তিনিচুকীয়াৰ ধলাৰ গণহত্যাই সৃষ্টি কৰা চাঞ্চল্যৰ মাজতে সাম্প্ৰদায়িক বিভেদৰ পৰিৱৰ্তে ঘটনাটোৰ বাবে পোনপটীয়াকৈ বিজেপি চৰকাৰক দোষাৰোপ কৰিছে ৰাজ্যৰ বাঙালী সংগঠনসমূহৰ বৃ্হত্তম মঞ্চ বেঙ্গলি ইউনাইটেদ ফ’ৰাম অৱ আছাম (BUFA)এ।
অসম আৰক্ষীয়ে ঘটনাটোত আলফা (স্বাধীন) জৰিত বুলি দাবী কৰাৰ মুহূৰ্তত চৰকাৰকো সন্দেহৰ আওতালৈ আনি ৰাজ্যৰ ২৩টা বাঙালী সংগঠনৰ ঐক্যমঞ্চটোৱে ঘটনাটোত এন আই এ’ৰ তদন্ত দাবী কৰিছে।
“এই হত্যাকাণ্ডৰ সৈতে চৰকাৰ জৰিত থকাৰ আমি সন্দেহ কৰিছো। আমি ঘটনাটোৰ এন আই এ’ তদন্ত দাবী কৰিছো,” শুকুৰবাৰে দিচপুৰ প্ৰে’ছ ক্লাবত এই মন্তব্য বুফাৰ কৰ্ণধাৰ সমিতিৰ সদস্য অৰুণ ৰায়ৰ।
ঘটনাটো সংঘটিত হোৱাৰ সময়ত আৰক্ষীৰ ভূমিকাক লৈ চৰকাৰলৈ আঙুলি টোঁৱাইছে বুফাই। “সংবাদ মাধ্যমত প্ৰকাশ পোৱা অনুসৰি ঘটনাস্থলীৰ পৰা নাতিদূৰত অৱস্থিত আউটপ’ষ্টৰ আৰক্ষী বিষয়াৰ ম’বাইল ফোন বন্ধ আছিল আৰু চেক প’ষ্টত চেকিঙৰ ব্যৱস্থা নাছিল,” চৰকাৰলৈ আঙুলি উঠোৱাৰ ‘কাৰণ’ দৰ্শাই এই মন্তব্য ৰায়ৰ।
নাগৰিকত্ব বিধেয়কক লৈ একাংশই অসমত ধাৰাৱাহিকভাৱে কৰি অহা ‘উত্তেজক তথা প্ৰৰোচনামূলক মন্তব্য’ক চৰকাৰে লেকাম নলগোৱাৰ পৰিণতিৰূপেই এই ঘটনাক চিহ্নিত কৰিছে মঞ্চটোৱে।
অসমৰ হিন্দু বাঙালীৰ অধিকাৰক লৈ সৰৱ হ’বলৈ গৈ কৰা মন্তব্যৰে বিতৰ্ক কৰি অহা বিজেপি বিধায়ক শিলাদিত্য দেবকে ধৰি সাধাৰণ মানুহক লৈ ‘গে’ম’ খেলা কোনো ৰাজনৈতিক নেতাৰ প্ৰতিয়ে সমৰ্থন নাই বুলি ঘোষণা কৰিছে বুফাই।
“উত্তেজক তথা প্ৰৰোচনামূলক মন্তব্যৰ বাবে এই ঘটনা সংঘটিত হৈছে। শিলাদিত্যই হওক, আমিনুল ইছলামেই হওক ৰাজনৈতিক গে’ম খেলা কোনো ৰাজনৈতিক নেতাৰ মন্তব্যৰ প্ৰতি সমৰ্থন নাই বুফাৰ,” ৰাজনৈতিক নেতাসকলক লক্ষ্য কৰি স্পষ্ট ঘোষণা বুফাৰ নেতা শান্তনু মুখাৰ্জিৰ। কংগ্ৰেছেই হওক বা বিজেপি কোনো দলেই অসমৰ বাঙালী লোকসকলক নিৰাপত্তা দিব পৰা নাই বুলিও দাবী কৰিছে বুফাই।
আততায়ীক কৰায়ত্ত কৰাত ব্যৰ্থ হ’লে ইয়াত চৰকাৰৰে ‘ষড়যন্ত্ৰ থকা’ বুলি ধৰি ল’ম বুলিও বুফাই মত প্ৰকাশ কৰিছে। “৭ দিনৰ ভিতৰত দুষ্কৃতিকাৰীক কৰায়ত্ত কৰক অন্যথা গঢ়ি তোলা হ’ব ব্যাপক ধাৰাৱাহিক আন্দোলনৰ কাৰ্যসূচী,” মন্তব্য অৰুণ ৰায়ৰ।
ধলাৰ গণহত্যাত নিহত প্ৰত্যেক গৰাকী লোকৰ পৰিয়ালৰে এজনক চৰকাৰী চাকৰি আৰু পৰিয়ালক ২০ লাখকৈ টকা দিবলৈও দাবী জনাইছে বুফাই।
বিজেপি উত্থাপিত নাগৰিকত্ব বিধেয়কে অসমৰ পৰিৱেশ বিষময় কৰি তোলাৰ সময়ত ৰাজ্যৰ বাঙালী সংগঠনসমূহৰ বৃ্হত্তম ঐক্য মঞ্চটোৰ অৱস্থান তাৎপৰ্য্যপূৰ্ণৰূপে পৰিগণিত হৈছে।
সমাৱেশ আয়োজনেৰে ৰাজ্যজোৰা উত্তেজনাৰ সৃষ্টি কৰা, শিলাদিত্য দেব মুখ্য আহ্বায়কৰূপে থকা চি আৰ পি এফ এ’-ৰ সদস্য সংগঠনৰ সংখ্যাক লৈ সন্দেহৰ সৃষ্টি হোৱাৰ বিপৰীতে বুফা হৈছে ৰাজ্যৰ বাঙালী সংস্থাসমূহৰ বৃহত্তম মঞ্চ।
