‘বিৰোধী দলপতি দেবব্ৰত শইকীয়াই এইসময়ত চিণ্ডিকেটকৰ কথা কৈছে। আচলতে তেওঁৰ ঘৰৰ পৰাই চিণ্ডিকেটৰাজ আৰম্ভ হৈছে বুলি বিভিন্ন সময়ত সংবাদ মাধ্যমত প্ৰকাশিত হৈছিল।‘ এই মন্তব্য ৰাজ্যিক বিজেপিৰ মুখপাত্ৰ ৰূপম গোস্বামীৰ।
উল্লেখযোগ্য যে, যোৱা ১৬ অক্টোবৰত সংবাদমেল অনুষ্ঠিত কৰি বিৰোধী দলপতি শইকীয়াই দুৰ্নীতিৰ বিৰুদ্ধে শূন্য সহনশীলতাৰ কথা কোৱা মুখ্য মন্ত্ৰী সোণোৱালৰ কাৰ্য্যালয়ৰ পৰাই চিণ্ডিকেটকৰ কাম চলি থকা বুলি অভিযোগ উত্থাপন কৰিছিল।
ইয়াৰ পিছতেই বিজেপিৰ মুখপাত্ৰগৰাকীয়ে মুখ্য মন্ত্ৰীৰ কাৰ্য্যালয়ৰ পৰা চিণ্ডিকেটৰাজ নচলে বুলি সংবাদমেল অনুষ্ঠিত কৰি এক স্পষ্টীকৰণ দিছিল। কিন্তু আজি পুনৰ একেটা বিষয়কে টানি আনি সংবাদমেলত তেওঁ বিৰোধী দলপতিগৰাকীক পোনপটীয়াকৈ আক্ৰণৰ লক্ষ্য কৰি লয়।
কংগ্ৰেছৰ হাতত কোনো ইচ্ছ্যু নথকা বাবে এনেধৰণৰ মন্তব্য কৰি থাকে বুলি কটাক্ষ কৰি তেওঁ কয়, ‘দেবব্ৰত শইকীয়াই তথ্য আছে যদি চৰকাৰক দাখিল কৰক। সমাজখনক মিছা-মিছি চিণ্ডিকেটৰ কথা কৈ লাভ নাই।‘
আনহাতে এই সন্দৰ্ভত দেবব্ৰত শইকীয়াৰ প্ৰতিক্ৰিয়া জানিব বিচৰাত তেওঁ নৰ্থ-ইষ্ট নাওৰ আগত কয়, ‘মই এইবোৰ পাতলীয়া কথাত মন্তব্য দিব নিবিচাৰো। যদি মোৰ ঘৰৰ পৰা চিণ্ডিকেট ৰাজ আৰম্ভ হোৱাৰ তথ্য আছে তেন্তে সেইখিনি ৰাজহুৱা কৰিলেই হ’ল।‘
উল্লেখযোগ্য যে, আজি কিছুদিনৰ পৰা ধাৰাবাহিকভাৱে সংবাদমেল অনুষ্ঠিত কৰি বিজেপিৰ ৰাজ্যিক সভাপতি আৰু দলৰ মুখপাত্ৰসমূহে দলৰ বিফলতাসমূহ ঢাকিবৰ বাবে সংবাদমেল পাতি কংগ্ৰেছক আক্ৰমণ কৰি বোকা ছটিওৱা ৰাজনীতি প্ৰদৰ্শন কৰি আহিছে।
কংগ্ৰেছে দিল্লীত এক কথা কয় আৰু ধুবুৰীত অন্য এক কথা কয় বুলি মন্তব্য কৰা গোস্বামীয়ে প্ৰাক্তন মুখ্য মন্ত্ৰী তৰুণ গগৈকো সমালোচনা লক্ষ্য কৰি কয়, ‘তৰুণ গগৈ মুখ্য মন্ত্ৰী হৈ থাঁকোতে বহু গুৰুত্বপূৰ্ণ বিষয়ত তুলুঙা মন্তব্য কৰি গোটেই জাতিটোকে ধৰ্বংশৰ গৰাহত পেলাইছিল।’
তদুপৰি, এতিয়াও ‘উন্নয়নমুখী চৰকাৰখনক’ কংগ্ৰেছে অস্থিৰ কৰিব চেষ্টা কৰি আছে বুলি তেওঁ সংবাদমেলত কয়।
