অসম কৃষি বিশ্ববিদ্যালয়ৰ ডীন ড০ জয়ন্ত ডেকাই কৈছে যে বৰ্তমানৰ কৃষিক্ষেত্ৰত প্ৰয়োগ হোৱা নানা আধুনিক প্ৰযুক্তিয়ে কৃষিখণ্ডক অতীতৰ কেবল ধান, শাক-পাচলি আদি খাদ্য উৎপাদন কৰা আওপুৰণি পদ্ধতিৰ পৰিৱৰ্তে এটা উদ্যোগলৈ ৰূপান্তৰিত কৰিছে।
শুকুৰবাৰে দৰং জিলাৰ মহলীয়াপাৰা গাঁৱত কৃষি বিজ্ঞানৰ স্নাতক অন্তিম বৰ্ষৰ ছাত্ৰ-ছাত্ৰীসকলে তেওঁলোকৰ ৪ মহীয়া ‘গ্ৰাম্য কৰ্ম অভিজ্ঞতা কাৰ্যসূচী’ৰ অন্তৰ্গত আয়োজন কৰা কৃষি প্ৰদৰ্শনী-২০১৮ত উপস্থিত থাকি এই মন্তব্য কৰিছে অসম কৃষি বিশ্ববিদ্যালয়ৰ ডীন গৰাকীয়ে।
ৰাজ্যখনৰ যুৱ সমাজে শেহতীয়া প্ৰযুক্তি প্ৰয়োগ কৰি বাণিজ্যিকভাৱে কৃষিকাৰ্যত মনোনিৱেশ কৰাৰ প্ৰয়োজনীয়তাৰ ওপৰত জোৰ দি ড০ ডেকাই কেন্দ্ৰীয় চৰকাৰ বিভিন্ন আঁচনিৰ কথা উল্লেখ কৰে। ড০ ডেকাই উল্লেখ কৰা আৰু যুৱ সমাজক আকৰ্ষণ কৰিব পৰা আঁচনিকেইখন মান হৈঠছে গ্ৰাম্য ঔদোগিক সজাগতা উন্নয়ন যোজনা (Rural Entrepreneurship Awareness Development Yojana চমুকৈ READY) আৰু কৃষি কাৰ্যলৈ যুৱসমাজক আকৰ্ষণ আৰু নিবিষ্ট ৰখা (Attracting and Retaining Youth in Agriculture চমুকৈ ARYA ) আঁচনি দুখন হৈছে অন্যতম।
ড০ ডেকাই কৈছে, ‘‘চৰকাৰে পৰ্যৱেক্ষণ কৰা অনুসৰি, কৃষকসকলৰ নতুন প্ৰজন্মই কৃষিৰ ফালে পিঠি দি অন্য বৃত্তিলৈকে আকৰ্ষিত হৈছে। নতুন প্ৰজন্মক পুনৰ কৃষিকাৰ্যলৈ আকৰ্ষিত কৰিবলৈ এই আঁচনি প্ৰৱৰ্তন কৰা হৈছে।’’
তেওঁ আৰু কৈছে যে কৃষিকাৰ্যক আওপুৰণি পদ্ধতি বুলি ধৰি ল’ব নালাগে। আধুনিক কৃষিত হালবোৱা, কঠিয়া ৰোৱাৰ পৰা শস্য চপোৱালৈকে সকলোতে যন্ত্ৰৰ ব্যৱহাৰ হৈছে।
অসমৰ কেইগৰাকীমান উচ্চ শিক্ষিত যুৱকে বেংক আৰু বহুজাতিক কোম্পানীৰ লোভনীয় দৰমহাৰ চাকৰি ত্যাগ কৰি কেনেদৰে ফাৰ্মিং আৰু কৃষিখণ্ডৰ সৈতে জড়িত কামত নিয়োজিত হৈ বছৰি ২কোটি টকালৈকে উপাৰ্জন কৰিবলৈ সক্ষম হৈছে তাৰ উদাহৰণ দাঙি ধৰে।
অনুষ্ঠানত বক্তব্য ৰাখি মঙলদৈৰ বিধায়ক গুৰুজ্যোতি দাসে সংহত কৃষিৰে অতি কমেও নেমু, জলকীয়া, অমিতা আদিৰ খেতিৰে নিজৰ আৰ্থিক অৱস্থা টনকীয়াল কৰাৰ বাবে উপস্থিত ৰাইজক অনুৰোধ জনায়। বিধায়কগৰাকীয়ে ধ্ৰুবজ্যোতি শইকীয়া, মানৱ চলিহা, নীলম দত্ত, নৱনীতা বৰা আদি ৰাজ্যখনৰ প্ৰগতিশীল আৰু সফল কৃষকসকলৰ উদাহৰণ ডাঙি ধৰে আৰু তেওঁলোকক আদৰ্শব্যক্তি হিচাপে মানি আগবাঢ়ি যাবলৈ আহ্বান জনায়।
