শিৱসাগৰ জিলাৰ নামতিত যোৱা ১৪ অক্টোবৰৰ পৰা অনুষ্ঠিত হোৱা সদৌ অসম ভাওনা প্ৰতিযোগিতাখনৰ ২১ অক্টোবৰ অৰ্থাৎ দেওবাৰে সফল সমাপ্তি ঘটে। নামতিৰ বৰফুকন এম ই স্কুলৰ খেলপথাৰৰ বৰফুকন সমন্বয় ক্ষেত্ৰত অনুষ্ঠিত হৈছিল এই ভাওনা প্ৰতিযোগিতাখন।
১৪ অক্টোবৰৰ পৰা ২১ অক্টোবৰলৈকে অনুষ্ঠিত হোৱা এই ভাওনা প্ৰতিযোগিতাত সৰ্বমুঠ ১৩টা দলে অংশগ্ৰহণ কৰে। বিচাৰকৰ ফলাফল অনুসৰি স্বৰ্গীয় ৰাম গগৈ সোঁৱৰণি শ্ৰেষ্ঠ ভাওনা দলৰ খিতাপ লাভ কৰে “নৃসিংহ মূৰাৰী” পূৰ্বৰংগ সাংস্কৃতিক গোষ্ঠী ধিতাই পুখুৰী শিৱসাগৰ।
আনহাতে দ্বিতীয় শ্ৰেষ্ঠ দল “বিপ্ৰ দামোদৰ আখ্যান” বৃন্দাবন সাংস্কৃতিক গোষ্ঠী যোৰহাট, তৃতীয় শ্ৰেষ্ঠ দল “দানবীৰ ৰজা হৰিচন্দ্ৰ” শ্ৰীমন্ত শঙ্কৰ মাধৱ নাট্য গোষ্ঠী যোৰহাট, চতুৰ্থ শ্ৰেষ্ঠ দল “নাৰদৰ ব্ৰক্ষ্মতত্ব লাভ, বেদৱতী উপাখ্যান”, গুৰু শংকৰ নাট্য গোষ্ঠী ৰংদৈ যোৰহাট আৰু পঞ্চম শ্ৰেষ্ঠ দলৰ খিতাপ লাভ কৰে “দক্ষ যজ্ঞ” প্ৰগতিশীল সাংস্কৃতিক যুৱ সংঘ, টিয়ক।
ইয়াৰ উপৰি শ্ৰেষ্ঠ অভিনেতাৰ খিতাপ লাভ কৰে লাতুমণি শইকীয়াই আৰু শ্ৰেষ্ঠ অভিনেত্ৰীৰ খিতাপ অৰ্জন কৰে শান্ত বৰা (বেদৱতী)। আনহাতে শ্ৰেষ্ঠ গায়ন বায়নৰ খিতাপ লাভ কৰে নৃসিংহ মুৰাৰী, শ্ৰেষ্ঠ গায়নৰ খিতাপ লাভ কৰে মনোৰঞ্জন বৰা আৰু শ্ৰেষ্ঠ সুত্ৰধৰৰ খিতাপ লাভ কৰে ডিম্পল শইকীয়াই।
