আজি ৩ নৱেম্বৰত বৰাক উপত্যকাৰ কেইবাটাও বাঙালী সংগঠনে দিয়া অসম বন্ধৰ সময়ছোৱাত বৰপেটাৰোডত বন্ধৰ সমৰ্থকে হিংসাত্মক কাৰ্য্যত লিপ্ত হোৱাৰ অভিযোগ উঠিছে।
জানিব পৰা মতে, বৰপেটাৰোডত বৰযাত্ৰী কঢ়িয়াই নিয়া এখন বাছত বন্ধৰ সমৰ্থকে আক্ৰমণ কৰে। AS 01H C 3977 নম্বৰৰ বাছখনে সৰভোগৰ চুলিয়াকাটাৰ পৰা শিৱসাগৰ অভিমুখে বিবাহ যাত্ৰী কঢ়িয়াই লৈ গৈ আছিল।
সন্মুখত কলপুলি আৰু ফুল গাঁথি নিয়া বাছখনত বিবাহযাত্ৰী কঢ়িয়াই নিয়া বুলি জানিও আক্ৰমণ কৰাক সকলোৱে গৰিহণা দিছে। আক্ৰমণকাৰীসকলৰ শিলাবৰ্ষণত বাছখনৰ গ্লাছ ভাঙি চূৰ্ণাকৃত হয়।
উল্লেখযোগ্য যে ১ নৱেম্বৰত হোৱা তিনিচুকীয়াৰ নৰহত্যাৰ প্ৰতিবাদত আজি অসমৰ কেইবাটাও বাঙালী সংগঠনে অসম বন্ধ দিছিল। বৰপেটাৰোডত বন্ধৰ সৰ্বাত্মক প্ৰভাৱ পৰা দেখা গৈছে। ইয়াৰ মাজতে বন্ধ মানিবলৈ বাধ্য কৰাব খোজা ১৫জন উদণ্ড সমৰ্থকক আৰক্ষীয়ে আটক কৰে।
নগাৱঁতো বন্ধৰ সমৰ্থকৰ উদ্ভণ্ডালি; যাত্ৰীবাহী গাড়ীত আক্ৰমণ
আনহাতে নগাৱঁতো বন্ধৰ সমৰ্থকে পথৰ ওপৰত বাছত আক্ৰমণ চলায় বন্ধৰ সমৰ্থকে। তেজপুৰৰ পৰা আহি থকা যাত্ৰীবাহী গাড়ীত আক্ৰমণ কৰাৰ ফলত আতংকময় পৰিস্থিতিৰ সৃষ্টি হয়। যাত্ৰীসকলে বন্ধৰ সমৰ্থকৰ এই উদ্ভণ্ডালিক একমুখে গৰিহণা দিয়ে। আনহাতে কেইবাজনো যাত্ৰীয়ে তেওঁলোকক চৰকাৰে নিৰাপত্তা দিব পৰা নাই বুলি অভিযোগ আনে।
