‘প্রধান মন্ত্ৰী সহজ বিজুলী হৰ ঘৰ যোজনা- সৌভাগ্য’ নামৰ এখন আঁচনিৰ জৰিয়তে কেন্দ্ৰীয় চৰকাৰে বিদ্যুৎ সংযোগ নথকা দুখীয়া পৰিয়ালক বিনামূলীয়াকৈ মিটাৰসহ বিদ্যুৎ সংযোগ দিয়াৰ ব্যৱস্থা কৰিছে যদিও এই আঁচনিৰ নামত বহুত ঠাইত বিতৰক কোম্পানি আৰু ঠিকাদাৰে ধন দাবী কৰাৰ অভিযোগ উঠিছে।
অসমৰ বিভিন্ন ঠাইত এই আঁচনিখনৰ নামত হিতাধিকাৰীৰ পৰা ঠিকাদাৰ আৰু বিতৰকে ৫০০ টকাৰ পৰা ১৫০০ টকা পৰ্য্যন্ত লোৱাৰ অভিযোগ আছে। দৰং জিলাৰ মাজবাট বিদ্যুৎ উপ-সংমণ্ডলৰ অধীনস্থ ওদালগুৰি নেপালী গাঁও, ওদালগুৰি জংঘল, দেৱপুখুৰী আদিকে ধৰি বিভিন্ন গাঁৱত সংযোগৰ নামত ১৫০০ টকা, মিটাৰ স্থাপনৰ নামত ২০০ টকা আদায় লৈ আছে বুলি জানিব পৰা গৈছে।
গ্ৰাহকসকলক বিদ্যুৎ মিটাৰৰ সৈতে বাল্ব আৰু তাঁৰো দিব লাগে যদিও ঠিকাদাৰে এইবোৰ সামগ্ৰী বিনামূলীয়াকৈ দিয়া নাই। ‘সৌভাগ্য’ আঁচনিখনৰ ক্ষেত্ৰত এই অনিয়মৰ কথা জানিব পাৰি মাজবাট বিদ্যুৎ উপ-সংমণ্ডলৰ সহকাৰী কাৰ্যবাহী বিষয়া আব্দুল মাজিদে ব্যৱস্থা গ্ৰহণৰ আশ্বাস দিয়ে।
উল্লেখ্য যে আঁচনিখনৰ মতে, আৰ্থ-সামাজিক আৰু জাতিগতভাৱে পিছপৰা লোকসকলক সম্পূৰ্ণ বিনামূলীয়াকৈ বিদ্যুৎ সংযোগ দিয়াৰ ব্যৱস্থা কৰা হৈছে। তাৰোপৰি, এই শ্ৰেণীৰ ভিতৰত নপৰা কিন্তু বিনামূলীয়া বিদ্যুৎ সংযোগ ল’ব বিচৰা আন লোকেও এই আঁচনিখনৰ অধীনত বিনামূলীয়া বিদ্যুৎ সংযোগ ল’ব পাৰিব। কিন্তু তেওঁলোকৰ পৰা বিতৰক কোম্পানিয়ে ৫০০ টকা পিছত আদায় কৰিব পাৰিব। এই ৫০০ টকা গ্ৰাহকৰ পৰা বিতৰক কোম্পানিয়ে বিদ্যুৎ বিলৰ সৈতে ১০টা কিস্তিত আদায় কৰিব পাৰিব। এই আঁচনিখনৰ অধীনত দেশৰ সকলো ঘৰতে ২০১৮ চনৰ ৩১ ডিচেম্বৰৰ ভিতৰত বিদ্যুৎ সংযোগ দিয়াৰ লক্ষ্য লোৱা হৈছে।
মন কৰিব লগীয়া যে ঠিকাদাৰ আৰু বিতৰক কোম্পানিৰ বদমাচিৰ বাবেই সকলো প্ৰকাৰৰ গ্ৰাহক উপকৃত হ’ব পৰা এই আঁচনিখনৰ পৰা হিতাধিকাৰীয়ে প্ৰকৃত উপকাৰ নোপোৱাৰ দৰে হৈছে।
