বঙাইগাঁও জিলাৰ ৩৪নং অভয়াপুৰী উত্তৰ বিধান সভা সমষ্টিৰ মাজেৰে বৈ যোৱা মানাহ নদীৰ ওপৰত এখন দলং নিৰ্মাণৰ বাবে দীৰ্ঘদিন ধৰি স্থানীয় ৰাইজে জনপ্ৰতিনিধি সকলক অনুৰোধ জনাই অহাৰ পাছতো আজি পৰ্যন্ত নিৰ্মাণ নহ’ল এখন দলং।
তিনিবাৰৰ বিধায়ক ভূপেন ৰায়ৰ লগতে বৰ্তমানৰ বিধায়ক আব্দুল হাই নাগৰিকে একো ব্যৱস্থা গ্ৰহণ নকৰাত বৰপেটাৰ সাংসদ চিৰাজ উদ্দিন আজমলে দলং নিৰ্মাণৰ বাবে ১৬ লাখ টকা আৱণ্টন দিছিল যদিও দলঙৰ কাম আৰম্ভ নোহোৱাত ক্ষুন্ন হৈ পৰে স্থানীয় ৰাইজ।
আজিৰ পৰা প্ৰায় ৯-১০ মাহ মান আগতে কেইটামান খুটি পুতি আজিলৈকে দলংখনৰ কাম স্থগিত ৰখাত স্থানীয় ৰাইজ অতিষ্ঠ হৈ সাংসদ পুঁজিৰে নিৰ্মাণ কৰিবলগীয়া দলঙৰ আশা এৰি স্থানীয় ৰাইজে গাঁৱৰ পৰা বাঁহ, ডাঙৰ ডাঙৰ গছ, বিভিন্ন প্ৰয়োজনীয় সামগ্ৰী তথা বৰঙণি তুলি নিজাববীয়াকৈ এখন দলং নিৰ্মাণৰ কাৰ্য হাতত লয়।
দূৰ্ভাগ্যজনক কথা যে যি কামৰ বাবে সাংসদ পুঁজিৰ পৰা ১৬ লাখ টকা আৱন্টন দিয়া হৈছে সেই কাম আজি ৰাইজৰ গাঁঠিৰ ধন ব্যয় কৰি কৰিব লগা হোৱাত নদীৰ দুয়োপাৰৰ উত্তেজিত ৰাইজে চিৰাজ উদ্দিন আজমল মুৰ্দাবাদ, আব্দুল হাই নাগৰী মুৰ্দাবাদ, নমনি ছুৰমান আলী মুৰ্দাবাদ অসম চৰকাৰ হায় হায়, হিমন্ত বিশ্ব শৰ্মা মুৰ্দাবাদ, দলঙৰ টকা আত্মসাৎ কৰা নচলিব, আমাৰ ইয়াত দলং লাগিবই আদি বিভিন্ন শ্লোগানেৰে পৰিৱেশ উত্তাল কৰি তোলে।
ইফালে ক্ষুভিত ৰাইজে সংবাদ মাধ্যমৰ আগত দলঙৰ টকা দুষ্ট চক্ৰই আত্মসাৎ কৰাৰো অভিযোগ তোলে। এতিয়া এই সমগ্ৰ বিষয়টো ৰাজ্য চৰকাৰক তদন্ত কৰিবলৈও স্থানীয় ৰাইজে আহ্বান জনায়।
