বহু প্ৰশংসিত তথা ৰাষ্ট্ৰীয় চলচ্চিত্ৰ বঁটাত স্বৰ্ণ কমল প্ৰাপ্ত অসমীয়া ছবি ‘ভিলেজ ৰকষ্টাৰ্ছ’ৰ নিৰ্মাতা ৰীমা দাসক অৱশেষত ৰাজ্য চৰকাৰে প্ৰদান কৰিলে ১ কোটি টকা।
আজি অৰ্থাৎ বৃহস্পতিবাৰে ৰীমা দাসৰ বেংক একাউণ্টলৈ ৰাজ্য চৰকাৰে ১ কোটি টকা ট্ৰান্সফাৰ কৰে। ‘ভিলেজ ৰকষ্টাৰ্ছ’ৰ প্ৰমোচনৰ বাবে মুখ্য মন্ত্ৰীৰ সাহায্য পুঁজিৰ পৰা আগবঢ়োৱা হৈছে এই টকা।
উল্লেখযোগ্য যে ৰীমা দাসৰ ‘ভিলেজ ৰকষ্টাৰ্ছ’ অস্কাৰৰ বিদেশী ভাষা চলচ্চিত্ৰৰ শিতানত প্ৰতিদ্বন্দিতাৰ বাবে নিৰ্বাচিত হৈছে। ২৮ খন চলচ্চিত্ৰৰ মাজৰ পৰা ভিলেজ ৰকষ্টাৰ্ছক ফিল্ম ফেডাৰেশ্যন অব ইণ্ডিয়াৰ ১২জনীয়া সদস্যৰ কমিটীখনে আনুষ্ঠানিকভাৱে অস্কাৰলৈ অপ্ৰতিদ্বন্দ্বিতামূলকভাৱে নিৰ্বাচিত কৰিছিল।
ফলত ছবিখনৰ প্ৰচাৰ তথা প্ৰমোচনৰ বাবে ৰীমাক প্ৰয়োজন হৈছিল বহু পৰিমাণৰ ধনৰ। আৰু এই ক্ষেত্ৰত ৰীমাই ছচিয়েল মিডিয়া যোগে সকলোকে সহায়ৰ বাবে আহ্বান জনাইছিল।
আনহাতে মুখ্য মন্ত্ৰীয়ে পূৰ্বতে ৰীমা দাসক বহু প্ৰশংসিত ছবিখনৰ প্ৰচাৰৰ বাবে ১ কোটি দিয়াৰ কথা ঘোষণা কৰিছিল।
