নাগৰিকত্ব সংশোধনী বিধেয়কৰ বিৰুদ্ধে অখিল গগৈৰ নেতৃত্বত গঢ়ি উঠা প্ৰতিবাদৰ ব্যাপকতা আৰু প্ৰৱলতা দেখি শংকিত হৈছে নেকি ৰাজ্যিক বিজেপি? আজি দলটোৱে এখন সংবাদমেল দি তাৰেই ইংগিত দিলে।
আজি দলটোৱে হেঙেৰাবাৰীস্থিত দলৰ মুখ্য কাৰ্য্যালয়ত এখন সংবাদ মেল দিয়ে, যাৰ মূল বিষয় হ’ল কৃষক মুক্তিৰ নেতা অখিল গগৈ। সংবাদমেলত দলটোৰ ৰাজ্যিক মুখপাত্ৰ মুমিনুল আৱালে অখিল গগৈ সন্দৰ্ভত কেইবাটাও আক্ৰমণাত্মক মন্তব্য কৰে। তেওঁ অখিলক কেতিয়াবা জাতীয়তাবাদী, কেতিয়াবা মাওবাদী আৰু সকলো সময়তে সুবিধাবাদী বুলি অভিহিত কৰে।
“অখিল গগৈ এজন বহুৰূপী ব্যক্তি, অসমৰ সমাজ জীৱনত অখিল গগৈৰ ভিন্নৰঙী অৱস্থান অসমৰ ৰাইজে দেখিবলৈ পাইছে। কেতিয়াবা তেওঁ জাতীয়তাবাদী, কেতিয়াবা তেওঁ মাওবাদী আৰু সকলো সময়তে সুবিধাবাদী।” এইদৰে কয় মুমিনুল আৱালে।
উল্লেখযোগ্য যে, নাগৰিকত্ব সংশোধনী বিধেয়কৰ বিৰুদ্ধে ৰাজ্যজুৰি এক বৃহৎ আন্দোলনৰ সৃষ্টি তথা ৰাইজৰ মাজত বিধেয়কখনৰ বিৰুদ্ধে প্ৰৱল জনমত গঠন কৰিবলৈ অহৰহ চেষ্টা কৰি আছে কৃষক নেতা অখিল গগৈয়ে। আনহাতে ৰাজ্যিক বিজেপিয়ে এই বিধেয়কখন যেনে-তেনে হোৱাটো বিচাৰি আছে।
নিজৰ ৰাজনৈতিক অভিসন্ধি আৰু ভোটৰ ৰাজনীতিত অখিলৰ আন্দোলনে আনিব পৰা বাধাক লৈ শংকিত হোৱাটোকে প্ৰমাণ কৰিলে ৰাজ্যিক বিজেপিৰ আজিৰ সংবাদমেলে। কাৰণ এটা প্ৰধান ৰাষ্ট্ৰীয় দলৰ ৰাজ্যিক নেতৃত্বই এজন আন্দোলনকাৰী নেতাক মূল বিষয় হিচাপে লৈ সংবাদমেল দিয়াটোৰ অন্য তাৎপৰ্য্য নিঃসন্দেহে কম গুৰুত্বপূৰ্ণ।
আন এটা মন কৰিব লগীয়া কথা হ’ল আজিৰ সংবাদমেলত দলটোৰ মুখপাত্ৰ মুমিনুল আৱালে শিলাদিত্যৰ সুৰতে কথা কয়। “অসম চুক্তিৰ সুযোগত ভাৰতীয় নাগৰিকত্ব লাভ কৰা একাংশ মানুহৰ বোকোচাত উঠি আন্দোলন কৰে অখিল গগৈয়ে।” আৱালৰ মন্তব্য।
আনহাতে তেওঁ কেৱল অখিল গগৈৰ বিৰুদ্ধে ক’বলৈ গৈয়ে শেহতীয়াকৈ ৰাজ্যৰ অৰ্ধ শতাধিক সংগঠনে কৰি থকা আন্দোলনটোক এক প্ৰকাৰৰ উপলুঙা কৰে। “বে-দখলকাৰীৰ পক্ষত থিয় হৈ কৰা আন্দোলনক ‘জাতীয় আন্দোলন’ নাম দিয়ে। কিন্তু অসমীয়া কৃষ্টি-সংস্কৃতিৰ মূল পীঠ সত্ৰসমূহৰ মাটি বে-দখল সন্দৰ্ভত তেওঁ নিমাত।” এয়া আছিল মুমিনুলৰ আন এটা মন্তব্য।
তেওঁ ‘নাগৰিকত্ব সংশোধনী বিধেয়ক গৃহীত হ’লে ১ কোটি ৯০ লাখ হিন্দু বাংলাদেশী অসমত থিতাপি ল’ব বুলি কৈ অখিল গগৈয়ে অসমৰ ৰাইজৰ মাজত অখিল গগৈয়ে বিভ্ৰান্তিৰ সৃষ্টি কৰা’ বুলি কয়।
মুমিনুল অভিযোগ কৰে, “অখিল গগৈয়ে বাংলাদেশী মূলৰ মূছলমানৰ স্বাৰ্থ বিঘ্নিত হোৱা একো কামেই নকৰে।”
ইয়াৰোপৰি বিজেপিৰ মুখপাত্ৰগৰাকীয়ে সংবাদমেলতে অখিল গগৈৰ আহোম পৰিচয়ক লৈও ইতিকিং কৰে। বিতৰ্কিত মন্তব্যৰে তেওঁ কয়, “অখিলে ‘অসমৰ বাবে নহয়, ‘অহম’ (আহোম)ৰ বাবেহে কাম কৰিছে। ‘অসমীয়া’ৰ বাবে চিন্তা কৰাতকৈ ‘অহমীঞা’ৰ বাবেহে অখিল গগৈয়ে চিন্তা কৰে।”
‘অসমক ত্ৰিপুৰা, কাশ্মীৰ হ’বলৈ নিদিওঁ’ বুলি অখিল গগৈয়ে যি হুংকাৰ দি আছে, তাত সু-পৰিকল্পিত ষড়যন্ত্ৰ লুকাই থকা বুলিও সংবাদমেলত দাবী কৰে আৱালে।
উল্লেখযোগ্য যে সংবাদমেলত বিজেপিৰ নেতাজনে দিয়া ভাষ্যৰ অনুৰূপ কথা আজি একাংশ ছপা সংবাদ মাধ্যমেও প্ৰকাশ কৰা দেখা গৈছে। হিন্দু বাংলাদেশীক নাগৰিকত্ব দিয়াৰ বিজেপিৰ অভিপ্ৰায়ৰ সৈতে তাল মিলোৱা এই সংবাদগোষ্ঠীয়ে অখিলৰ নেতৃত্বত চলা নাগৰিকত্ব সংশোধনী বিধেয়কৰ বিৰুদ্ধে চলা আন্দোলনত আমছু জড়িত হোৱা বাবেই অখিলক বাংলাদেশী মুছলমানৰ পৃষ্ঠপোষক সজাব খোজা দেখা গৈছে।
প্ৰশ্ন হয়, অখিল গগৈক ব্যক্তিগত আক্ৰমণেৰে তেওঁৰ নেতৃত্বত চলা নাগৰিকত্ব সংশোধনী বিধেয়ক বিৰোধী আন্দোলনক ব্যৰ্থ কৰাৰ ষড়যন্ত্ৰত নামিছে নেকি অসমৰে কিছুমান শক্তিশালী পক্ষ, যিসকলে বিলখনৰ সমৰ্থন কৰে বা হিন্দু বাংলাদেশীৰ নাগৰিকত্বক সমৰ্থন কৰে?
