মিজোৰামৰ মুখ্য মন্ত্ৰীৰ গৃহ সমষ্টি ছেৰচ্চিপত নিজোৰাম সাংবাদিক সন্থাৰ ভূতপূৰ্ব সভাপতি কাপ্লিয়ানা পাচুৱাওৱে নেশ্যনেল পীপলছ পাৰ্টীৰ টিকটত প্ৰতিদ্বন্দ্বিতা কৰিব।
ছেৰচ্চিপ বিধানসভা সমষ্টিত ইতিমধ্যে মিজোৰামৰ ৰাজনৈতিক দলৰ সভাপতিসকলৰ এক দীঘলীয়া লানি লাগিছে। এই সমষ্টিটোতেই ৪টাকৈ ৰাজনৈতিক দলৰ সভাপতিয়ে নিজৰ প্ৰাৰ্থিত্ব আগবঢ়োৱাৰ কথা ঘোষণা কৰিছে। উল্লেখ্য যে এই সমষ্টিটোৰ পৰাই মিজোৰামৰ মুখ্য মন্ত্ৰী লাল থানহাৱলাই বিগত ১৫ বছৰ ধৰি বিজয়ী হৈ আহিছে।
২০০৩, ২০০৮ আৰু ২০১৩ চনত বিশেষ সমস্যা অবিহনেই লাল থানহাৱলাই বিধানসভালৈ নিৰ্বাচিত হৈ আহিছে। কিন্তু অহা ২৮ নৱেম্বৰত অনুষ্ঠিত হ’বলগীয়া মিজোৰামৰ বিধানসভা নিৰ্বাচনত এই সমষ্টিটোত দুটা ৰাজনৈতিক দলৰ সভাপতি আৰু জোৰাম নেশ্যনেলিষ্ট পাৰ্টীৰ সভাপতি তথা জোৰাম পীপলছ মুভমেণ্টৰ মুখ্য মন্ত্ৰীৰ প্ৰাৰ্থী লাল দুহোমাই প্ৰতিদ্বন্দিতা আগবঢ়াব।
আন এটা স্বল্পখ্যাত ৰাজনৈতিক দল জোৰামথাৰেও তেওঁলোকৰ দলৰ সভাপতি ৰেভাৰেণ্ড ড০ জাইচ্চাৱনাক ছেৰচ্চিপ সমষ্টিত প্ৰক্ষেপ কৰিব। এইটো সমষ্টিতেই প্ৰিজম পাৰ্টীৰ ভনলালৰুৱাতাইয়ো প্ৰতিদ্বন্দিত্বা কৰিব।
এগৰাকী সাংবাদিক, ছেৰচ্চিপ চাইমছৰ সম্পাদক কাপ্লিয়ানা পাচুৱাওৱে কৈছে যে এনপিপিৰ টিকটত তেওঁ আগন্তুক বিধানসভা নিৰ্বাচনত চেৰচ্চিপ সমষ্টিৰ পৰা প্ৰতিদ্বন্দিতা কৰিব।
তেওঁ আৰু কৈছে যে দলে অতি শীঘ্ৰেই ছেৰচ্চিপত এটা নিৰ্বাচনী কাৰ্যালয় মুকলি কৰিব আৰু সমগ্ৰ সমষ্টিটোতেই দলীয় গোট খুলিব। বৰ্তমন বুৱানপুই আৰু থেনজাওলত দুট স্থানীয় গোট আছে বুলি কাপ্লিয়ানা পাচুৱাওৱে প্ৰকাশ কৰিছে।
আনহাতে, মিজোৰাম পিচিচিয়ে মুখ্য মন্ত্ৰী লাল থানহাওলাক দক্ষিণ চামফাইৰ পৰা তেওঁৰ দ্বিতীয়খন আসনৰ প্ৰাৰ্থী হিচাপে প্ৰক্ষেপ কৰিছে।
লাল দুহোমা এগৰাকী ভাৰতীয় প্ৰশাসনিক সেৱাৰ প্ৰাক্তন বিষয়া তথা প্ৰয়াত ইন্দিৰা গান্ধীৰ নিৰাপত্তা গোটৰ মুৰব্বী আছিল। তেওঁ জোৰাম নেশ্যনেলিষ্ট পাৰ্টীৰ সভাপতি হিচাপে ছেৰচ্চিপ বিধানসভা সমষ্টিৰ পৰা প্ৰতিদ্বন্দ্বিতা কৰিব। তেওঁৰ ৰাজনৈতিক দলটো পাঁচটা ৰজনৈতিক দলেৰে গঠিত।
