২১ অক্টোবৰত বৰ্ষাপাৰা ষ্টেডিয়ামত ভাৰত-ৱেষ্ট ইণ্ডিজৰ মাজত অনুষ্ঠিত হ’বলগীয়া এদিনীয়া ক্ৰিকেট মেচখনৰ বাবে আজি গুৱাহাটীত উপস্থিত হ’ব ভাৰত আৰু ৱেষ্ট ইণ্ডিজ দলৰ কেইগৰাকীমান খেলুৱৈ। এখন বিশেষ বিমানেৰে হায়দৰাবাদৰ পৰা দুয়োটা দলৰ খেলুৱৈকেইজন আহি গুৱাহাটীত উপস্থিত হ’ব।
ভাৰতীয় দলৰ অধিনায়ক বিৰাট কোহলী আৰু হাৰ্দিক পাণ্ডিয়াৰ লগতে আন খেলুৱৈসকল অহা ১৭ অক্টোবৰত আহি পাব। গুৱাহাটীৰ মেচখনৰ বাবে নিৰাপত্তা ব্যৱস্থা কটকটীয়া কৰি তোলা হৈছে। তদুপৰি, দুয়োটা দলৰ খেলুৱৈসকলৰ বাবে জেড পৰ্যায়ৰ নিৰাপত্তা ব্যৱস্থা কৰা হৈছে।
আনহাতে, গুৱাহাটীত অনুষ্ঠিত হ’বলগীয়া খেলখনত ধাৰাভাষ্যকাৰ হিচাপে আহিব কপিল দেৱ আৰু সুনীল গাভাস্কাৰ। ইয়াৰ লগতে শচীন তেণ্ডুলকাৰ, সঞ্জয় মাঞ্জেৰেকাৰ, সৌৰভ গাংগুলী আৰু বীৰেন্দ্ৰ ছেহৱাগো গুৱাহাটীলৈ আহিব।
ইপিনে, ২১ অক্টোবৰৰ ভাৰত আৰু ৱেষ্ট ইণ্ডিজৰ মাজত অনুষ্ঠিত হ’বলগীয়া এদিনীয়া আন্তৰ্জাতিক ক্ৰিকেট খেলখনৰ বাবে গুৱাহাটীৰ বৰ্ষাপাৰা ষ্টেডিয়াম সাজু হৈ উঠিছে। উল্লেখযোগ্য যে পাঁচখনীয়া এদিনীয়া শৃংখলাটোৰ প্ৰথমখন খেল ২১ অক্টোবৰত গুৱাহাটীত অনুষ্ঠিত হ’ব।
শনিবাৰে গুৱাহাটীৰ পানবজাৰত সংঘটিত বোমা বিস্ফোৰণৰ পিছত দুৰ্গা পূজাৰ লগতে আন্তৰ্জাতিক ক্ৰিকেট মেচখনৰ বাবে মহানগৰ আৰক্ষীয়ে সুৰক্ষা ব্যৱস্থা অধিক কটকটীয়া কৰি তুলিছে।
উল্লেখযোগ্য যে বিগত ২০১৭ চনৰ অক্টোবৰত বৰ্ষাপাৰাত ভাৰত আৰু অষ্ট্ৰেলিয়াৰ মাজত আন্তৰ্জাতিক টি-টুৱেন্টি মেচখন অনুষ্ঠিত হৈছিল য’ত অষ্ট্ৰেলিয়াই দুই উইকেটত বিজয় সাৱ্যস্ত কৰিছিল।
উক্ত মেচখন সমাপ্ত হোৱাৰ পিছতে অষ্ট্ৰেলিয়াৰ খেলুৱৈসকলৰ বাছখনত কোনো দুস্কৃতিকাৰীয়ে শিল দলিওৱাৰ দুৰ্ভাগ্যজনক ঘটনা সংঘটিত হৈছিল। সেয়েহে আয়োজকসকলে এইবাৰ সুৰক্ষা ব্যৱস্থাৰ দিশত কোনো সুৰুঙা ৰাখিব বিচৰা নাই বুলি জানিবলৈ দিয়ে।
