প্রতিগৰাকী শিশুৱে গুণগত প্রাথমিক শিক্ষা পোৱাৰ ওপৰত গুৰুত্ব প্রদান কৰি ৰাজ্য চৰকাৰে শিক্ষা বিভাগৰ সহযোগত ৰূপায়ণ কৰা ‘গুণোৎসৱ’ৰ প্রথম পৰ্ব সফলতাৰে অনুষ্ঠিত হৈ যোৱাৰ পিছত ইয়াৰ দ্বিতীয় পৰ্ব গুণোৎসৱ-অসম, ২০১৮ৰ কাম ইতিমধ্যে আৰম্ভ হৈছে।
দুটা পৰ্যায়ত অনুষ্ঠিত হ’ব লগা গুণোৎসৱ কাৰ্যসূচীৰ প্রথম পৰ্যায় অহা ৮ অক্টোৱৰ পৰা ১১ অক্তোবৰলৈ আৰু দ্বিতীয় পৰ্যায় ৩১ অক্তোবৰৰ পৰা ৩ নবেম্বৰলৈ অনুষ্ঠিত হ’ব। দ্বিতীয় পৰ্যায়ত অনুষ্ঠিত হ’ব লগা বিশ্বনাথ জিলাৰ প্রাথমিক, উচ্চ প্রাথমিক আৰু উচ্চ মাধ্যমিকৰ ১১০৪ খন বিদ্যালয়ত ৪১১ গৰাকী বহী মূল্যায়নকাৰীয়ে দ্বিতীয় শ্রেণী পৰা নৱম শ্রেণীলৈ মুঠ ৮৮২৭২ গৰাকী ছাত্ৰ-ছাত্ৰীক মূল্যায়ন কৰিব। ইয়াৰ বাবে বিশ্বনাথ জিলা সৰ্বশিক্ষাই সকলো যাৱতীয় প্রস্তুতি আৰম্ভ কৰিছে।
আজিৰ পৰা বিশ্বনাথ কৃষি মহাবিদ্যালয়ৰ সভা কক্ষত প্রথম পৰ্যায়ৰ ৮৫ গৰাকী বহী মূল্যায়নকাৰীৰ প্রশিক্ষণ আৰম্ভ হৈছে। বিশ্বনাথ জিলা সৰ্বশিক্ষাৰ জিলা আঁচনি বিষয়া তথা গুণোৎসৱৰ নডেল বিষয়া বেদব্রত বৰা আৰু মনোজ কুমাৰ গোহাঁইয়ে পৰিচালনা কৰা প্রশিক্ষণ কাৰ্যসূচী উদ্বোধন কৰে বিশ্বনাথ কৃষি মহাবিদ্যালয় অধ্যাপক ভক্তপ্রসাদ গৌতমে।
শোণিতপুৰ শিক্ষণ প্রশিক্ষণ প্রতিষ্ঠানৰ প্রৱক্তা চন্দন ভূঞা আৰু বিহালী মহাবিদ্যালয়ৰ সহযোগী অধ্যাপক গুণজিত কলিতাই বহী মূল্যায়নকাৰী সকলক প্রশিক্ষণ প্রদান কৰে। অহা ৮ অক্তোবৰৰ পৰা তিনিটা পৰ্যায়ত বহী মূল্যায়নকাৰী সকলৰ প্রশিক্ষণসমূহ অনুষ্ঠিত হ’ব বুলি নডেল বিষয়া মনোজ কুমাৰ গোহাঁইয়ে জানিবলৈ দিয়ে |
উল্লেখযোগ্য যে আজিৰ উক্ত কাৰ্যসূচীত বিশ্বনাথ জিলাৰ অতিৰিক্ত উপায়ুক্ত তথা বিশ্বনাথ জিলা মিচন সমন্বয়ক প্রদীপ কুমাৰ সূত্ৰধৰে অংশগ্রহণ কৰে।
