰশাসনৰ অনুমতি নথকা সত্বেও গুৱাহাটীৰ খানাপাৰাৰ পৰা ৰাজধানীলৈ ঘোষণা কৰা এই ‘দিচপুৰ মাৰ্চ’ কাৰ্য্যসূচীত ‘নিয়ন্ত্ৰণ’ৰ বাহিৰ হোৱা পৰিস্থিতিৰ কথাও সংবাদমেলত উল্লেখ কৰিছে সংগঠনটোৱে।
লগতে পঢ়ক মডালিটি প্ৰস্তুতৰ প্ৰাথমিক কামেই হোৱা নাই, চৰকাৰৰ প্ৰতাৰণাত ক্ষোভ ৬ জনগোষ্ঠীৰ
‘প্ৰতিবাদ আমি ৰূপায়ণ কৰিমেই, তাত যদি আৰক্ষী-প্ৰশাসনৰ ফালৰ পৰা কোনোধৰণৰ বিক্ষিপ্ত ঘটনা সংঘটিত কৰে, অথবা পৰিস্থিতি নিন্ত্ৰণৰ বাহিৰলৈ যায়, তেন্তে তাৰ বাবে চৰকাৰ আৰু কলিতা মন্ত্ৰী-বিধায়কসকল জৱাবদিহি হ’ব,‘ ঘোষণা ড০ কলিতাৰ।
মুখ্য মন্ত্ৰী সৰ্বানন্দ সোণোৱালক পোনপটীয়াভাৱে দোষাৰোপ কৰিছে অসমত বিষম পৰিস্থিতিৰ হুংকাৰ দিয়া সংগঠনটোৱে। শেহতীয়াকৈ যোৱা মাৰ্চত আৰু তাৰ পূৰ্বে ২০১৬ আৰু ২০১৭ চনটো সোণোৱালৰ সৈতে আলোচনাত বহিছিল সংগঠনটো।
’২৯ জুন ২০১৬, ৩ মাৰ্চ, ২০১৭ আৰু ১৩ মাৰ্চ, ২০১৮ত মুখ্য মন্ত্ৰী সৰ্বানন্দ সোণোৱালৰ সৈতে কলিতা জনগোষ্ঠীৰ ৯ দফীয়া দাবী চনদৰ সন্দৰ্ভত বিস্তৃতভাৱে আলোচনা কৰা হৈছিল। কিন্তু দুৰ্ভাগ্যৰ কথা অনুসূচিত জনজাতিকৰণ তথা সংবিধানৰ ষষ্ঠ অনুসূচীত অনতৰ্ভুক্ত কৰিবলৈ বিধানসভাত প্ৰস্তাৱ গ্ৰহণ কৰা দূৰৰে কথা জনজাতিকৰণৰ ক্ষেত্ৰত ‘বিশেষজ্ঞ সমিতি’ গঠনৰ প্ৰাৰম্ভিক কামেই আৰম্ভ নহ’ল,‘ মুখ্য মন্ত্ৰীৰ বিৰুদ্ধে এই অভিযোগ সংগঠনটোৰ সভাপতিৰ।
কলিতাই লগতে অভিযোগ কৰে যে মুখ্য মন্ত্ৰীয়ে মহানগৰ জিলা উপায়ুক্তক ‘বীৰ ৰজা ভগদত্ত প্ৰকল্প’ৰ বাবে গুৱাহাটীত ১০ বিঘা মাটি দিবলৈ নিৰ্দেশ দিয়াৰ পাছতো যাৱতীয় কাম-কাজেই বৰ্তমানলৈকে আৰম্ভ নকৰিলে। ‘প্ৰকল্পটোৰ বাবে ২০১৮ বৰ্ষৰ বাজেটত ৫ কোটি টকা ধাৰ্য্য কৰাৰ আশ্বাস দিছিল যদিও কাৰ্য্যকৰী ব্যৱস্থা গ্ৰহণ কৰা নাই,’ মন্তব্য নেতাজনৰ।
জনজাতিকৰণ আৰু সংবিধানৰ ষষ্ঠ অনুসূচিত অন্তৰ্ভুক্তিকৰণৰ বাবে প্ৰয়োজনীয় ‘বিশেষজ্ঞ সমিতি’ গঠন কৰি অহা ৩১ ডিচেম্বৰৰ ভিতৰত বিধানসভাত সন্মতিসূচক প্ৰস্তাৱ গ্ৰহণ কৰি কেন্দ্ৰীয় চৰকাৰলৈ প্ৰেৰণ কৰাৰ বাবে সংগঠনটোৱে দাবী জনাইছে।
কলিতাসকলৰ এই হুংকাৰৰ বিপৰীতে জনজাতিকৰণ দাবী কৰি অহা অসমৰ আন ৬টা জনগোষ্ঠীয়েও বিজেপি চৰকাৰৰ বিৰুদ্ধে নিৰ্বাচনী প্ৰতিশ্ৰুতি পূৰণ নকৰাৰ অভিযোগ কৰি আহিছে।
এনে পৰিস্থিতিত অসমত ৭০ লাখ কলিতা লোক থকা বুলি দাবী কৰি অহা সংগঠনটোৰ এই হুংকাৰ ৰাজ্যৰ ভৱিষ্যত পৰিস্থিতিৰ বাবে চিন্তাজনক হৈ উঠিব পাৰে।
