আজি ৩০ অক্টোবৰ। অসমত সংঘটিত ২০০৮ চনৰ ৩০ অক্টোবৰৰ ধাৰাবাহিক বিস্ফোৰণৰ ঘটনাই আজি এটা দশক সম্পূৰ্ণ কৰিলে। শিশুকে ধৰি আশীজনতকৈয়ো অধিক লোকৰ প্ৰাণ লোৱা এই নিৰ্বিচাৰ হত্যালীলাৰ স্মৃতিয়ে আজিও ভুক্তভোগী পৰিয়ালৰ লগতে প্ৰতিজন মানৱ দৰদী লোকৰ অন্তৰত শোকৰ উদ্ৰেক সৃষ্টি কৰে।
উল্লেখযোগ্য যে ২০০৮ চনৰ ৩০ অক্টোবৰৰ পুৱা বিদ্ৰোহী সংগঠন এন ডি এফ বি (ৰঞ্জন দৈমাৰী)-এ গুৱাহাটীৰ গণেশগুৰি, পাণবজাৰ, কাছাৰীসহ ৰাজ্যৰ ভিন্ন প্ৰান্তত সংঘটিত কৰিছিল এলানি ধাৰাবাহিক বিস্ফোৰণ।
পৰিতাপৰ কথা, ধাৰাবাহিক বিস্ফোৰণেৰে নিৰীহৰ তেজৰ ফাঁকু খেলা হত্যাকাৰী অভিযুক্তই এতিয়াও শাস্তি পোৱা নাই। ভুক্তভোগী পৰিয়ালে ন্যায়ৰ আশাত বন্দী হৈ ক্ৰমে আশাহত হৈ পৰিছে।
প্ৰতিবছৰে ৩০ অক্টোবৰৰ দিনটোত বিস্ফোৰণত নিহত হোৱা এই নিৰীহ লোকসকলৰ স্মৃতি সুঁৱৰি অসমৰ শান্তিকামী জনসাধাৰণে বন্তি প্ৰজ্বলন কৰি তেওঁলোকৰ আত্মাৰ সদ্গতিৰ বাবে প্ৰাৰ্থনা জনাই আহিছে।
আনহাতে, ২০০৮ চনৰ ৩০ অক্টোবৰত গুৱাহাটীকে ধৰি কোকৰাঝাৰ, বৰপেটাৰোড, বঙাইগাঁৱত সন্ত্ৰাসবাদীৰ বোমা বিস্ফোৰণত নিহত হোৱাসকলৰ প্ৰতি শ্ৰদ্ধাঞ্জলি জনাই আহতসকলৰ আশু-আৰোগ্য কামনাৰে আৰু অসমৰ মাটিৰ পৰা ‘সন্ত্ৰাসবাদ নিপাত যাওক’ ধ্বনিৰে আজি সন্ধিয়া সমগ্ৰ অসমত প্ৰতিখন জিলা, মহকুমা সদৰত ৰাইজৰ সহযোগত আছুৱে বন্তি প্ৰজ্বলন কৰিব।
সন্ত্ৰাসবাদৰ বিৰুদ্ধে আছুৱে ৰাইজৰ সহযোগত দৃঢ়তাৰে যুঁজ অব্যাহত ৰখাৰ লগতে সন্ত্ৰাসবাদক অসমৰ পৰা উৎখাত কৰিবই লাগিব বুলি উল্লেখ কৰি আছুৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈয়ে এই সন্দৰ্ভত কয় যে ৩০ অক্টোবৰৰ বৰ্বৰ ঘটনাৰ লগত জড়িত দোষীৰ বিৰুদ্ধে আজিলৈকে চৰকাৰে কঠোৰ ব্যৱস্থা গ্ৰহণ নকৰিলে। আহতসকলৰ সুচিকিৎসা কৰা নহ’ল আৰু পৰিয়ালসমূহক সংস্থাপনৰ ব্যৱস্থা কৰা নহ’ল।
আছুৰ নেতা দুগৰাকীয়ে উক্ত ঘটনাৰ বাবে চৰকাৰে দোষীক দৃষ্টান্তমূলক শাস্তি প্ৰদান কৰিবই লাগিব বুলিও দৃঢ় মত পোষণ কৰে।
