টিহুৰ জঘন্য দলবদ্ধ বলাত্কাৰ কাণ্ডৰ সৈতে জড়িত থকাৰ অভিযোগত আৰু এজনক আটক কৰা হৈছে। ৰঙিয়াৰ পুঠিমাৰীৰ পৰা টিহু আৰক্ষীয়ে ৰূপধন আলী নামৰ অভিযুক্তজনক আটক কৰিছে।
উল্লেখযোগ্য যে যোৱা ২৪ অক্টোবৰত লক্ষ্মী পূজাৰ নিশা এগৰাকী বিবাহিত মহিলাক এখন গাড়ীৰ ভিতৰত ৫ জন নৰপিশাচে দলবদ্ধভাৱে বলাত্কাৰ কৰিছিল। উক্ত লোককেইজনে এ এছ-০১-ডি জি-৩০৫৬ নম্বৰৰ এল্ট’ গাড়ীত উঠাই দলবদ্ধভাৱে ধৰ্ষণ কৰি পাছত হাত-ভৰি বান্ধি টিহু চ’কৰ পৰা প্ৰায় ১০ কিলোমিটাৰ নিলগৰ খাৰাধৰাৰ কৰ্কাবাৰী ফৰেষ্ট গে’টৰ সন্মুখত পেলাই থৈ গৈছিল।
এই ঘটনা সংক্ৰান্তত ভুক্তভোগী মহিলা গৰাকীৰ পৰিয়ালৰ লোকে টিহু আৰক্ষী থানাত এক গোচৰ ৰুজু কৰিছিল।
ইয়াৰ পাছতে আৰক্ষীয়ে তৎপৰতাৰে অভিযান আৰম্ভ কৰি দলটোৰ দুগৰাকী অভিযুক্ত নুৰুল আলী আৰু বকুল নাথক আটক কৰিবলৈ সক্ষম হৈছিল। ইয়াৰ পাছত আৰক্ষীৰ অভিযানত গ্ৰেপ্তাৰ হৈছিল আন এজন অভিযুক্ত কিশোৰ মোহন দাস। তেওঁক বাক্সা জিলাৰ মুছলপুৰৰ গলবিলৰ পৰা আৰক্ষীয়ে আটক কৰিবলৈ সক্ষম হয়। উক্ত যুৱকজনৰ এল্ট’ বাহনতে দলবদ্ধ ধৰ্ষণকাণ্ডটো সংঘটিত হৈছিল।
আনহাতে, আন এগৰাকী অভিযুক্ত ৰূপধন আলীক আজি গ্ৰেপ্তাৰ কৰাৰ পিছত বৰ্তমানলৈ এই ঘটনাৰ সৈতে জড়িতৰ অভিযোগত মুঠতে চাৰিজনক আৰক্ষীয়ে আটক কৰিলে। অৱশ্যে ঘটনাৰ সৈতে জড়িত দলটোৰ আন এগৰাকী সদস্য মেৰাজুল আলীক এতিয়াও আটক কৰিবলৈ বাকী আছে।
