ব্যক্তিগত প্ৰতিষ্ঠানত চাকৰি কৰি কেইগৰাকীমান যুৱতী বলি হ’বলগীয়া হৈছে যৌন নিৰ্যাতনৰ। এই ভয়ংকৰ কাণ্ড পোহৰলৈ অহাত এতিয়া তীব্ৰ চাঞ্চল্যৰ সৃষ্টি হৈছে কামৰূপৰ হাজোত।
ধ্ৰুৱজ্যোতি বৈশ্য আৰু নয়নমণি বায়ন নামৰ দুজন লম্পটে নিজকে BRIGHT CAREER MANAGEMENT INSTITUTE OF NORTH EAST নামৰ প্ৰতিষ্ঠানটোৰ বিষয়া বুলি পৰিচয় দি দীৰ্ঘদিন ধৰি প্ৰতিষ্ঠানটোত কৰ্মৰত যুৱতীসকলক চলাই আহিছিল অকথ্য নিৰ্যাতন।
জানিব পৰা মতে হাজোস্থিত উক্ত প্ৰতিষ্ঠানখনে চাকৰিৰ বাবে শিক্ষিত যুৱক-যুৱতী বিচাৰি বিজ্ঞাপন জাৰি কৰিছিল। আৰু ইয়াৰ পাছতে চাকৰিত যোগদান কৰা বহু যুৱতীৰ ওপৰত প্ৰতিষ্ঠানটোৰ লম্পট বিষয়া দুজনে ধাৰাবাহিকভাৱে যৌন নিৰ্যাতন আৰম্ভ কৰে। এই কাৰ্যত অতিষ্ঠ হৈ ইতিমধ্যে বহু যুৱতীয়ে প্ৰতিষ্ঠান এৰিবলৈ বাধ্য হৈছিল।
উল্লেখ্য যে সন্মান হানি হোৱাৰ ভয়ত কৰ্মৰত যুৱতীসকলে প্ৰতিষ্ঠানটোৰ বিষয়া দুজনৰ বিৰুদ্ধে মৌনতা অৱলম্বন কৰি আহিছিল যদিও এইবাৰ কিন্তু লম্পট বিষয়া দুজনৰ বিৰুদ্ধে সাহসেৰে থিয় দিছে প্ৰতিষ্ঠানটোতে কৰ্মৰত দুই যুৱতীয়ে।
প্ৰতিষ্ঠানটোৰ বিষয়া দুজনৰ বিৰুদ্ধে যুৱতী দুগৰাকীয়ে বিস্ফোৰক অভিযোগ উত্থাপন কৰি কয় যে মাহৰ মূৰত দৰমহা বিচাৰিলেই শাৰীৰিক সম্পৰ্কৰ প্ৰস্তাৱ দিয়ে প্ৰতিষ্ঠানটোৰ বিষয়া দুজনে। তদুপৰি বাথৰুমলৈ গ’লে ভিডিঅ’ ৰেকৰ্ডিং কৰি ব্লেক মেইলিং কৰে বুলিও গুৰুতৰ অভিযোগ উত্থাপন কৰে যুৱতী দুগৰাকীয়ে।
নিজৰ প্ৰাপ্য বিচাৰিলেই প্ৰতিষ্ঠানটোৰ লম্পট বিষয়া দুজনে যুৱতী দুগৰাকীক বাৰে বাৰে নৈশ যাপনৰ প্ৰস্তাৱ দিয়া কাৰ্যত অতিষ্ঠ হৈ অৱশেষত লম্পট বিষয়া দুজনৰ বিৰুদ্ধে হাজো থানাত এজাহাৰ দাখিল কৰে।
হাজো আৰক্ষীয়ে এজাহাৰৰ ভিত্তিতে লগে লগে প্ৰতিষ্ঠানটোৰ বিষয়া দুজন ক্ৰমে ধ্ৰুৱজ্যোতি বৈশ্য আৰু নয়নমণি বায়নক আটক কৰি সোধা-পোচা অব্যাহত ৰাখিছে। আটকাধীন যুৱক দুজন বৰপেটাৰ বুলি জানিব পৰা গৈছে।
