গোৱালপাৰাত এইবাৰ শুৰপোকৰ (swarming caterpillar) উপদ্ৰৱত শ শ বিঘা শালি খেতি নষ্ট হৈছে। বেয়াকৈ প্ৰভাৱিত এলেকাসমূহ হৈছে লখিপুৰ উন্নয়ণ খণ্ডৰ অন্তৰ্গত আগিয়া, ৰখাপাৰা, শিঙিমাৰী, পুখুৰীপাৰা, গুমাইঝাৰ।
অতি কম সময়ৰ ভিতৰতে শুৰপোকে বিশাল আয়তনৰ শস্য পথাৰ তহিলং কৰিব পাৰে। ভূতৰ ওপৰত দানহৰ দৰে ইফালে এই এলেকা সমূহত আছে বনৰীয়া হাতীৰ উপদ্ৰৱ। ছবিন ৰাভা, ফাগুন ৰাভা আৰু আন কেইবা গৰাকী কৃষকে জনাইছে যে বৰষুণৰ অভাৱত এইবাৰৰ শালি খেলি অতি বেয়া হৈছে আৰু তাৰ উপৰি শুৰপোকৰ আক্ৰমণে শস্য নিঃশেষ কৰি আনিছে। তেওঁলোক এতিয়া গভীৰ সংকটৰ গৰাহত পৰিছে।
মহকুমা কৃষি বিষয়া (SDO) ইক্ৰামুল হুছেইনে কৈছে, ‘‘যদিওবা শুৰপোকে বালিজানা, লখিপুৰ, মজাখিলি আদি এলেকাৰ কৃষকসকলৰ টোপনি হৰণ কৰিছে তথাপি আমি এই আক্ৰমণ নিয়ন্ত্ৰণ কৰিবলৈ সফল হৈছোঁ। এই এলেকাৰ কৃষকসকল আমাৰ কাষ চাপিছিল আৰু আমি তেওঁলোকক ক্কুইনলফ’জ (quinolphose) আৰু ক্লৰ’পাইৰিফছ (chloropyriphos) আদি কীটনাশক দিছোঁ। তাৰোপৰি, যি সমূহ কৃষিভূমি কীটৰ দ্বাৰা আক্ৰান্ত হৈছে সেই সমূহ আছুতীয়াকৈ ৰাখি তাত মালাথিয়ন (Malathion) ছটিয়াবলৈ পৰামৰ্শ দিছোঁ। তাৰ পৰা আৰু কীটবোৰ দাঁতিত থকা কৃষিভূমিলৈ আহিব নোৱাৰিব।’’
অসমৰ কৃষকে কীটৰ আক্ৰমণৰ সৈতে সহাৱস্থান কৰিবলৈ শিকিছে। প্ৰতি বছৰ অসমৰ ৫ শতাংশ শস্য হয়তোবা কীটৰ আক্ৰমণত নহয় হাতীৰ আক্ৰমণত ধ্বংসপ্ৰাপ্ত হৈ আহিছে। এই ক্ষেত্ৰত বন বিভাগ আৰু কৃষি বিভাগে এটা প্ৰভাৱশালী সমাধান অনাত সম্পূৰ্ণ ব্যৰ্থ হৈছে।
