মহাত্মা গান্ধীৰ জন্মজয়ন্তীৰ দিনটোত তামিলনাডুৰ মহিলাসকলৰ বাবে এক ডাঙৰ উপহাৰ আগবঢ়োৱা হৈছে। অহা ২ অক্টোবৰৰ পৰা ৰাজ্যখনত মহিলাসকলৰ বাবে বিনামূলীয়া বাছ যাত্ৰাৰ এক বিশেষ প্ৰকল্প আৰম্ভ হ’ব, যাৰ নাম দিয়া হৈছে ভেট্ৰি পয়ণম। ৰাজ্যখনৰ মহিলাসকলৰ যাতায়াত ব্যৱস্থা অধিক সুচল আৰু সুলভ কৰি তুলিবলৈ তামিলনাডু চৰকাৰে এই গুৰুত্বপূৰ্ণ পদক্ষেপ গ্ৰহণ কৰিছে। চৰকাৰৰ এই আঁচনিৰ জৰিয়তে প্ৰতিদিনে প্ৰায় ৮৪.৩২ লাখ মহিলা প্ৰত্যক্ষভাৱে উপকৃত হ’ব বুলি জানিব পৰা গৈছে।
সোমবাৰে ৰাজ্যিক সচিবালয়ত শীৰ্ষ বিষয়াসকলৰ সৈতে এখন উচ্চ পৰ্যায়ৰ বৈঠকত মিলিত হৈ এই প্ৰকল্পৰ চূড়ান্ত প্ৰস্তুতিৰ বুজ লয় তামিলনাডুৰ মুখ্যমন্ত্ৰী চি যোছেফ বিজয়ে। যাতায়াতৰ অতিৰিক্ত খৰচৰ বাবে যাতে ৰাজ্যখনৰ কোনো মহিলা বা ছাত্ৰী কৰ্মসংস্থাপন অথবা শিক্ষাৰ সুযোগৰ পৰা বঞ্চিত নহয়, সেয়া সুনিশ্চিত কৰাই হৈছে বিজয় চৰকাৰৰ মূল লক্ষ্য। এই পদক্ষেপৰ জৰিয়তে মহিলাসকলে কৰ্মক্ষেত্ৰ, মহাবিদ্যালয় আৰু জৰুৰীকালীন চিকিৎসালয়ত অতি সহজেই উপস্থিত হ’ব পাৰিব, যিয়ে তেওঁলোকক অৰ্থনৈতিকভাৱে স্বাৱলম্বী কৰাত বিশেষভাৱে সহায় কৰিব।
পূৰ্বতে কেৱল সাধাৰণ চহৰৰ বাছসমূহতহে নিৰ্দিষ্ট কিছু ৰেহাইৰ সুবিধা আছিল। কিন্তু নতুন ভেট্ৰি পয়ণম প্ৰকল্পৰ অধীনত এতিয়া একেলগে ১২ হাজাৰ ৬৯২ খন নিৰ্দিষ্ট চৰকাৰী বাছত সম্পূৰ্ণ বিনামূলীয়াকৈ যাত্ৰা কৰিব পৰা যাব। পৌৰসভা আৰু নিগমৰ সীমাৰ ভিতৰত চলাচল কৰা এক্সপ্ৰেছ, লিমিটেড ষ্টপ ছাৰ্ভিছ আৰু ডিলাক্স বাছৰ লগতে ৪০ কিলোমিটাৰতকৈ অধিক দূৰত্বৰ মফচলীয় অঞ্চলৰ সাধাৰণ বাছ আৰু পাহাৰীয়া অঞ্চলৰ সাধাৰণ বাছকো এই সেৱাৰ অন্তৰ্ভুক্ত কৰা হৈছে। ৰাজ্যখনৰ ৭ টা পৰিবহণ নিগমৰ মুঠ বাছৰ ৬৯ শতাংশ এতিয়া এই প্ৰকল্পৰ অধীনলৈ অনা হৈছে, যিয়ে প্ৰতিদিনে ১ লাখ ৬৫ হাজাৰ ৩১২ টা ট্ৰিপত সেৱা আগবঢ়াব। অৰ্থাৎ ৰাজ্যখনৰ মুঠ বাছ চলাচলৰ প্ৰায় ৮৫ শতাংশই এই নতুন ব্যৱস্থাৰ অধীনলৈ আহিছে।
প্ৰশাসনিক আৰু কাৰিকৰী দিশৰ পৰাও প্ৰস্তুতি প্ৰায় শেষ পৰ্যায়ত উপনীত হৈছে। নিৰ্ধাৰিত সকলো বাছত ইতিমধ্যে ইলেক্ট্ৰনিক টিকট মেচিন বা ইটিএম সংস্থাপনৰ কাম সম্পূৰ্ণ হৈছে। মুখ্যমন্ত্ৰীৰ নিৰ্দেশ অনুসৰি ২৫ ছেপ্টেম্বৰৰ ভিতৰত সকলো ছিষ্টেম পৰীক্ষাৰ কাম শেষ কৰি অহা ২৭ ছেপ্টেম্বৰৰ আগতেই ট্ৰায়েল ৰাণ সম্পূৰ্ণ কৰা হ’ব বুলি প্ৰশাসনে জানিবলৈ দিছে।
উল্লেখ্য যে যোৱা ২৪ আগষ্টত বিধানসভাত এই প্ৰকল্পৰ কথা আনুষ্ঠানিকভাৱে ঘোষণা কৰা হৈছিল। সোমবাৰৰ পৰ্যালোচনা বৈঠকত ৰাজ্যৰ পৰিবহণ মন্ত্ৰী এ বিজয় তামিলন পাৰ্থিবন, মুখ্য সচিব এম ছাইকুমাৰ, বিত্ত বিভাগৰ অতিৰিক্ত মুখ্য সচিব এম অচিথিক আৰু পৰিবহণ সচিব ইলা নিথিৰ্মলৰাজকে ধৰি প্ৰশাসনৰ কেইবাগৰাকীও উচ্চপদস্থ বিষয়া উপস্থিত থাকে। অহা ২ অক্টোবৰত হ’বলগীয়া উদ্বোধনৰ পূৰ্বে প্ৰশাসনিক পৰ্যায়ত যে সকলো প্ৰস্তুতি ইতিমধ্যে চূড়ান্ত হৈছে, সেয়া এই বৈঠকৰ পৰাই স্পষ্ট হৈ পৰিছে।
