ভাৰতীয় সেনাবাহিনীৰ অৱসৰপ্ৰাপ্ত সেনা বিষয়া, এগৰাকী স্তম্ভলেখক আৰু দেশৰ প্ৰসিদ্ধ সাংবাদিক অৰ্ণৱ গোস্বামীৰ পিতৃ কৰ্ণেল মনোৰঞ্জন গোস্বামীৰ বৃহস্পতিবাৰে মাজনিশা ১২.৪৫ বজাত মুম্বাইত পৰলোকপ্ৰাপ্তি ঘটে।
অৰ্ণৱ গোস্বামীয়ে এটি সংক্ষিপ্ত বাৰ্তাৰে অসমৰ সংবাদ মাধ্যমক শুকুৰবাৰে ৰাতিপুৱা জনাইছে যে কৰ্ণেল মনোৰঞ্জন গোস্বামীয়ে ‘দীৰ্ঘদিন অসুখত ভূগি থকাৰ পাছত’ মুম্বাইত বৃহস্পতিবাৰে মাজনিশা প্ৰায় ১২.৪৫ বজাত মৃত্যুক সাৱটি লয়।
অৰ্ণৱে লগতে জনাইছে যে পিতৃৰ মৃতদেহটো শুকুৰবাৰে পিছবেলা গুৱাহাটীলৈ অনা হ’ব আৰু শনিবাৰে আবেলি গুৱাহাটীত তেওঁৰ অন্ত্যেষ্টিক্ৰিয়া সম্পন্ন কৰা হ’ব।
মনোৰঞ্জন গোস্বামী ভাৰতীয় জনতা পাৰ্টিৰ এগৰাকী সদস্য আছিল আৰু ১৯৯৮ চনৰ লোকসভাৰ নিৰ্বাচনত সন্মানীয় গুৱাহাটী লোকসভা সমষ্টিৰ পৰা বিজেপি প্ৰাৰ্থী হিচাপে প্ৰতিদ্বন্দ্বিতা কৰি কংগ্ৰেছ প্ৰাৰ্থী ভুৱনেশ্বৰ কলিতাৰ হাতত পৰাজিত হৈছিল।
কৰ্ণেল গোস্বামীৰ মৃত্যুৰ পাছতে প্ৰখ্যাত সংগীতজ্ঞ আদনান স্বামীয়ে প্ৰথমতে শোক প্ৰকাশ কৰি বাৰ্তা দিছে। আদনানে তেওঁৰ টুইটাৰত শোক প্ৰকাশ কৰি লিখিছে- ‘’ অৰ্ণৱ গোস্বামীক তেওঁৰ মৰমৰ পিতৃৰ মৃত্যুত মই গভীৰ শোক প্ৰকাশ কৰিছো। এগৰাকী পিতৃক হেৰুৱাটো অত্যন্ত মৰ্মান্তিক। তেওঁৰ আত্মাই শান্তি লাভ কৰক…।‘’
