কাৰ্বি আংলঙৰ ডকমকাৰ অভিজিৎ নাথ-নিলোৎপল দাস হত্যাকাণ্ডৰ বিচাৰ প্ৰক্ৰিয়া নগাঁৱৰ ‘ফাষ্ট ট্ৰেক’ আদালতত চলিব।
উক্ত হত্যাকাণ্ডৰ অভিযোগত আৰক্ষীয়ে গ্ৰেপ্তাৰ কৰা আৰু নগাঁও কেন্দ্ৰীয় কাৰাগাৰত থকা অভিযুক্তসকলক আজি নগাঁৱৰ মুখ্য ন্যায়িক দণ্ডাধীশৰ আদালতত হাজিৰ কৰোৱা হয়। বিচাৰ প্ৰক্ৰিয়া খৰটকীয়া কৰাৰ বাবে নগাঁৱৰ ফাষ্ট ট্ৰেক আদালতলৈ গোচৰটো দিয়া হৈছে। দুৰ্গা পূজাৰ বন্ধৰ পিছৰে পৰা দ্ৰুত গতিত আদালতত এই হত্যাকাণ্ডৰ বিচাৰ চলিব বুলি জানিব পৰা গৈছে।
কাৰ্বি আংলং জিলাৰ আৰক্ষীয়ে ডিফু কাৰাগাৰত থকা উক্ত হত্যাকাণ্ডৰ ৪৮ জন অভিযুক্তক ১৮ ছেপ্টেম্বৰত নগাঁৱলৈ আনি সেইদিনাই প্ৰথম আদালতত হাজিৰ কৰাইছিল। আদালতত হাজিৰ কৰোৱাৰ পিছত অভিযুক্তসকলক নগাঁও কেন্দ্ৰীয় কাৰাগাৰলৈ প্ৰেৰণ কৰা হয়।
উল্লেখযোগ্য যে অভিজিৎ নাথ আৰু নীলোৎপল দাসৰ পিতৃ-মাতৃয়ে ডিফুৰ আদালতত গোচৰটোৰ বিচাৰ প্ৰক্ৰিয়া চলিলে অভিযুক্ত পক্ষৰ হেঁচাত ভূক্তভোগীয়ে সঠিক ন্যায় পোৱাৰ ক্ষেত্ৰত শংকা প্ৰকাশ কৰি গোচৰটোৰ বিচাৰ নগাঁও আদালতলৈ স্থানান্তৰ কৰাৰ বাবে আবেদন জনাইছিল। ফলত গোচৰটো নগাঁও আদালতলৈ স্থানান্তৰ কৰা হয়।
